Target Magazine
ຮູບເງົາ “ດອກຈຳປາບານ ” ໄດ້ເປີດສາຍເປັນຮອບປະຖົມມະເລິກແລ້ວ ໃນມື້ວານນີ້ ຄືຮອບສື່ມວນຊົນ ໃນວັນທີ 18 ກັນຍາ 2019 ຢູ່ທີ່ໂຮງຮູບເງົາເມເຈີ້ ສາຂາວຽງຈັນເຊັນເຕີ້, ພ້ອມທັງຈະເປີດສາຍໃນທຸກໂຮງຮູບໃນທົ່ວປະເທດ ໃນວັນທີ 19 ກັນຍາ 2019 ກໍຄືມື້ນີ້ນັ້ນເອງ…ໃຜທີ່ຕິດຕາມ ແລະ ລໍຖ້າຊົມຢູ່ກໍຢ່າລືມໄປຊົມ, ໄປໃຫ້ກໍາລັງໃຈຜົນງານການສ້າງ ແລະ ການສະແດງຂອງຄົນລາວເຮົາໄດ້.
ຮູບເງົາ “ດອກຈໍາປາບານ” ເປັນຮູບເງົາເລື່ອງທໍາອິດທີ່ຮ່ວມມືກັນສ້າງລະຫວ່າງ 2 ປະເທດຄື: ສປປ ລາວ ແລະ ສປ ຈີນ ໂດຍມີຈຸດປະສົງຄື ເພື່ອເປັນການສະເຫຼີມສະຫຼອງວັນສ້າງຕັ້ງສະຖານທຸດຈີນປະຈໍາລາວຄົບຮອບ 55 ປີ.
ທ່ານ ວິທູນ ສູນດາຣາ ຫົວໜ້າກົມຮູບເງົາ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ
ເນື້ອເລື່ອງລາວໄດ້ພັນລະນາເຖິງຄວາມຮັກ ແລະ ຄວາມຜູກພັນຂອງປະຊາຊົນລາວຈີນຕັ້ງແຕ່ສະໄໝທີ່ປະເທດລາວຖືກຮຸກຮານ, ການລໍຄອຍຄົນຮັກທີ່ພັດພາກຈາກກັນຕັ້ງແຕ່ສະໄໝສົງຄາມ, ພ້ອມທັງສະແດງໃຫ້ເຫັນເຖິງວັດທະນະທໍາ, ຮີດຄອງປະເພນີ ແລະ ທໍາມະຊາດອັນງົດງາມຂອງສອງປະເທດກໍຄື ລາວ-ຈີນ.
ຮ່ວມຖ່າຍທອດເລື່ອງລາວຂອງຮູບເງົາປະຫວັດສາດຄັ້ງນີ້ສະແດງນຳໂດຍ ໝໍແນ່ງ ຈັນດາລີ (ນາງເອກ) ຮ່ວມກັບນັກຈະແດງຊື່ດັງຈາກປະເທດຈີນຫຼາກຫຼາຍທ່ານເຊັ່ນ: Mr. Zhiluo Ma , Mr. Haozhen Wang, Miss Xinhua Chen, Mr. Liming, Mr. Xiaorui Zhao, ເຊິ່ງ ຂຽນບົດໂດຍ Mr. Wei Zhou, Mr. Weiting Liu ແລະ ຜູ້ກຳກັບໂດຍ Mr. Tao Jin, Mr. Quanwei Liu
ເຮັດໃຫ້ຮູບເງົາເລື່ອງນີ້ ອອກມາໄດ້ຢ່າງສົມບູນ ແລະ ນ່າຫຼົງໄຫຼ ໂດຍມີທັງສາກທີ່ເຮັດໃຫ້ຍິ້ມຕາມ, ມີສາກທີ່ເຮັດໃຫ້ເສົ້າຈົນນໍ້າຕາໄຫຼໄປນໍາ ແລະ ສາກທີ່ເຮັດໃຫ້ຂົນໜາວລຸກ ທີ່ສື່ເຖິງວັດທະນະທຳ ແລະ ສະຖານທີ່ທ່ອງທ່ຽວຂອງລາວ.
ທ້າຍນີ້ຢາກຝາກເຖິງທຸກຄົນວ່າ ຢາກໃຫ້ຮ່ວມກັນສະໜັບສະໜູນສີມືການສະແດງຂອງຄົນລາວ, ສະໜັບສະໜູນວົງການຮູບເງົາລາວ ດ້ວຍການເບິ່ງຮູບເງົາຂອງຄົນລາວເອງ ທັງນີ້,ກໍເພື່ອເປັນກຳລັງໃຈ ໃຫ້ກັບນັກສະແດງ ແລະ ທີມງານທຸກຄົນ ໃຫ້ກັບມາສ້າງສັນຜົນງານດ້ານຮູບເງົາລາວ ໃຫ້ກັບຄົນລາວເຮົາໄດ້ມ່ວນຊື່ນ ໄດ້ຊົມເລື້ອຍໆ. ເພາະບໍ່ໄດ້ເປັນການສະໜັບສະໜູນນັກສະແດງແລະ ທີມງານເທົ່ານັ້ນ ຍັງເປັນໂຄສະນາສະຖານທ່ອງທ່ຽວ ແລະ ວັດທະນະທຳຕ່າງໆຂອງປະເທດລາວເຮົາ ທີ່ຢາກໃຫ້ຄົນຕ່າງຊາດໄດ້ເຫັນແລ້ວຢາກມາທ່ອງທ່ຽວເມືອງລາວ.
