ວຽກງານການຕ້ານສະກັດກັ້ນການຟອກເງິນ ແມ່ນວຽກງານໜຶ່ງ ທີ່ມີຄວາມສຳຄັນຕໍ່ສະພາບການດຳເນີນທຸລະກິດໃນປະເທດ ເພາະວ່າ ຖ້າປະເທດເຮົາບໍ່ສາມາດຈັດຕັ້ງປະຕິບັດເງື່ອນໄຂມາດຖານ 40 ຂໍ້ແນະນໍາຂອງສາກົນວາງອອກໄດ້ ກໍ່ຈະເຮັດໃຫ້ສາກົນຂຶ້ນບັນຊີເປັນສີເທົາ ແລະຈະເຮັດໃຫ້ ສປປ ລາວ ພົບຄວາມຫຍຸ້ງຍາກຫຼາຍດ້ານເຊັ່ນ: ລະບົບໃນການຊໍາລະເງິນກັບສາກົນຖືກຈຳກັດ, ບໍ່ສາມາດໂອນເງິນໄປຊໍາລະຄ່າສິນຄ້າ-ບໍລິການ, ເຮັດໃຫ້ສົ່ງຜົນກະທົບຕໍ່ພາບພົດຊື່ສຽງຂອງປະເທດເຮົາ ເປັນຕົ້ນ ທາງດ້ານການເມືອງ ກໍ່ຈະຕົກເປັນປະເທດມີຄວາມສ່ຽງສູງໃນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ດ້ານເສດຖະກິດກໍ່ຖືກຈໍາກັດ ພ້ອມທັງການລົງທຶນຈາກຕ່າງປະເທດກໍ່ຫຼຸດລົງ.
ສະນັ້ນ, ເພື່ອເປັນການຫຼຸດຜ່ອນ ແລະ ສະກັດກັ້ນຕ້ານການຟອກເງິນ ເຮົາທຸກຄົນກໍຄວນຮັບຮູ້ໄວ້ ແລະ ເປັນຫູເປັນຕາ ຊ່ວຍກັນສະກັດກັ້ນບັນຫາດັ່ງກ່າວ ແລະ ລາຍງານໃຫ້ເຈົ້າໜ້າທີ່ພາກສ່ວນທີ່ກ່ຽວຂ້ອງ.
ການຟອກເງິນ ແມ່ນການນຳເອົາເງີນທີ່ເປື້ອນ ໃຫ້ມາເປັນເງີນທີ່ສະອາດ, ການຟອກເງິນແມ່ນການນຳເງິນມາປ່ຽນຮູບການນຳໃຊ້, ເຄື່ອນຍ້າຍ, ແລກປ່ຽນ, ໄດ້ມາ, ຄອບຄອງ, ໂອນກຳມະສິດທີ່ແທ້ຈິງຂອງເງິນ ຫຼື ຊັບສິນອື່ນທີ່ບຸກຄົນ,ນິຕິບຸກຄົນ ຫຼື ການຈັດຕັ້ງໂດຍທີ່ຮູ້, ໄດ້ຮູ້ ຫຼື ສົງໃນວ່າເງີນ ຫຼື ຊັບສິນນັ້ນມາຈາກການກະທຳຜິດຕົ້ນ ເພື່ອປົກປິດ ຫຼື ບຸກເຊື່ອງຄຸນລັກສະນະ,ທີ່ມາຂອງເງິນ,ທີ່ຕັ້ງຂອງຊັບສິນ ເພື່ອເຮັດໃຫ້ເງິນ ຫຼື ຊັບສິນດັ່ງກ່າວຖືກຕ້ອງຕາມກົດໝາຍ.
ສະຫຼຸບງ່າຍໆກໍຄື ການເອົາເງິນທີ່ໄດ້ມາແບບບຜິດກົດໝາຍ ມາດຳເນີນງານຕ່າງໆ ເພື່ອໃຫ້ກາຍເປັນເງິນ ຫຼື ຊັບສິນທີ່ຖືກົດໝາຍ ເພື່ອປົກປິດແຫຼ່ງທີ່ມາຂອງເງິນດັ່ງກ່າວ.
ການຟອກເງິນເປັນການກະທຳຜິດທາງອາຍາ ມາດຕາ 66 ມາດຕະການທາງອາຍາ ຕໍ່ການຟອກເງິນ ໃນກົດໝາຍວ່າດ້ວຍການຕ້ານສະກັດກັ້ນ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ລກທີ 50/ສພຊ ລົງວັນທີ 21 ກໍລະກົດ 2014
- ບຸກຄົນທີ່ໄດ້ກະທຳຜິດໃນສະຖານການຟອກເງິນທີ່ມີມູນຄ່າຕໍ່າກວ່າ 1 ຕື້ກີບ ຈະຖືກລົງໂທດຕັດອິດສະຫຼະພາບແຕ່ 3 ປີ – 7 ປີ ແລະ ຈະຖືກປັບໃໝແຕ່ 300 ລ້ານ – 500 ລ້ານກີບ ແລະ ຈະຖືກຮິບຊັບ
- ກໍລະນີກະທຳຜິດທີ່ມີມູນຄ່າແຕ່ 1 ຕື້ກີບ ຂຶ້ນໄປ ຈະຖືກລົງໂທດຕັດອິດສະຫຼະພາບແຕ່ 7 ປີ- 10 ປີ ແລະ ຈະຖືກປັບໃໝແຕ່ 500 ລ້ານ – 700 ລ້ານກີບ ແລະ ຈະຖືກຮິບຊັບ
- ໃນກໍລະນີ ຈັດຕັ້ງເປັນກຸ່ມກ້ອນ ຫຼື ມີການກະທຳຜິດເປັນອາຈິນ ຈະຖືກຕັດອິດສະຫຼະພາບ 10 ປີ – 15 ປີ ແລະ ຈະຖືກປັບໃໝ 700-900 ລ້ານກີບ ແລະຈະຖືກຮີບຊັບ.
https://www.bol.gov.la/fileupload/05-12-2018_1543972838.pdf