Target Magazine
ກອງທຶນສົ່ງເສີມ SME ສະໜອງທຶນ ຈຳນວນ 2,52 ຕື້ກີບ ເພື່ອປ່ອຍສິນເຊື່ອ ແລະ ຄໍ້າປະກັນສິນເຊື່ອໃຫ້ ຈຸນລະວິສາຫະກິດ
ໃນຕອນບ່າຍຂອງວັນທີ 03 ທັນວາ 2020, ທີ່ ກະຊວງອຸດສາຫະກຳ ແລະ ການຄ້າ ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ໄດ້ຈັດພິທີເຊັນສັນຍາສະໜອງທຶນຂຶ້ນ ລະຫວ່າງ ທສວ ກັບ ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ທສວ ກັບ 04 ສະຖາບັນການເງິນຈຸລະພາກ ຄື: ສະຖາບັນການເງິນຈຸລະພາກທີ່ຮັບຝາກເງິນ ປະຕູຄໍາ, ສະຖາບັນການເງິນຈຸລະພາກທີ່ບໍ່ຮັບຝາກເງິນ ເນັກ, ສະຖາບັນການເງິນຈຸລະພາກທີ່ບໍ່ຮັບຝາກເງິນ ເພື່ອການພັດທະນາ ແລະ ສົ່ງເສີມທຸລະກິດ (BDP) ແລະ ສະຖາບັນການເງິນຈຸລະພາກທີ່ບໍ່ຮັບຝາກເງິນ ໄຊອຸດົມ ໂດຍການເຂົ້າຮ່ວມເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ປະທານສະພາບໍລິຫານ ທສວ ພ້ອມດ້ວຍແຂກທີ່ຖືກເຊີນຈາກທັງພາກລັດ ແລະ ພາກທຸລະກິດ.
ການເຊັນສັນຍາສະໜອງທຶນກັບສະພາການຄ້າ ແລະ ອຸດສາຫະກໍາແຫ່ງຊາດລາວ ແມ່ນເພື່ອສະໜອງທຶນສະສົມຂອງ ທສວ ຈຳນວນ 500 ລ້ານກີບ ສົມທົບເຂົ້າໃນກອງທຶນນາງຟ້າ ເພື່ອຈັດຕັ້ງການຄໍ້າປະກັນສິນເຊື່ອກັບທະນາຄານທຸລະກິດໃຫ້ຈຸນລະວິສາຫະກິດທີ່ບໍ່ມີຫລັກຊັບຄໍ້າປະກັນທີ່ພຽງພໍ ຊຶ່ງລາຍລະອຽດໃນການຈັດຕັ້ງປະຕິບັດແມ່ນມີລະບຽບການສະເພາະ ທີ່ກຳນົດໂດຍ ສະພາການຄ້າ ແລະ ອຸດສາຫະກຳແຫ່ງຊາດລາວ.
ສໍາລັບເຊັນສັນຍາສະໜອງທຶນກັບ 04 ສະຖາບັນການເງິນຈຸນລະພາກ ທີ່ຜ່ານເງື່ອນໄຂຂອງ ທສວ ເພື່ອສະໜອງທຶນໄລຍະຍາວໃຫ້ ສະຖາບັນການເງິນຈຸລະພາກ ນຳໄປປ່ອຍສິນເຊື່ອໃຫ້ ຈຸນລະວິສາຫະກິດ ກຸ່ມຜູ້ຜະລິດ ທີ່ຕ້ອງການທຶນເພື່ອນໍາໄປປັບປຸງ, ປ່ຽນຖ່າຍ ແລະ ຈັດຊື້ເຄື່ອງຈັກ, ເຄື່ອງມື ແລະ ອຸປະກອນຮັບໃຊ້ການຜະລິດ ພ້ອມນັ້ນເພື່ອສະ ໜອງທຶນໝູນວຽນ ດ້ວຍວິທີການທີ່ສະດວກວ່ອງໄວ ສາມາດສະໜອງທຶນໝູນວຽນໃນເວລາ ຫຼື ລະດູການທີ່ຈຸນລະວິສາຫະກິດມີຄວາມຈໍາເປັນນໍາໃຊ້ທຶນເພື່ອຊື້້ວັດຖຸດິບ, ຈ່າຍຄ່າແຮງງານ ແລະ ປັດໄຈນໍາເຂົ້າທີ່ຈໍາເປັນເພື່ອຮັບໃຊ້ການຜະລິດ. 04 ສະຖາບັນການເງິນ ທີ່ເຊັນສັນຍາໃນມື້ນີ້ ຈະໄດ້ຮັບເງິນທຶນຈາກ ທສວ ສະຖາບັນລະ 545 ລ້ານກີບ, ໃນນັ້ນ 505 ລ້ານກີບ ເປັນສິນເຊື່ອ ແລະ 40 ລ້ານ ເປັນທຶນຊ່ວຍເຫຼືອວິຊາການ.
ຈຸນລະວິສາຫະກິດ ທີ່ຈະຂໍກູ້ຢືມເງິນຕ້ອງເປັນຈຸນລະວິສາຫະກິດ ທີ່ກຳນົດໃນດຳລັດວ່າດ້ວຍການຈັດແບ່ງຂະໜາດ ວິສາຫະກິດຂະໜາດນ້ອຍ ແລະ ກາງ ສະບັບເລກທີ 25/ລບ, ລົງວັນທີ 17 ມັງກອນ 2017 ຫຼື ເປັນຜູ້ປະກອບກິດຈະການທີ່ບໍ່ທັນໄດ້ຂຶ້ນທະບຽນວິສາຫະກິດ ແຕ່ມີແຮງງານສະເລ່ຍໃນປີບໍ່ເກີນ 5 ຄົນ ຫຼື ເປັນກຸ່ມຜູ້ຜະລິດ, ສະຫະກອນ ທີ່ນອນໃນຂະແໜງບູລິມະສິດ ດັ່ງນີ້:
- ຂະແໜງກະສິກຳປູກຝັງ ແລະ ລ້ຽງສັດ;
- ຂະແໜງຫັດຖະກຳ;
- ຂະແໜງອຸດສາຫະກໍາປຸງແຕ່ງ ຜະລິດຕະພັນກະສິກຳ;
- ຂະແໜງການຄ້າ ທີ່ປິ່ນອ້ອມ 3 ຂະແໜງການຂ້າງເທິງ;
- ຂະແໜງການບໍລິການ.
ເພດານ ການປ່ອຍສິນເຊື່ອ ໃຫ້ ຈຸນລະວິສາຫະກິດ ແມ່ນບໍ່ເກີນ 50 ລ້ານກີບຕໍ່ສັນຍາ ອັດຕາດອກເບ້ຍບໍ່ເກີນ 1% ຕໍ່ເດືອນ. ສໍາລັບຂັ້ນຕອນການພິຈາລະນາ ແລະ ອະນຸມັດສິນເຊື່ອໃຫ້ ຈຸນລະວິສາຫະກິດນັ້ນແມ່ນມອບໃຫ້ເປັນໜ້າທີ່ ແລະ ຄວາມຮັບຜິດຊອບຂອງສະຖາບັນການເງິນຈຸລະພາກ, ກອງທຶນສົ່ງເສີມ SME ຈະເຮັດໜ້າທີ່ຕິດຕາມ, ປະເມີນຜົນ ແລະ ແນະນໍາສະຖາບັນການເງິນ ເພື່ອຮັບປະກັນວ່າການນໍາໃຊ້ແຫຼ່ງທຶນດັ່ງກ່າວສອດຄ່ອງກັບຈຸດປະສົງ ແລະ ເປົ້າໝາຍທີ່ທາງກອງທຶນກໍານົດໄວ້ເທົ່ານັ້ນ.
ແຫຼ່ງຂໍ້ມູນ: ສະພາການຄ້າ
