ແຜນປັບປຸງ ຄວາມສະດວກໃນການດໍາເນີນທຸລະກິດ ການຄ້າລະຫວ່າງປະເທດ ຕາມຄໍາສັ່ງ ເລກທີ 02/ນຍ

ອີງຕາມ ບົດລາຍງານ ສະພາບຄວາມຍາກງ່າຍໃນການດໍາເນີນທຸລະກິດໃນ ສປປ ລາວ 2020 (Doing Business 2020) ໄດ້ສະແດງໃຫ້ເຫັນວ່າ ສປປ ລາວ ມີຄວາມຍາກງ່າຍທາງດ້ານ ການຄ້າລະຫວ່າງປະເທດ ແມ່ນຖືກຈັດຢູ່ໃນອັນດັບທີ່ 78 ໃນ 190 ປະເທດທົ່ວໂລກ. ເພື່ອເປັນການສືບຕໍ່ຈັດຕັ້ງປະຕິບັດຕາມ ຄໍາສັ່ງ ທ່ານ ນາຍົກລັດຖະມົນຕີ ວ່າດ້ວຍການປັບປຸງລະບຽບການ ແລະ ກົນໄກການປະສານງານໃນການດໍາເນີນທຸລະກິດໃນ ສປປ ລາວ ເລກທີ 02/ນຍ, ລົງວັນທີ 01 ກຸມພາ 2018, ກົມການນຳເຂົ້າ ແລະ ສົ່ງອອກ ໄດ້ປຶກສາຫາລື ແລະ ເປັນເອກະພາບກັບ ກົມກ່ຽວຂ້ອງ ຄື: ກົມພາສີ, ກົມຄຸ້ມຄອງບໍ່ແຮ່, ກົມອຸດສາຫະກໍາ ແລະ ກົມຂົນສົ່ງ ເພື່ອກຳນົດແຜນປັບປຸງຕົວຊີ້ວັດທີ 8 ການຄ້າລະຫວ່າງປະເທດ ແຕ່ນີ້ຮອດປີ 2022.

ການປັບປຸງສະພາບຄວາມຍາກງ່າຍໃນການດໍາເນີນທຸລະກິດ ໂດຍສະເພາະຕົວຊີ້ວັດທີ່ 8 ແມ່ນມີຈຸດປະສົງເພື່ອອໍານວຍຄວາມສະດວກທາງດ້ານການຄ້າ ໂດຍສ່ວນໃຫຍ່ແມ່ນຕິດພັນກັບຂັ້ນຂອດ-ຂັ້ນຕອນ ຂອງເອກະສານ ແລະ ການດຳເນີນການຢູ່ດ່ານພາສີຊາຍແດນ ເຊິ່ງຈະວັດລະດັບຄວາມຍາກງ່າຍຂອງການຄ້າລະຫວ່າງປະເທດ ທີ່ຕິດພັນກັບສາມຂອບເຂດຄື: ຂອບເຂດທີ່ໜຶ່ງແມ່ນ ຄວາມຖືກຕ້ອງຂອງເອກະສານ ໝາຍເຖິງ ການຄຸ້ມຄອງການຂົນສົ່ງ, ການຮັບເອກະສານ, ການກະກຽມ ແລະ ການຍື່ນເອກະສານເພື່ອການຂົນສົ່ງ, ການເກັບກູ້, ການກວດກາ ທີ່ຢູ່ ທ່າເຮືອ ຫລື ເຂດຊາຍແດນ. ຂອບເຂດທີ່ສອງແມ່ນ ຄວາມສອດຄ່ອງກັບລະບຽບການດ້ານຊາຍແດນ ໝາຍເຖິງການກວດກາພາສີ ແລະ ການກວດກາໂດຍອົງການອື່ນໆ ເພື່ອຄຸ້ມຄອງ ແລະ ການກວດກາການຈັດຕັ້ງປະຕິບັດທີ່ເກີດຂື້ນຢູ່ທ່າເຮືອເສດຖະກິດ ຫລື ຊາຍແດນ. ຂອບເຂດທີ່ສາມແມ່ນ ການຂົນສົ່ງພາຍໃນປະເທດ ແມ່ນໝາຍເຖິງການຍົກຍ້າຍ ຫລື ບໍ່ໄດ້ຍົກຍ້າຍສິນຄ້າ ທີ່ເກັບໃວ້ຢູ່ສາງ ຫລື ທ່າເຮືອ/ຊາຍແດນ ແລະ ຄວາມຫລ້າຊ້າໃນເວລາຂົນສົ່ງທາງບົກເນື່ອງຈາກ ການສັນຈອນທີ່ຕິດຂັດ ແລະ ການກວດກາຕາມເສັ້ນທາງຂອງ ຕຳຫຼວດຈາລະຈອນ.

ກະຊວງອຸດສາຫະກໍາ ແລະ ການຄ້າ ໃນນາມ ກອງເລຂາຄະນະກຳມະການອຳນວຍຄວາມສະດວກທາງດ້ານການຄ້າ (ກຄອຄ) ໄດ້ເປັນເຈົ້າການ ປະສານສົມທົບກັບຂະແໜງການທີ່ກ່ຽວຂ້ອງ ເພື່ອກຳນົດແຜນການລະອຽດໃນການ ປັງປຸງນິຕິກຳ ແລະ ກິດຈະກຳບູລິມະສິດ ທີ່ຕິດພັນກັບຕົວຊີ້ວັດການຄ້າລະຫວ່າງປະເທດ ໃນບົດສຳຫຼວດຄວາມຍາກງ່າຍຂອງການດຳເນີນທຸລະກິດ (Ease of Doing Business / EDB) ຂອງທະນາຄານໂລກ ຄື: ການນຳເຂົ້າຊິ້ນສ່ວນຍານພາຫະນະເພື່ອມາປະກອບຢູ່ໂຮງງານ ແລະ ການສົ່ງອອກແຮ່ທາດ.  ເປົ້າໝາຍຂອງການຈັດຕັ້ງປະຕິບັດແຜນດັ່ງກ່າວແມ່ນ ໃຫ້ສາມາດບັນລຸຕາມເປົ້າໝາຍ ພາຍໃນປີ 2022 ກໍຄື ຫຼຸດຜ່ອນເວລາໃນການນຳເຂົ້າ-ສົ່ງອອກສິນຄ້າ ລົງ 50% ແລະ ຄ່າໃຊ້ຈ່າຍ ລົງ 30%.

ລາຍລະອຽດ ກ່ຽວກັບ ແຜນວຽກປັບປຸງຕົວຊີ້ວັດທີ່ 8 ການຄ້າລະຫວ່າງປະເທດ ສໍາລັບ ສປປ ລາວ ໄລຍະ ປີ 2020-2022.

ແຫຼ່ງຂໍ້ມູນເພີ່ມເຕີບ:  ບົດລາຍງານ ສະພາບຄວາມຍາກງ່າຍໃນການດໍາເນີນທຸລະກິດໃນ ສປປ ລາວ 2020 (Doing Business 2020)