Target Magazine
ຕາມແຫລ່ງຂ່າວຈາກ ວໍຊີງຕັນ, ວັນທີ 26 ສິງຫານີ້, ສາຍການບິນ ອາເມລິກາ ແອລາຍ ຈະປັບຫລຸດ ພະນັກງານ 30% ຫລື 40.000 ຕຳແໜ່ງ ໃນເດືອນຕຸລາ ໂດຍ 19.000 ຕຳແໜ່ງ ຈະຖືກເຊົາຈ້າງ ໂດຍບໍ່ສະໝັກໃຈ ເວັ້ນແຕ່ວ່າລັດຖະບານຈະໃຫ້ຄວາມຊ່ວຍເຫລືອ ກ່ຽວກັບການຈ້າງ ພະນັກງານ ເນື່ອງຈາກການລະບາດຂອງ ໂຄວິດ-19 ຍັງມີຜົນຕໍ່ການເດີນທາງ ທາງອາກາດ.
ສາຍການບິນຕ່າງໆ ໄດ້ຮັບເງິນສະໜັບສະໜູນ ຕາມມາດຕະການກະຕຸ້ນເສດຖະກິດຂອງລັດຖະບານ ສ.ອາເມລິກາ ຈຳນວນ 25 ຕື້ໂດລາສະຫະລັດ ເພື່ອຊ່ວຍເຫລືອການຈ່າຍເງິນເດືອນ ແລະ ຮັກສາຕຳແໜ່ງໄປຈົນເຖິງເດືອນກັນຍານີ້, ແຕ່ເມື່ອເງິນໝົດລົງ ໂດຍທີ່ການເດີນທາງຍັງບໍ່ມີການຟື້ນຕົວ ບັນດາສາຍການບິນ ແລະ ສະຫະພາບແຮງງານ ຈຶ່ງຮ້ອງຂໍເງິນອີກ 25 ຕື້ໂດລາສະຫະລັດ ປັດຈຸບັນ ໃນຂັ້ນຕອນການເຈລະຈາທັງສອງຝ່າຍ.
ການປັບຫລຸດຕຳແໜ່ງງານ ຕາມແຜນຂອງອາເມລິກາແອລາຍ ປະກອບດ້ວຍພະນັກງານໃນຕຳແໜ່ງ ບໍລິຫານ 1.500 ຕຳແໜ່ງ ແລະ ພະນັກງານ ສະຫະພາບແຮງງານ 17.500 ຕຳແໜ່ງ ລວມມີ ພະນັກງານ ນັກບິນ 1.600 ຕຳແໜ່ງ ແລະ ພະນັກງານ ຕ້ອນຮັບ ເທິງເຮືອບິນອີກ 8.100 ຕຳແໜ່ງ ໂດຍຈຳນວນຕຳແໜ່ງທີ່ປັບຫລຸດລົງ ຍັງຕ່ຳກວ່າເປົ້າໝາຍທີ່ອາເມລິກາແອລາຍຕັ້ງໄວ້ ເມື່ອເດືອນກ່ອນ 25.000 ຕຳແໜ່ງ ເນື່ອງຈາກ ພະນັກງານບາງສ່ວນ ອອກບຳນານກ່ອນອາຍຸກຳນົດ ແລະ ລາອອກ.
ແຫຼ່ງຂໍ້ມູນ: http://kpl.gov.la/detail.aspx?id=53983
