Target Magazine
ເພື່ອເປັນການສະເຫຼີມສະຫຼອງວັນອ່ານໂລກ (4 ມີນາ) ແລະ ສ້າງຂະບວນການສະເຫຼີມສະຫຼອງວັນແມ່ຍິງສາກົນ (8 ມີນາ), ໂດຍສະເພາະແມ່ນເພື່ອທີ່ຈະເປັນສ່ວນໜຶ່ງໃນການປູກຝັງນິໄສມັກການອ່ານ ການຂຽນ ໃຫ້ແກ່ໄວໜຸ່ມລາວ ເພື່ອພວກເຂົາໄດ້ເຕີບໃຫຍ່ພ້ອມໆກັບຄວາມຮູ້ທີ່ກວ້າງຂວາງ, ມີຄວາມສາມາດທຽບເທົ່າກັບພາກພື້ນ ແລະ ສາກົນ. ໃນວັນທີ 4 ມີນາ 2021 ຄະນະອັກສອນສາດ ມະຫາວິທະຍາໄລແຫ່ງຊາດ ຮ່ວມກັບບໍລິສັດໂມນິວເມັນຈຳກັດ ແລະ ຮ້ານປຶ້ມດີບຸກ ໄດ້ຈັດງານເທສະການປຶ້ມອ່ານ ປະຈໍາປີ 2021 ຂຶ້ນ ທີ່ສະໂມສອນໃຫຍ່ມະຫາວິທະຍາໄລແຫ່ງຊາດ. ເຂົ້າຮ່ວມເປີດງານໂດຍ ທ່ານ ປອ. ນາງ ທອງມາລາ ໂພສີຄຳ ຮອງຄະນະບໍດີ ຄະນະອັກສອນສາດ, ທ່ານ ສົມໄໝ ພົມມະຈັນ ເຈົ້າຂອງຮ້ານປຶ້ມດີບຸກ, ທ່ານ ນາງ ດວງມາລາ ພົມມະວົງ ຜູ້ອຳນວຍການບໍລິສັດ ໂມນີເມັນ, ພ້ອມດ້ວຍຄູອາຈານ, ນັກສຶກສາ ແລະ ແຂກທີ່ຖືກເຊີນເຂົ້າຮ່ວມ.
ທ່ານ ສົມສະໄໝ ພົມມະຈັນ ເຈົ້າຂອງຮ້ານປຶ້ມດີບຸກ ແລະ ທັງເປັນຜູ້ຮັບຜິດຊອບຈັດງານເທສະການປຶ້ມອ່ານປີ 2021 ໄດ້ກ່າວວ່າ: ການຈັດງານເທສະການປຶ້ມ (Book Festival 2021) ຄັ້ງນີ້ ກໍເພື່ອເປັນທາງເລືອກຂອງນັກອ່ານທີ່ຈະໄດ້ຄົ້ນຫາປຶ້ມທີ່ມັກ, ປຶ້ມບາງເຫຼັ້ມ, ໜັງສືບາງຫົວ, ຄຳບາງຄຳ ອາດຈະປ່ຽນວິທີຄິດ, ປ່ຽນຊີວິດຂອງທ່ານໄດ້. ສະນັ້ນ, ເມື່ອເຮົາອ່ານປຶ້ມຫົວໃດ ກໍເໝືອນກັບວ່າເຮົາໄດ້ສົນທະນາກັບນັກຂຽນ, ປຶ້ມປຽບເໝືອນເພື່ອນທີ່ໄປກັບເຮົາໄດ້ຕະຫຼອດ, ປຽບເໝືອນທີ່ປຶກສາທີ່ເຂົ້າເຖິງໄດ້ງ່າຍທີ່ສຸດ. ປຶ້ມລາວ ກໍບໍ່ໄດ້ໜ້ອຍໜ້າປະເທດໃດໃນໂລກ ເພາະປຶ້ມລາວຫຼາຍເຫຼັ້ມ ຖືກແປເປັນພາສາຕ່າງປະເທດ ແລະ ຄົນຕ່າງປະເທດ ກໍໄດ້ສັ່ງຊື້ປຶ້ມລາວບໍ່ໜ້ອຍ. ການຈັດງານເທສະການປຶ້ມ ຖືເປັນພາລະກິດໜຶ່ງທີ່ສຳຄັນ ທ່າມກາງເທສະການຕ່າງໆຫຼາກຫຼາຍໃນປັດຈຸບັນ ຈະຕ້ອງໄດ້ມີການຮ່ວມມືເພື່ອໃຫ້ມີຂຶ້ນທຸກປີ.
ເທສະການປຶ້ມອ່ານປີນີ້ ມີຮ້ານປື້ມເຂົ້າຮ່ວມວາງສະແດງ 34 ບູດ ໃນນີ້ຮ້ານປຶ້ມ 10 ຮ້ານ (ໃນຈຳນວນ 24 ຮ້ານປຶ້ມໃນນະຄອນຫຼວງ) ແລະ ງານຈະຈັດຂຶ້ນເປັນເວລາ 3 ວັນ ລະຫວ່າງວັນທີ 4-6 ມີນາ 2021 ນັບແຕ່ເວລາ 8:00-20:00 ໂມງ ທີ່ສະໂມສອນໃຫຍ່ມະຫາວິທະຍາໄລແຫ່ງຊາດ.
