Magazine

ຈາກ​ເຫດ­ການ​ສັນ​ເຂື່ອນ D ຫຼື Saddle dam D ຂອງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ ແຕກ​​ໃນ​ຄ່ຳ​ຄືນ​ວັນ​ທີ 23 ກໍ­ລະ­ກົດ 2018 ເຮັດ​ໃຫ້​ນ້ຳຈຳ­ນວນ 500 ລ້ານ​ກວ່າ​ແມັດ​ກ້ອນ ໄຫຼ​ລົງ​ສູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ​ຢ່າງ​ໄວ­ວາ, ​ເຫດ­ການ​​ດັ່ງ­ກ່າວ ໄດ້​ສ້າງ​ຄວາມ​ເສຍ​ຫາຍ​ຕໍ່​ຊີ­ວິດ ແລະ ຊັບ​ສິນ​ຂອງ​ປະ­ຊາ­ຊົນ​ເປັນ​ຈຳ­ນວນ​ມະ­ຫາ­ສານ ໂດຍ​ສະ­ເພາະ​ແມ່ນ​ເມືອງ​ສະ­ໜາມ​ໄຊ ​ທີ່​ເປັນ​ເມືອງ​ຕັ້ງ​ຢູ່​ລຸ່ມ​ສັນ​ເຂື່ອນ D ອັນ​ໄດ້​ເຮັດ​ໃຫ້​ປະ­ຊາ­ຊົນ​ຢູ່​ໃນ 13 ບ້ານ​ໄດ້​ຮັບ​ຜົນ​ກະ­ທົບ​ຢ່າງ​ກະ­ທັນ­ຫັນ ໃນ​ນັ້ນ ມີ​ຈຳ­ນວນ 6 ບ້ານ​ທີ່​ເປັນ​ບ້ານ​ລຽບ​ຕາມ​ສາຍ​ນ້ຳ​ເຊ​ປຽນ ໄດ້​ຮັບ​ຜົນ​ກະ­ທົບ 100% ມີ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ ແລະ ເສຍ​ຫາຍ​ໜັກ 1.611 ຄອບ­ຄົວ 7.095 ຄົນ, ເຫດການຄັ້ງນີ້​ມີ​ຜູ້​ເສຍ​ຊີ­ວິດ ແລະ ສູນ­ຫາຍ​ ສັດ­ລ້ຽງ ແລະ ພື້ນ​ທີ່​ກະ­ສິ­ກຳ ​ຂອງ​ປະ­ຊາ­ຊົນ​ເສຍ​ຫາຍ​ຢ່າງ​ຫຼວງ­ຫຼາຍ ແລະ ປະ­ຊາ­ຊົນ​ແຂວງ​ຈຳ­ປາ​ສັກ ກໍໄດ້​ຮັບ​ຜົນ​ກະ­ທົບ​ຈາກ​ເຫດ­ການ​ນີ້​ຈຳ­ນວນ​ໜຶ່ງ. ຍ້ອນ​ຄວາມ​ເປັນ​ຫ່ວງ​ເປັນ​ໄຍ​ຂອງ ​ພັກແລະລັດ ກອງ​ປະ­ຊຸມ​ກົມ​ການ­ເມືອງ ຄັ້ງ​ວັນ​ທີ 30 ກໍ­ລະ­ກົດ 2018 ໄດ້​ເຫັນ​ດີ​ໃຫ້​ລັດ­ຖະ­ບານ​ແຕ່ງ­ຕັ້ງ​ຄະ­ນະ​ສະ­ເພາະ​ກິດ ເພື່ອ​ກວດ­ກາ​ເຫດ­ການ​ດັ່ງ­ກ່າວ ມາ​ຮອດ​ວັນ​ທີ ...

ໃນສະບັບເດືອນກັນຍາ ພວກເຮົາໄດ້ຮັບກຽດການໃຫ້ສໍາພາດຂຶ້ນປົກຂອງທ່ານ ບຸນຕົ້ນ ຈັນທະພອນ ຮັກສາການເລຂາພັກແຂວງ, ເຈົ້າແຂວງຊຽງຂວາງ, ປະທານສະພາປະຊາຊົນແຂວງ ທ່ານຈະໄດ້ສະເໜີໃຫ້ຮູ້ກ່ຽວກັບທ່າແຮງໃນການພັດທະນາ – ສິ່ງພົ້ນເດັ່ນຂອງແຂວງ, ລວມທັງວິໄສທັດໃນການແກ້ໄຂປະກົດການຫຍໍ້ທໍ້ຕ່າງໆພາຍໃນແຂວງ ພາຍຫຼັງທີ່ທ່ານຂຶ້ນຮັບໜ້າທີ່ໃໝ່ ແລະ ການກະກຽມຄວາມພ້ອມໃນການເປັນເຈົ້າພາບງານແຂ່ງຂັນກິລາແຫ່ງຊາດຄັ້ງທີ 11 ໃນທ້າຍປີນີ້. -ສິ່ງພົ້ນເດັ່ນ ແລະ ເປັນທ່າແຮງຂອງແຂວງມີດ້ານໃດແດ່? -ແຂວງຊຽງຂວາງ ຕັ້ງຢູ່ພາກເໜືອຂອງປະເທດ ມີເນື້ອທີ່ 15.000 ກວ່າຕາລາງກິໂລແມັດ, ເປັນເຂດພູດອຍ 90% ທ່າແຮງການພັດທະນາຂອງແຂວງຊຽງຂວາງ ມີ 3 ອັນໃຫຍ່ຄື: 1: ການລ້ຽງສັດໃຫຍ່ເປັນສິນຄ້າ ເຊິ່ງເປັນມູນເຊື້ອຂອງປະຊາຊົນຊາວແຂວງຊຽງຂວາງ ອີງຕາມຂໍ້ມູນທີ່ເກັບກໍາໄດ້ຈາກພະນັກງານປະຕິວັດອະວຸໂສ ໃຫ້ຮູ້ວ່າ: ກ່ອນສົງຄາມແຂວງຊຽງຂວາງມີງົວ,ຄວາຍ ຫຼາຍກວ່າ 300.000ກວ່າໂຕ ພາຍຫຼັງສົງຄາມທໍາລາຍຢຸດຕິມາຮອດປີ 1975 ທົ່ວແຂວງຍັງເຫຼືອ ງົວ,ຄວາຍ ພຽງແຕ່ 1.500 ກວ່າໂຕ ແລະ ມາຮອດປັດຈຸບັນນີ້ທົ່ວແຂວງມີ ງົວ,ຄວາຍ 212.000 ກວ່າໂຕ ໃນນັ້ນມີຄວາຍ 56.000 ກວ່າໂຕ ງົວພື້ນເມືອງ 150.400 ກວ່າໂຕ ງົວພັນຊີ້ນ 600 ກວ່າໂຕ ງົວພັນນົມ ...

ມາດຕະການ ແລະ ວິທີແກ້ໄຂ ຕໍ່ປະກົດການຫຍໍ້ທໍ້ໃນສັງຄົມ ຮັບຮອງເອົາ ການຊີ້ແຈງ ອະທິບາຍ ຂອງ ລັດຖະບານກ່ຽວກັບ ມາດຕະການ ແລະວິທີແກ້ໄຂບັນດາປະກົດການຫຍໍ້ທໍ້ໃນສັງຄົມ ເປັນຕົ້ນ ບັນຫາຢາເສບຕິດ ແລະ ບັນຫາອຸປະຕິເຫດ. ນອກຈາກນັ້ນກອງປະຊຸມສະພາແຫ່ງຊາດ ສະເໜີໃຫ້ລັດຖະບານເອົາໃຈໃສ່ບາງມາດຕະການເພີ້ມເຕີມດັ່ງນີ້: ບັນຫາຢາເສບຕິດ: ເພີ່ມທະວີໂຄສະນາ, ສຶກສາອົບຮົມປູກຈິດສໍານຶກ ໃຫ້ທົ່ວປວງຊົນດ້ວຍຫຼາຍເນື້ອໃນ, ຫຼາຍຮູບການ ແລະ ຫຼາຍວິທີ ເພື່ອໃຫ້ສັງຄົມຮັບຮູ້ຜົນຮ້າຍຂອງຢາເສບຕິດ ພ້ອມທັງເຮັດໃຫ້ວຽກງານສະກັດກັ້ນ ແລະ ຕ້ານຢາເສບຕິດກາຍເປັນສະຕິ, ເປັນເຈົ້າການ, ຄວາມຮັບຜິດຊອບ ແລະ ເປັນໜ້າທີ່ຂອງທົ່ວປວງຊົນ. ຄົ້ນຄ້ວາ ສ້າງຍຸດທະສາດແກ້ໄຂຢາເສບຕິດໄລຍະຍາວ ໃຫ້ເປັນຮູບປະທໍາ, ປັບປຸງ ແລະ ບັງຄັບໃຊ້ ກົດໝາຍ ວ່າດ້ວຍຢາເສບຕິດຕໍ່ຜູ້ກະທຳຜິດ ເປັນຕົ້ນ ຜູ້ຜະລິດ, ຜູ້ຂາຍ-ຜູ້ຊື້, ຜູ້ຂົນສົ່ງ, ຜູ້ຄອບຄອງ ແລະ ຜູ້ເສບຢາເສບຕິດ ໃຫ້ມີຄວາມເຂັ້ມມງວດ ແລະ ເດັດຂາດຂຶ້ນຕື່ມ. ປະຕິບັດ ຄໍາສັ່ງເລກທີ 27/ນຍ, ລົງວັນທີ 5 ຕຸລາ 2011 ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ...

ວາລະສານທາເກັດ ສະບັບນີ້ ຈະພາທ່ານຜູ້ອ່ານມາຮູ້ຈັກກັບ ຜູ້ປະກອບການຂະແໜງ “ໄອທີ” ນັ້ນກໍຄື ບໍລິສັດ ລາວ ໄອທີພັດທະນາ ຈຳກັດ ທີ່ພວມເຕີບໃຫຍ່ຂະຫຍາຍຕົວ ແລະ ເປັນທີ່ຄຸ້ນເຄີຍໃນແວດວົງຂອງ “ໄອທີ” ໃນ ສປປ ລາວ.  ທ່ານ ອຸໄທ ໄຊອຸດົມ ຫົວໜ້າຝ່າຍເຕັກໂນໂລຊີ (C.T.O) ແລະ ເປັນໜຶ່ງໃນສີ່ຄົນທີ່ສ້າງຕັ້ງ ບໍລິສັດນີ້ ໂດຍພື້ນຖານການສຶກສາຂອງທ່ານ ອຸໄທ ແມ່ນ ຮຽນຈົບຊັ້ນສູງດ້ານການບໍລິຫານ”ໄອທີ”ຈາກ ວິທະຍາໄລເຄວສ (Quest College) ແລະ ຈົບປະລິນຍາຕີດ້ານ”ໄອທີ” ຢູ່ທີ່ ຄວສ ແລະ ປະສົບການເຮັດວຽກເປັນພະນັກງານອາສາສະມັກຢູ່ກະຊວງ ກະສິກໍາ ແລະ ປ່າໄມ້ 2 ປີ ແລະ ອົງການຊັບພະຍາກອນນ້ຳ ແລະ ສິ່ງແວດລ້ອມ 2ປີ ກ່ອນຈະມາສ້າງຕັ້ງບໍລິສັດຕົນເອງ. ຈຸດເລີ່ມຕົ້ນຂອງການມາເຮັດບໍລິສັດນີ້, ໃນເວລາທີ່ຮຽນຢູ່ ວິທະຍາໄລ ປີທີ2 ໃນປີ 2006 ກໍໄດ້ສ້າງເວັບບອດໂຕໜຶ່ງຊື່ວ່າ ລາວຊ່າ (Laozaa.com) ເປັນເວັບບອດກ່ຽວກັບດ້ານ”ໄອທີ” ເພື່ອໃຫ້ຄົນໄດ້ເຂົ້າສະແດງຄວາມຄິດເຫັນ ...

ຫຼາຍຄົນອາດເຄີຍໄດ້ຍິນເລື່ອງ “ແຊັກເດັ້ງ” ຖອນເງິນບໍ່ໄດ້ ເງິນໃນບັນຊີມີບໍ່ພໍໃຫ້ຖອນຕາມຈຳນວນທີ່ລະບຸໃນ”ແຊັກ” ບັນຫາຕາມມາກໍຄື ໄດ້ຮັບໝາຍຮຽກຈາກ ເຈົ້າໜ້າທີ່ ສຸດທ້າຍກໍຖືກກັກຕົວດຳເນີນຄະດີອາຍາ. ເພື່ອຫຼີກບັນຫາດັ່ງກ່າວ ໃນບົດຄວາມນີ້ ຂ້າພະເຈົ້າ ຂໍຊີ້ແຈງເຫດຜົນທາງດ້ານກົດໝາຍ ກ່ຽວກັບສາເຫດທີ່ມີໂທດອາຍາຕິດຄຸກ ເນື່ອງຈາກການນຳໃຊ້”ແຊັກ”ທີ່ບໍ່ມີເງິນໃນບັນຊີ ແລະ ຄວນເຮັດແນວໃດເພື່ອບໍ່ໃຫ້ເກີດບັນຫາດັ່ງກ່າວ. ໃນຊີວິດປະຈຳວັນ ຖ້ານຳໃຊ້”ແຊັກ”ຢ່າງຖືກຕ້ອງ ປົກກະຕິກໍບໍ່ໄດ້ມີບັນຫາຫຍັງໃນການຊຳລະສະສາງຄ່າໃຊ້ຈ່າຍຕ່າງໆ ຕາມວົງເງິນທີ່ມີໃນບັນຊີຂອງຕົນ. ຫຼາຍກໍລະນີທີ່ມັກມີບັນຫາຖືກດຳເນີນຄະດີ, ຖືກກັກຕົວຕິດຄຸກ ແມ່ນກ່ຽວຂ້ອງກັບການນຳໃຊ້”ແຊັກ”ທີ່ບໍ່ມີເງິນໃນບັນຊີເພື່ອຄ້ຳປະກັນ ການປະຕິບັດສັນຍາໃດໜຶ່ງ. ກໍລະນີທີ່ມີບັນຫານັ້ນ ແມ່ນຂຽນສັ່ງຈ່າຍ”ແຊັກ”ເປັນເງິນສົດ ແຕ່ໃນຕົວຈິງໃນບັນຊີພັດບໍ່ມີເງິນຈຳນວນດັ່ງກ່າວ. ດ້ວຍຄວາມມັກງ່າຍ ຫຼາຍກໍລະນີ ເພື່ອໃຫ້ຝ່າຍຄູ່ຮ່ວມທຸລະກິດ ຫຼື ຝ່າຍຄູ່ສັນຍາ ເກີດມີຄວາມເຊື່ອໝັ້ນໃນການປະຕິບັດສັນຍາ ແລະ ຄິດວ່າຈະມີເງິນໃນອະນາຄົດນັ້ນ ຈິ່ງຂຽນສັ່ງຈ່າຍ”ແຊັກ”ເປັນເງິນສົດແລ້ວເອົາໄປຄ້ຳປະກັນນຳຝ່າຍກົງກັນຂ້າມ. ເມື່ອຮອດເວລາປະຕິບັດສັນຍາ ຝ່າຍທີ່ຖື”ແຊັກ”ເງິນສົດນັ້ນ ໄປຂໍຖອນເງິນຢູ່ທະນາຄານ ແຕ່ໃນບັນຊີດັ່ງກ່າວພັດບໍ່ມີເງິນພຽງພໍໃຫ້ຖອນຕາມຈຳນວນໃນໃບ”ແຊັກ”. ກໍລະນີດັ່ງກ່າວນີ້, ແມ່ນຖືວ່າຜິດຕໍ່ກັບ ມາດຕາ 33 ຂອງ ດຳລັດ ວ່າດ້ວຍ”ແຊັກ” ສະບັບເລກທີ 386/ນຍ ລົງວັນທີ 27/10/2014 ເຊິ່ງກຳນົດໄວ້ວ່າ “ຜູ້ໃດທີ່ໄດ້ສັ່ງຈ່າຍ”ແຊັກ” ໂດຍຈໍານວນເງິນໃນບັນຊີຂອງຕົນ ບໍ່ພຽງພໍບາງສ່ວນ ຫຼື ທັງໝົດກັບຈຳນວນເງິນທີ່ກຳນົດໃນໃບ”ແຊັກ” ຍົກເວັ້ນກໍລະນີ”ແຊັກ”ທີ່ໄດ້ຮັບການຢັ້ງຢືນຈາກຜູ້ອອກ”ແຊັກ” ຈະຖືກປັບໃໝຕາມຈຳນວນເງິນທີ່ໄດ້ຂຽນໃນໃບ”ແຊັກ”ນັ້ນ ແລະ ...

ສໍາລັບແນວຄວາມຄິດຂອງຂ້າພະເຈົ້າແລ້ວ ແມ່ຍິງລາວເຮົາກໍມີຄວາມຮູ້; ຄວາມສາມາດບໍ່ໄດ້ ດ້ອຍໜ້າຊາດອື່ນໃນໂລກ ຖ້າວ່າມີຄວາມຕັ້ງໃຈຢາກເຮັດທຸລະກິດ ຫຼື ຖ້າຫາກມັກຮັກໃນສິ່ງໃດແລ້ວແມ່ນ ສາມາດເລີ່ມໄດ້ແຕ່ນ້ອຍເລີຍ ໂດຍສາມາດເລີ່ມແຕ່ຕອນຍັງຮຽນໜັງສືຢູ່ກະໄດ້ຖ້າຫາກແມ່ຍິງເຮົາຮູ້ຈັກ ການຊື້-ຂາຍ ທໍາມາຫາກິນຄອບຄົວກໍຈະມີຂໍ້ສະດວກ. ປັດຈຸບັບນີ້ແມ່ຍິງໄດ້ມີການສຶກສາຮຽນຮູ້ສູງໆເທົ່າທຽມເພດຊາຍມີຄວາມກ້າຫານກ້າສະແດງອອກມີຄວາມອົດທົນສາມາດເຮັດໄດ້ທຸກວຽກງານທີ່ເພດຊາຍເຮັດໄດ້ ເຊິ່ງມັນແຕກຕ່າງກັບສະໄໝກ່ອນ. ແມ່ຍິງລາວມີມູນເຊື້ອຄວາມເປັນຜູ້ປະກອບການດົນນານມາແລ້ວ ເຊິ່ງເຮົາຈະສັງເກດເຫັນວ່າຢູ່ຕາມຕະຫຼາດ ສ່ວນຫຼວງຫຼາຍຈະແມ່ນແມ່ຍິງເຮັດຄ້າຂາຍຍ່ອຍ ໂດຍໃຊ້ຄວາມອົດທົນຄວາມດຸໜັ່ນເພື່ອຫາລ້ຽງຄອບຄົວ ແລະ ເລື່ອງການບໍລິຫານການເງິນຂ້າພະເຈົ້າເຫັນວ່າແມ່ຍິງມີຄວາມລະອຽດອ່ອນທີ່ສຸດ….. ແມ່ຍິງລາວຈະກ້າວສູ່ສາກົນ ໄດ້ຕ້ອງມີປັດໃຈໃດແດ່? (ລາຍລະອຽດ ທ່ານສາມາດຊອກຕິດຕາມອ່ານວາລະສານທາເກັດ ສະບັບ 148 ເດືອນພະຈິກ 2018 ໄດ້ທີ ສຳນັກງານຫ້ອງການພາກລັດ ແລະ ເອກະຊົນ, ຫ້ອງສະໝຸດ, ຮ້ານອາຫານ, ຮ້ານກາເຟ, ຮ້ານ kaogee cafe, ຮ້ານ The pizza company ແລະ ຫຼາຍບ່ອນສະຖານທີ່ໃນນະຄອນຫຼວງ ຫຼື ສອບຖາມຈອງເປັນສະມາຊິກໄດ້ທີ່ເບີ 021 216 666) Lao women have a long tradition of operating as entrepreneurs In my opinion, Lao women ...

ທ່ານນາງ ຈັນທະຈອນ ວົງໄຊ ແມ່ຍິງທີ່ບໍ່ຍອມທໍ້ຖອຍ, ຜ່ານຜ່າອຸປະສັກນາໆປະການໃນຊີວິດການງານເຄີຍລອງຜິດລອງຖືກມາຫຼາຍຢ່າງກວ່າຈະມີວັນນີ້ ແລະ ຮຽນຮູ້ປະສົບການໃໝ່ໆຢູ່ຕະຫຼອດເວລາເພື່ອພັດທະນາຕົນເອງ ເຖິງຈະມີຫຼາຍທຸລະກິດທີ່ຮັດຕົວແຕ່ຄອບຄົວຄືສິ່ງສໍາຄັນທີ່ສຸດ ດັ່ງນັ້ນຈຶ່ງຈັດແບ່ງເວລາໃຫ້ກັບຄອບຄົວຢ່າງໜ້ອຍເດືອນລະຄັ້ງ ຫຼື ຂຶ້ນແຜນໄວ້ລ່ວງໜ້າ 3 ເດືອນຈະຕ້ອງຫາເວລາເພື່ອໃຫ້ຢູ່ພ້ອມໜ້າພ້ອມຕາເພື່ອໂອ້ລົມສັ່ງສອນລູກໆຫຼານໆປຶກສາຫາລືແກ້ໄຂບັນຫາຊ່ວຍກັນ ແລະ ຮ່ວມກິດຈະກໍາຄອບຄົວຢ່າງອົບອຸ່ນມີຄວາມສຸກ. ດັ່ງນັ້ນໃນວາລະສານສະບັບນີ້ພວກເຮົາໄດ້ຮັບກຽດການໃຫ້ສາພາດຂຶ້ນປົກຈາກທ່ານນາງ ຈັນທະຈອນ ວົງໄຊ ຮອງປະທານສະພາການຄ້າແລະອຸດສາຫະກໍາແຫ່ງຊາດລາວ, ປະທານສະມາຄົມນັກທຸລະກິດແມ່ຍິງລາວ, ຄະນະກໍາມະການສູນກາງແນວລາວສ້າງຊາດ, ສະມາຊິກເຄືອຂ່າຍຂອງນັກທຸລະກິດແມ່ຍິງອາຊຽນ, ຄະນະກໍາມະການແມ່ຍິງອາຊຽນຂອງສະພາການຄ້າ, ຮອງປະທານບໍລິສັດ ເຄແອນຊີ ກຣຸບ, ພັນລະຍາທ່ານ ກິດສະໜາ ວົງໄຊ ປະທານບໍລິສັດ ເຄແອນຊີ ກຣຸບ, ອະດີດປະທານສະພາການຄ້າ ແລະ ອຸດສາຫະກໍາແຫ່ງຊາດລາວ 4 ສະໄໝ, ອະດີດອໍານວຍການໃຫຍ່ບໍລິສັດ ເບຍລາວ ຈໍາກັດ. ປະຫວັດຫຍໍ້ໂດຍສັງເຂບ. ໃນສະໄໝເດັກນ້ອຍເຂົ້າຮຽນທີ່ປະຖົມບໍ່ໂອ ເມືອງຫາດຊາຍຟອງ, ຫຼັງຈາກນັ້ນມາຮຽນຢູ່ ໂຮງຮຽນ “ລີເຊ” ວຽງຈັນໃນປີ 1975 ໄປສຶກສາຕໍ່ທີ່ປະເທດຝຣັ່ງເສດໃນສາຂາບັນຊີເລຂານຸການ ພາຍຫຼັງຮຽນຈົບປີ 1977 ໄດ້ເດີນທາງກັບຄືນປະເທດຮ່ວມກັບຂະບວນການນັກສຶກສາກ້າວໜ້າຊຸດທໍາອິດ ຊຶ່ງພາຍຫຼັງປະເທດຊາດເຮົາທໍາການປົດປ່ອຍແລ້ວເພິ່ນມີຄວາມຕ້ອງການປັນຍາຊົນລາວຜູ້ກ້າວໜ້າຢູ່ຕ່າງປະເທດກັບຄືນເພື່ອມາພັດທະນາປະເທດຊາດ. ໄດ້ຮັບການບັນຈຸເຂົ້າເປັນລັດຖະກອນໃນກະຊວງອຸດສາຫະກໍາການຄ້າ ແລະ ພໍດີໃນເວລານັ້ນທາງບໍລິສັດເບຍລາວເພິ່ນມີຄວາມຕ້ອງການພະນັກງານບັນຊີການເງິນເປັນແມ່ຍິງ ດັ່ງນັ້ນທາງກົມອຸດສາຫະກໍາກໍໄດ້ສົ່ງໄປປະຈໍາຢູ່ເບຍລາວແຕ່ປີ 1977 ຈົນຮອດປີ 1985 ...

ເມື່ອກ່າວເຖິງຮ້ານຂາຍຄໍາ ພູວົງ ຫຼາຍທ່ານຈະຮູ້ດີ ແຕ່ຖ້າກ່າວເຖິງ “ອາເລັກ” ຫຼາຍທ່ານຄົງຈະບໍ່ຄຸ້ຍເຄີຍກັບຊື່ນີ້, ດັ່ງນັ້ນວາລະສານສະບັບນີ້ພວກເຮົາໄດ້ມີໂອກາດສໍາພາດນັກທຸລະກິດໜຸ່ມ ໄພແຮງ ແຊງທາງໂຄ້ງ ຜູ້ຕໍ່ຍອດທຸລະກິດຂອງຮ້ານຂາຍຄໍາ ພູວົງ ແລະ ກິດຈະການໃນກຸ່ມພູວົງ ໃຫ້ກວ້າງຂວາງກວ່າເກົ່າ. ຈັນທະວົງ ພະມີສິດ ອາຍຸ 31 ປີ “ອາເລັກ” ເປັນລູກຊາຍຄົນທີສອງຂອງທ່ານ ພູວົງ ພະມີສິດ ຮຽນຈົບປະລິນຍາຕີ ສາຍບໍລິຫານທຸລະກິດ ອັນຍະມະນີ ຈາກ ສ.ອາເມລິກາ ທີ່ໂຮງຮຽນ gemological institute of America ໃນປີ 2008 ຫຼັງຈາກຈົບມາກໍມາຊ່ວຍວຽກທຸລະກິດພໍ່ ເຊິ່ງແມ່ນຮ້ານ ຄໍາພູວົງ ພາຍຫຼັງທີ່ມາເບິ່ງກິດຈະການພ້ອມ ເອື້ອຍທີ່ຮຽນຈົບມາພ້ອມກັນ ປັດຈຸບັນເຮັດໃຫ້ທຸລະກິດຮ້ານຂາຍຄໍາພູວົງ ຂະຫຍາຍໄດ້ 7 ສາຂາ ແລະ ຈະຂະຫຍາຍຕື່ມອີກຕາມຕົວເມືອງໃຫຍ່ຂອງບັນດາແຂວງໃນປະເທດຕື່ມອີກ.    *ແນວຄວາມຄິດລິເລີ່ມການຂະຫຍາຍສາຂາ? ເຫດຜົນທີ່ຂະຫຍາຍກໍເພື່ອເປັນການຄວບຄຸມຄຸນນະພາບຂອງສິນຄ້າ ແລະ ອີກເຫດຜົນໜຶ່ງກໍແມ່ນເພື່ອສ້າງຄວາມສະດວກສະບາຍໃຫ້ແກ່ລູກຄ້າຮ້ານຄໍາພູວົງ ໃນທົ່ວປະເທດ. ຜ່ານມາກໍມີລູກຄ້າຈໍານວນໜຶ່ງມາຊື້ຄໍາຮ້ານເຮົາເພື່ອໄປຈໍາໜ່າຍ ແລະ ກໍມີຈໍານວນໜຶ່ງສວຍໂອກາດແອບອ້າງ ດັ່ງນັ້ນເຮັດໃຫ້ພວກເຮົາມີແນວຄິດທີ່ຈະຂະຫຍາຍທຸລະກິດໃຫ້ເປັນລະບົບຂຶ້ນ ເພື່ອປ້ອງກັນການແອບອ້າງ. *ກ່ຽວກັບຄຸນນະພາບ ແລະ ມາດຕະຖານຂອງແຕ່ລະສາຂາເຮົາຄຸ້ມຄອງແນວໃດ? ຜ່ານມາທາງພວກເຮົາກໍໄດ້ມີການລອງຜິດ ...

ໃນຊີວິດປະຈຳວັນ ຫຼາຍທ່ານຫຼີກບໍ່ໄດ້ເລື້ອງຫຼົງໆ ລືມໆ ຖ້າຫາກທ່ານຫຼົງໂອນເງິນໄປເຂົ້າຜິດບັນຊີ ທ່ານຕ້ອງກັງວົນໃຈວ່າ: ຈະມີສິດເອົາຄືນໄດ້ບໍ່? ຈະເອົາຄືນໄດ້ແນວໃດ? ຖ້າເຂົາຖອນໄປຈ່າຍໝົດແລ້ວບໍ່ມີເງິນຄືນໃຫ້ເດ ຈະເຮັດແນວໃດ? ດ້ານກົດໝາຍ ມີການກໍານົດໄວ້ຄືແນວໃດ?. ແນ່ນອນ ຕາມກົດໝາຍ ຖ້າທ່ານຫຼົງໂອນເງິນໄປເຂົ້າຜິດບັນຊີ ທ່ານມີສິດທວງເອົາເງິນຄືນໄດ້ ແລະ ຜູ້ທີ່ຮັບເງິນນັ້ນກໍຕ້ອງສົ່ງເງິນດັ່ງກ່າວນັ້ນຄືນໃຫ້ຜູ້ທີ່ຫຼົງໂອນເງິນມານັ້ນ ໂດຍບໍ່ມີເງື່ອນໄຂໃດໆ. ຫຼາຍທ່ານອາດຈະໂຕ້ຖຽງວ່າ: ໂອນເງິນເຂົ້າບັນຊີຂອງຄົນອື່ນ ກໍຖືວ່າເປັນເງິນຂອງຄົນອື່ນ ເພາະເຈົ້າຂອງບັນຊີແມ່ນເປັນເຈົ້າກຳມະສິດຂອງເງິນໃນບັນຊີຕົນ, ນັ້ນເປັນພຽງການໂຕ້ຖຽງໃນແງ່ມຸມຄວາມເຂົ້າໃຈສ່ວນຕົວເທົ່ານັ້ນ. ເຫດຜົນທີ່ມີສິດທວງເອົາເງິນຄືນໄດ້ນັ້ນແມ່ນມີ 2 ເຫດຜົນຄື: ຂໍ້ຜູກພັນນອກສັນຍາ ແລະ ຄວາມຮັບຜິດຊອບທາງອາຍາ. ເຫດຜົນຂໍ້ຜູກພັນນອກສັນຍາ: ແມ່ນໄດ້ກໍານົດໄວ້ໃນ ມາດຕາ 99 ຂອງ ກົດໝາຍ ວ່າດ້ວຍ ຂໍ້ຜູກພັນໃນສັນຍາ ແລະ ນອກສັນຍາ ສະບັບເລກທີ 01/ສພຊ ລົງວັນທີ 08 ທັນວາ 2008 ໂດຍໄດ້ກຳນົດໄວ້ວ່າ: “ບຸກຄົນໃດ ຫາກໄດ້ຮັບຊັບສິ່ງຂອງ ຂອງຜູ້ອື່ນໂດຍເຈດຕະນາ ທັງໆທີ່ຮູ້ວ່າ ຕົນບໍ່ມີສິດຮັບຊັບສິ່ງຂອງນັ້ນແລ້ວ ບຸກຄົນນັ້ນ ຕ້ອງສົ່ງຊັບສິ່ງຂອງ ຫຼື ມູນຄ່າຂອງຊັບສິ່ງຂອງນັ້ນ ຄືນໃຫ້ຜູ້ເປັນເຈົ້າຂອງ ພ້ອມທັງໝາກຜົນ ຫຼື ລາຍໄດ້ ນັບແຕ່ວັນໄດ້ຮັບເປັນຕົ້ນໄປ”. ...

ໃນຍຸກດິຈິຕອນ, ວິຖີຊີວິດຂອງພວກເຮົາສ່ວນໃຫຍ່ແມ່ນມີການເຮັດທຸລະກຳການເງິນ ຈ່າຍໂອນ, ຊື້ເຄື່ອງອອນລາຍ, ຊື້ປີ້ຍົນ, ຈອງໂຮງແຮມ ແລະອີກຫຼາກຫຼາຍກິດຈະກຳເປັນປະຈຳ ໂດຍຜ່ານບັດເຄຣດິດ ກໍຄືຕ້ອງໃຊ້ລະຫັດຜ່ານສະເພາະ (Password) ເຊິ່ງຖືວ່າເປັນຄວາມລັບສ່ວນບຸກຄົນເພື່ອຢືນຢັນການຈ່າຍເງິນ, ການເຮັດທຸລະກຳຕ່າງໆເອີ້ນວ່າ Transaction. ສະນັ້ນ, ການຮັກສາຄວາມປອດໄພຂອງຂໍ້ມູນຈຶ່ງເປັນເລື່ອງທີ່ສຳຄັນຫຼາຍ ເພື່ອເຮັດໃຫ້ຜູ້ຊົມໃຊ້ໝັ້ນໃຈວ່າ ຂໍ້ມູນເຫຼົ່ານັ້ນຈະບໍ່ຮົ່ວໄຫຼ ຫຼືຖືກໃຜບາງຄົນປ່ຽນແປງມັນ. ເຊິ່ງໂດຍປົກກະຕິແລ້ວການສ້າງຄວາມເຊື່ອຖືນີ້ ຈະຕ້ອງໄດ້ເພິ່ງພາຄົນກາງ ຫຼືພາກສ່ວນທີ່ສາມ (Centralized trusted party) ມາຊ່ວຍກວດສອບຄວາມໜ້າເຊື່ອຖື. ຖ້າຫາກທ່ານເຮັດທຸລະກຳອອນລາຍເລື້ອຍໆ ຈະສັງເກດເຫັນຄຳທີ່ຂຽນວ່າ Secured by ຫຼື Protected by ຕາມດ້ວຍຊື່ຂອງພາກສ່ວນທີສາມໃດໜຶ່ງ ເຊິ່ງແນ່ນອນວ່າ ທ່ານຕ້ອງໄດ້ຈ່າຍຄ່າທຳນຽມບໍລິການ ໃຫ້ພາກສ່ວນນີ້ທຸກໆຄັ້ງ. ບຼ໊ອກເຊນ (Blockchain) ແມ່ນເຕັກໂນໂລຊີດ້ານຄວາມປອດໄພ ແລະໜ້າເຊື່ອຖືກຂອງຂໍ້ມູນ ໂດຍບໍ່ຕ້ອງອາໄສພາກສ່ວນທີ່ສາມກວດສອບ ເປັນການຮ້ອຍຕໍ່ຂໍ້ມູນເຂົ້າໄວ້ນໍາກັນທັງໝົດ ເປັນຖານຂໍ້ມູນທີ່ມີການຈັດການຊຸດຂໍ້ມູນທີ່ມີການເພີ່ມຂຶ້ນຢ່າງຕໍ່ເນື່ອງ, ມີການກວດສອບຄວາມຖືກຕ້ອງ ແລະ ຄວາມປອດໄພເຊິ່ງກັນ ແລະ ກັນ. ໂດຍບຼ໊ອກເຊນຈະເຮັດວຽກໃນຮູບແບບການເກັບຂໍ້ມູນ (Data Structure) ແບບໜຶ່ງ ທີ່ເຮັດໃຫ້ຂໍ້ມູນທຸລະກຳດິຈິຕອນ (Digital Transaction) ຂອງແຕ່ລະຄົນສາມາດ Share ໄປຍັງທຸກຄົນໄດ້ເປັນຕ່ອງໂສ້ (Chain) ທີ່ເຮັດໃຫ້ ...