ໂຄງການທາງລົດໄຟລາວ-ຫວຽດນາມ ເປັນທາງລົດໄຟທີ່ເຊື່ອມຕໍ່ນະຄອນຫລວງວຽງຈັນກັບເມືອງ ວັງແອງຂອງຫວຽດນາມ. ຄາດຄະເນງົບປະມານການກໍ່ສ້າງປະມານ 5 ຕື້ໂດລາສະຫະລັດ. ໂຄງການນີ້ມີຈຸດປະສົງເພື່ອຫັນປ່ຽນ ສປປ ລາວ ໃຫ້ເປັນປະເທດ land-linked ຫຼາຍຂຶ້ນ. ທີ່ສາມາດສ້າງຄວາມສະດວກການຄ້າ ລວມເຖິງການສົ່ງເສີມ ສປປ ລາວ ໃຫ້ເປັນ “ສູນກາງດ້ານຂົນສົ່ງສິນຄ້າ” ຄາດວ່າຈະເລີ່ມລົງມືກໍ່ສ້າງໃນ ເດືອນພະຈິກ 2022, ແຕ່ຍັງບໍ່ໄດ້ກຳນົດຢ່າງຈະແຈ້ງ.
ຈຸດສຳຄັນແມ່ນທາງລົດໄຟສາຍນີ້ເຊື່ອມຕໍ່ນະຄອນຫຼວງວຽງຈັນ ແລະ ທ່າກຳປັ່ນວັງແອງ (Vung Ang) ນອກຈາກນັ້ນ ທາງລົດໄຟ ລາວ-ຫວຽດນາມ ສາມາດເຊື່ອມຕໍ່ທາງລົດໄຟລາວ-ຈີນໄດ້ ໝາຍຄວາມວ່າ ການຂົນສົ່ງສິນຄ້າທາງທະເລ ຈະສາມາດຂະຫຍາຍໄປສູ່ພາກເໜືອຂອງ ສປປ ລາວ ແລະ ພາກໃຕ້ຂອງຈີນ. ນອກນັ້ນ, ທາງລົດໄຟລາວ-ຫວຽດນາມ ຈະມີຈຸດສັບປ່ຽນເສັ້ນທາງລົດໄຟ ເໜືອ-ໃຕ້ ຂອງຫວຽດນາມ. ຖືເປັນໂອກາດໃຫ້ກັບເສັ້ນທາງຄົມມະນາຄົມຂົນສົ່ງລະຫວ່າງ ຮ່າໂນ້ຍ ແລະ ວຽງຈັນ ໃນອະນາຄົດ. ເຄືອຂ່າຍທາງລົດໄຟ ແມ່ນຈຸດສຳຄັນໃນການຂັບເຄື່ອນ ສປປ ລາວ ໃຫ້ເປັນສູນກາງການຂົນສົ່ງຂອງອາຊີຕາເວັນອອກສຽງໃຕ້.
ຍ້ອນລົດໄຟສາມາດຊ່ວຍຫຼຸດຜ່ອນຄ່າໃຊ້ຈ່າຍໃນການຂົນສົ່ງໄດ້ເຖິງ 40% ແລະຈະກາຍເປັນທາງເລືອກການຂົນສົ່ງສໍາລັບຜູ້ສົ່ງອອກຈາກບັນດາປະເທດໃນພາກພື້ນ ດ້ວຍການເພີ່ມຂຶ້ນຂອງຄ່າຂົນສົ່ງທາງບົກ, ທາງອາກາດ ແລະ ທະເລ ດັ່ງນັ້ນ, ການຂົນສົ່ງທາງລົດໄຟຈະເປີດໂອກາດທາງການຄ້າຫຼາຍຂຶ້ນ.