Target Magazine
ນໍ້າມັນແພງ! ນໍ້າມັນຂາດປໍ້າ ເກີດຈາກຫຼາຍປັດໄຈ ແຕ່ລັດຖະບານເຮັດທຸກວິທີທາງເພື່ອຊ່ວຍເຫຼືອປະຊາຊົນ.
ທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ) ໄດ້ຖະແຫຼງຕໍ່ສື່ມວນຊົນເມື່ອວັນທີ 10 ພຶດສະພາ 2022 ທີ່ກະຊວງ ອຄ ໃຫ້ຮູ້ວ່າ: ສປປ ລາວ ເປັນປະເທດນໍາເຂົ້າ ນ້ຳມັນເຊື້ອໄຟ ຈາກຕ່າງປະເທດ 100% ຊຶ່ງປັດຈຸບັນ, ຈາກສະພາບການຂອງໂລກ ທີ່ມີການປ່ຽນແປງ ສົ່ງຜົນເຮັດລາຄານໍ້າມັນເຊື້ອໄຟໃນຕະຫຼາດໂລກ ເວົ້າລວມ, ເວົ້າສະເພາະ ລາຄານໍ້າມັນເຊື້ອໄຟສໍາເລັດຮູບຕະຫຼາດສິງກະໂປ ຍັງສືບຕໍ່ເໜັງຕີງຂຶ້ນສູງ.
ຕໍ່ບັນຫາດັ່ງກ່າວນັ້ນ ໄດ້ສົ່ງຜົນກະທົບໂດຍກົງເຮັດໃຫ້ລາຄາຂາຍຍ່ອຍນ້ຳມັນເຊື້ອໄຟພາຍໃນປະເທດເຮົາປັບຂຶ້ນເປັນເງົາຕາມໂຕ ຊຶ່ງການປັບລາຄາໃນຄັ້ງວັນທີ 30 ເມສາ 2022 ທີ່ຜ່ານມາ ແມ່ນມີຄວາມຈຳເປັນເພື່ອເຮັດໃຫ້ລາຄາປັບປ່ຽນທັນຕາມສະພາບການ. ແຕ່ດ້ວຍປັດໄຈພາຍນອກ ຄຽງຄູ່ກັບບັນຫາອັດຕາແລກປ່ຽນເງິນຕາຕ່າງປະເທດ ມີສ່ວນຜິດດ່ຽງສູງລະຫວ່າງທະນາຄານທຸລະກິດ ກັບຮ້ານແລກປ່ຽນເງິນຕາ, ການປະຕິບັດມາດຕະການຄວບຄຸມ ແລະ ປ້ອງກັນການແຜ່ລະບາດຂອງພະຍາດ COVID-19 ທີ່ຕ້ອງເພີ່ມຂັ້ນຕອນ ແລະ ເພີ່ມລາຍຈ່າຍຂອງຜູ້ປະກອບການ ເຮັດໃຫ້ຫຼາຍບໍລິສັດຕົກຢູ່ໃນສະພາບຂາດທຶນ ແລະ ບໍ່ສາມາດນຳເຂົ້ານ້ຳມັນເຊື້ອໄຟມາຮັບໃຊ້ສັງຄົມໄດ້ຢ່າງທົ່ວເຖິງ.
ອີກດ້ານໜຶ່ງ, ເຫັນວ່າມີບາງບໍລິສັດທີ່ມີການເຄື່ອນໄຫວບໍ່ຖືກຕ້ອງ, ໂດຍສະເພາະແມ່ນປ້ຳບໍລິການນ້ຳມັນເຊື້ອໄຟ ຈຳນວນໜຶ່ງ ມີການລັກລອບຊື້ນ້ຳມັນຈາກພາກສ່ວນອື່ນມາລົງປ້ຳ, ບໍລິສັດນຳເຂົ້ານ້ຳມັນເຊື້ອໄຟ ແລະ ບໍລິສັດຈຳໜ່າຍພາຍໃນ ທີ່ມີລະບົບສາງຈຳນວນໜຶ່ງ ມີການສວຍໂອກາດກັກຕຸນນ້ຳມັນໃນໄລຍະທີ່ຈະມີການປັບລາຄານ້ຳມັນເຊື້ອໄຟ ແລະ ບໍ່ປະຕິບັດຕາມລາຄາທີ່ລັດ ອອກແຈ້ງການແຕ່ລະຄັ້ງ ດັ່ງນີ້ເປັນຕົ້ນ. ບັນດາບໍລິສັດຜູ້ນໍາເຂົ້ານ້ຳມັນເຊື້ອໄຟ ຂອງລາວເຮົາ ກໍປະສົບບັນຫາດັ່ງກ່າວ ໂດຍບໍ່ສາມາດນໍາເຂົ້າໄດ້ຕາມປະລິມານຄວາມຕ້ອງການ ເນື່ອງຈາກມື້ນຳເຂົ້າ ຫຼືມີການຊຳລະເງິນຄ່ານ້ຳມັນເຊື້ອໄຟ ແຕ່ລາຄາໂຄງສ້າງພາຍໃນຍັງບໍ່ປັບຂຶ້ນເມື່ອທຽບກັບລາຄາໃນຕະຫຼາດໂລກ ເຮັດໃຫ້ບໍລິສັດ ຕ້ອງດຳເນີນທຸລະກິດໃນສະພາບຂາດທຶນ.
ອີກບັນຫາໜື່ງກໍແມ່ນ ຍ້ອນການຂາດແຄນເງິນຕາເນື່ອງຈາກ ການຈຳໜ່າຍນໍ້າມັນຢູ່ປ້ຳພາຍໃນເປັນເງິນກີບ, ແຕ່ການຊໍາລະຄ່ານໍ້າມັນຜູ້ສະໜອງຢູ່ຕ່າງປະເທດ ເປັນເງິນຕາ ຈຶ່ງເປັນສາເຫດໃຫ້ການນຳເຂົ້າ ນໍ້າມັນປະເຊີນກັບ ຄວາມຫຍຸ້ງຍາກ ແລະ ມີປະລິມານນຳເຂົ້າທີ່ຫຼຸດລົງ ຊຶ່ງນຳມາຈຳໜ່າຍໃຫ້ລູກຄ້າ ກໍມີປະລິມານຈໍາກັດລົງໄປນຳ ເປັນເຫດຜົນເຮັດໃຫ້ ບາງປໍ້ານໍ້າມັນເຊື້ອໄຟ ທີ່ບໍ່ໄດ້ຮັບການສະໜອງຈາກບໍລິສັດແມ່ໄດ້ພຽງພໍ ຈຶ່ງບໍ່ມີນໍ້າມັນເຊື້ອໄຟຂາຍ ຫຼື ໄດ້ຈຳໜ່າຍໝົດກ່ອນການສະໜອງ.
ປັດຈຸບັນ, ໂດຍການຕິດຕາມລາຄາສະເລ່ຍແຕ່ວັນທີ 26 ເມສາ – 5 ພຶດສະພາ 2022 ເຫັນວ່າ ລາຄາສະເລ່ຍນໍ້າມັນແອັດຊັງພິເສດແມ່ນ 134,51 ໂດລາ/ບາເຣວ (0.8459 ໂດລາ/ລິດ), ລາຄາສະເລ່ຍນໍ້າມັນແອັດຊັງທໍາມະດາ ແມ່ນ 130,42 ໂດລາ/ບາເຣວ (0.8202 ໂດລາ/ລິດ) ແລະ ລາຄາສະເລ່ຍນໍ້າມັນກາຊວນແມ່ນ 156,96 ໂດລາ/ບາເຣວ (0.9871 ໂດລາ/ລິດ). ນອກຈາກນັ້ນ, ເຫັນວ່າ ລາຄານໍ້າມັນກາຊວນ ຍັງສູງກວ່າລາຄານໍ້າມັນແອັດຊັງທໍາມະດາອີກ. ເມື່ອນໍາລາຄາສະເລ່ຍດັ່ງກ່າວມາຂ້າງເທິງນັ້ນ, ຄິດໄລ່ໂຄງປະກອບລາຄານໍ້າມັນເຊື້ອໄຟ ທີ່ປະກອບດ້ວຍ (1) ພາສີ, (2) ອາກອນຊົມໃຊ້ (ອກຊ), (3) ອາກອນມູນຄ່າເພີ່ມ (ອມພ), (4) ກອງທຶນບູລະນະທາງຫຼວງ (ກທ ທາງ), (5) ຄັງແຮ ແລະ (6) ລາຍຮັບ-ລາຍຈ່າຍຂອງພາກທຸລະກິດ (ຄ່າບໍລິການ) ບວກກັບການເໜັງຕີງຂອງອັດຕາແລກປ່ຽນເງິນຕາຕ່າງປະເທດ (ເງິນກີບອ່ອນຄ່າ) ເຮັດໃຫ້ລາຄາຂາຍຍ່ອຍນໍ້າມັນເຊື້ອໄຟທຸກຊະນິດຢູ່ປະເທດເຮົາເພີ່ມຂຶ້ນ.
ແນວໃດກໍຕາມ ລັດຖະບານກໍຄືກະຊວງອຸດສາຫະກໍາ ແລະ ການຄ້າ ໄດ້ເອົາໃຈໃສ່ຄົ້ນຄວ້າຮ່ວມກັບກະຊວງກ່ຽວຂ້ອງ ໂດຍສະເພາະກະຊວງການເງິນລາຍງານຂໍທິດຊີ້ນໍາຕໍ່ລັດຖະບານ ແລະ ລັດຖະບານ ໄດ້ລາຍງານຕໍ່ສະພາແຫ່ງຊາດ ຊຶ່ງຄະນະປະຈໍາສະພາແຫ່ງຊາດ ໄດ້ມີມະຕິ ສະບັບເລກທີ 103/ຄປຈ, ລົງວັນທີ 9 ພຶດສະພາ 2022 ເຫັນດີໃຫ້ຫຼຸດ ອາກອນຊົມໃຊ້ນໍ້າມັນແອັດຊັງທໍາມະດາລົງ ຈາກ 31% ມາເປັນ 16% ແລະ ຫຼຸດອາກອນຊົມໃຊ້ນໍ້າມັນກາຊວນລົງ ຈາກ 21% ມາເປັນ 11% ໂດຍລັດຖະບານ ກໍຄືກະຊວງອຸດສາຫະກໍາ ແລະ ການຄ້າ ໄດ້ຮີບຮ້ອນຜັນຂະຫຍາຍ ມະຕິດັ່ງກ່າວ ໃຫ້ທັນຈັດຕັ້ງປະຕິບັດລາຄານໍ້າມັນເຊື້ອໄຟ ເວລາ 14:00 ໂມງ ຂອງວັນທີ 10 ພຶດສະພາ 2022 (ເຮັດໃຫ້ລາຄານໍ້າມັນແອັດຊັງທໍາມະດາ ແລະ ນໍ້າມັນກາຊວນ ປັບລົງ ແທນທີ່ຈະປັບຂຶ້ນ, ທັງນີ້ກໍເພື່ອຊ່ວຍພາລະຂອງປະຊາຊົນ) ແລະ ຍັງຈະໄດ້ສືບຕໍ່ຄົ້ນຄວ້າຕື່ມ, ຖ້າລາຄາໃນຕະຫຼາດໂລກຍັງສືບຕໍ່ສູງຂຶ້ນ ກໍຈະໄດ້ສະເໜີປັບກອງທຶນບູລະນະທາງຫຼວງລົງຕື່ມ ຫຼື ຫຼຸດອາກອນລົງຕື່ມ ຖ້າຈໍາເປັນ; ສ່ວນເລື່ອງກອງທຶນນ້ຳມັນເຊື້ອໄຟນັ້ນ ຍັງຢູ່ໃນຂັ້ນຕອນ ການສັງລວມຂອງກະຊວງການເງິນ ແລະ ອາດຈະສາມາດນຳໃຊ້ພາຍໃນປີ 2022 ຫຼື ຕົ້ນປີ 2023.
ນອກຈາກນີ້ ບັນຫາການສະໜອງເງິນຕາຕ່າງປະເທດ ສຳລັບຈັດຊື້ນ້ຳມັນໃຫ້ບໍລິສັດນຳເຂົ້ານ້ຳມັນເຊື້ອໄຟ ເຫັນວ່າຂະແໜງການທະນາຄານ ກໍໄດ້ໃຫ້ບຸລິມາສິດແກ່ບໍລິສັດນຳເຂົ້ານ້ຳມັນເຊື້ອໄຟ ໂດຍເພີ່ມການສະໜອງເງິນຕາຈາກ 30% ເປັນ 40% ຂອງຄວາມຕ້ອງການ ແລະ ສືບຕໍ່ຊອກຫາແຫຼ່ງເງິນຕາເພີ່ມເຕີມ. ພ້ອມນັ້ນ, ກໍໄດ້ດັດສົມອັດຕາແລກປ່ຽນເງິນຕາຕ່າງປະເທດຂອງຮ້ານແລກປ່ຽນໃຫ້ມີຄວາມແຕກຕ່າງກັບທະນາຄານທຸລະກິດຂອງລັດ ໃຫ້ຫຼຸດລົງຕື່ມອີກ.
ຂໍ້ມູນ: ປະຊາຊົນ
