Target Magazine
ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ ໄດ້ຈັດພິທີເຊັນສັນຍາ ວ່າດ້ວຍການທົດລອງດຳເນີນທຸລະກິດຊັບສິນດີຈີຕອນ ລະຫວ່າງ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດີຈີຕອນ, ກຕສ ແລະ ທ່ານ ນາງ ວິພາພອນ ກອນສິນ ປະທານ ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ. ໂດຍການເຂົ້າຮ່ວມເປັນສັກຂີພິຍານຂອງ ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານນຳ.
ໃນພິທີ ທ່ານ ແກ້ວນະຄອນ ໄຊສຸລຽນ ໄດ້ກ່າວວ່າ: ປັດຈຸບັນ ການປະຕິວັດອຸດສາຫະກຳ ຄັ້ງທີ 4 ພວມເປັນທ່າອ່ຽງລວມ ແລະ ເປັນກະແສຟອງພັດຜ່ານໄປທົ່ວໂລກ. ໃນນັ້ນ Blockchain ຈຶ່ງເຮັດໃຫ້ການແລກປ່ຽນມູນຄ່າໃນຮູບແບບເອເລັກໂຕຣນິກສາມາດດໍາເນີນການຜ່ານລະບົບເຄືອຂ່າຍຄອມພີວເຕີ ຈຶ່ງເກີດມີທຸລະກໍາຊັບສິນດີຈີຕອນ ມີການສ້າງເງິນຄຣິບໂຕ ແລະ ຫຼຽນໂທເຄັນດີຈີຕອນ ຂຶ້ນມາຢ່າງຫຼວງຫຼາຍ ເພື່ອໃຊ້ໃນການຊື້-ຂາຍ ຫຼື ແລກປ່ຽນມູນຄ່ານໍາກັນ.
ສຳລັບປະເທດເຮົາ ແມ່ນມີທ່າແຮງທາງດ້ານພະລັງງານໄຟຟ້າ. ສະນັ້ນ, ຈຶ່ງເຫັນໄດ້ການນໍາໃຊ້ພະລັງງານໄຟຟ້າທີ່ຜະລິດອອກມານັ້ນໃຫ້ມີປະສີດທິຜົນ ເພື່ອສ້າງລາຍຮັບໃຫ້ປະເທດ ທັງສາມາດສ້າງຖານລາຍຮັບໃໝ່, ໝັ້ນຄົງ, ເປັນແຫຼ່ງລາຍຮັບທີ່ເປັນເງິນຕາ ຊຶ່ງສາມາດເພີ່ມຄັງແຮເງິນຕາຂອງລັດຖະບານ ແລະ ການດໍາເນີນທຸລະກິດດັ່ງກ່າວ. ລັດຖະບານ ແຫ່ງ ສປປ ລາວ ກໍຄືກະຊວງ, ຂະແໜງການທີ່ກ່ຽວຂ້ອງໄດ້ອອກລະບຽບການຄຸ້ມຄອງ, ຊຸກຍູ້ສົ່ງເສີມໃຫ້ຮັດກຸມ, ຖືກຕ້ອງຕາມກົດໝາຍ ແລະ ອໍານວຍຄວາມສະດວກໃຫ້ຜູ້ປະກອບການພາຍໃນປະເທດ.
ນອກຈາກນັ້ນໃນພິທີ, ບໍລິສັດ ລາວ ວີໄອພີ ພັດທະນາການລົງທຶນ ຈໍາກັດຜູ້ດຽວ ຍັງໄດ້ມອບພັນທະຄ່າລິຂະສິດໃບອະນຸຍາດດຳເນີນທຸລະກຳຂຸດຄົ້ນຊັບສິນດີຈີຕອນ ຈໍານວນ 500,000 ໂດລາ ໃຫ້ແກ່ລັດຖະບານ.
ແລະ ທາງບໍລິສັດ ໄດ້ມີນໍ້າໃຈປະກອບສ່ວນມອບເງິນສະໜັບສະໜູນໃຫ້ແກ່ກະຊວງເຕັກໂນໂລຊີ ແລະ ການສື່ສານ ຈໍານວນ 500,000,000 ກີບ ເພື່ອນໍາໃຊ້ເຂົ້າໃນການເຄື່ອນໄຫວວຽກງານຄຸ້ມຄອງການເຮັດທົດລອງຊັບສິນດີຈີຕອນ ຢູ່ ສປປ ລາວ.
ຂໍ້ມູນ ປະຊາຊົນ
