Target Magazine
ກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ຮ່ວມກັບ ພະແນກອຸດສາຫະກຳ ແລະ ການຄ້າ ແຂວງຄຳມ່ວນ ຈັດຝຶກອົບຮົມ ສ້າງຄວາມເຂັ້ມແຂງດ້ານການຄຸ້ມຄອງ ແລະ ຕິດຕາມໄມ້ສົ້ນເຂົ້າ ແລະ ສົ້ນອອກ ຢູ່ພະແນກອຸດສາຫະກຳ ແລະ ການຄ້າແຂວງຄຳມ່ວນ.
ໃນວັນທີ 15 ທັນວາ 2020 ເພື່ອສ້າງຄວາມເຂັ້ມແຂງໃນການຄຸ້ມຄອງ ແລະ ຕິດຕາມກວດກາໄມ້ ໃຫ້ແກ່ບຸກຄະລາກອນພະແນກອຸດສາຫະກຳ ແລະ ການຄ້າແຂວງ, ຫ້ອງການອຸດສາຫະກຳ ແລະ ການຄ້າເມືອງ ແລະ ຜູ້ປະກອບການໂຮງງານປຸງແຕ່ງໄມ້ພາຍໃນແຂວງ ເພື່ອນຳບົດຮຽນດັ່ງກ່າວໄປຈັດຕັ້ງປະຕິບັດໃຫ້ມີປະສິດທິພາບສູງ.
ຊຸດອົບຮົມຄັ້ງນີ້, ໄດ້ສະເໜີຂໍ້ຕົກລົງຂອງກະຊວງອຸດສາຫະກຳ ແລະ ການຄ້າ ສະບັບເລກທີ 0777/ອຄ.ກອຫ ລົງວັນທີ 25 ສິງຫາ 2020 ວ່າດ້ວຍການຄຸ້ມຄອງ, ຕິດຕາມໄມ້ສົ້ນເຂົ້າ ແລະ ສົ້ນອອກ ໂດຍຂໍ້ຕົກລົງແມ່ນໄດ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມ ແລະ ກວດກາ ໄມ້ສົ້ນເຂົ້າ ແລະ ສົ້ນອອກ ຂອງຜູ້ດຳເນີນທຸລະກິດໄມ້ ເພື່ອຄຸ້ມຄອງການນຳໃຊ້ໄມ້ຢ່າງມີປະສິດທິຜົນ ແລະ ຖືກຕ້ອງຕາມລະບຽບກົດໝາຍ ແນໃສ່ສົ່ງເສີມການຊົມໃຊ້ຊັບພະຍາກອນໄມ້ໃຫ້ມີຄວາມຍືນຍົງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕາມທິດຫັນເປັນອຸດສາຫະກຳທັນສະໄໝ ແລະ ຍືນຍົງ.
ພ້ອມນັ້ນຍັງໄດ້ນຳສະເໜີກ່ຽວກັບບົດຮຽນໃນການຄຸ້ມຄອງຕ່ອງໂສ້ການສະໜອງໄມ້, ຕິດຕາມ, ກວດກາໄມ້ສົ້ນເຂົ້າ ແລະ ສົ້ນອອກພາຍໃນໂຮງງານປຸງແຕ່ງໄມ້ທີ່ແຂວງອັດຕະປື ແລະ ບົດຮຽນໃນການຄຸ້ມຄອງຢູ່ແຂວງຄຳມ່ວນ.
ເຂົ້າຮ່ວມໃນພິທີຄັ້ງນີ້, ມີ ທ່ານ ຄຳນ້ອຍ ຈັນເພັງໄຊ ຮອງຫົວໜ້າກົມອຸດສາຫະກຳ ແລະ ຫັດຖະກຳ, ທ່ານ ວັນທອນ ບຸດສົມພັນ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຄຳມ່ວນ, ພ້ອມດ້ວຍບັນດາກົມ, ຕາງໜ້າພະແນກອຸດສາຫະກຳ ແລະ ການຄ້າແຂວງອັດຕະປື, ຕົວແທນຈາກສະຫະພາບເອີຣົບ, ຕົວແທນຈາກບັນດາອົງການກ່ຽວຂ້ອງ, ຫ້ອງການອຸດສາຫະກຳ ແລະ ການຄ້າເມືອງ ຕະຫລອດເຖິງຜູ້ປະກອບການໂຮງງານປຸງແຕ່ງໄມ້ເຂົ້າຮ່ວມ.
ແຫຼ່ງຂໍ້ມູນ: ແຂວງຄຳມ່ວນ
