Target Magazine
ໂດຍປະຕິບັດຕາມແນວທາງນະໂຍບາຍຂອງພັກ ແລະ ລັດຖະບານ ກ່ຽວກັບການສົ່ງເສີມ ແລະ ນຳໃຊ້ສິນຄ້າກໍຄືຜົນຜະລິດພາຍໃນປະເທດ.
ໃນຕອນເຊົ້າຂອງວັນທີ 10 ພຶດສະພາ 2019, ຢູ່ທີ່ບໍລິສັດເບຍລາວ ຈຳກັດ ໄດ້ຈັດໃຫ້ພິທີເຊັນສັນຍາຊື້-ຂາຍເຂົ້າຈ້າວ ລະຫວ່າງ ບໍລິສັດເບຍລາວ ຈຳກັດ ກັບ ສະມາຄົມເຂົ້າລາວ ນະຄອນຫຼວງວຽງຈັນ, ເພື່ອເປັນການສົ່ງເສີມຊາວນາລາວດ້ວຍການຊື້ເຂົ້າທີ່ຜະລິດພາຍໃນປະເທດມາເປັນວັດຖຸດິບໃຫ້ແກ່ການຜະລິດເບຍ.
ໃນປັດຈຸບັນນີ້, ບໍລິສັດເບຍລາວຈຳກັດແມ່ນມີຄວາມຕ້ອງການເຂົ້າຈ້າວເມັດຫັກເພື່ອມາເປັນສ່ວນປະກອບເຂົ້າໃນການຜະລິດເບຍປີໜຶ່ງປະມານ 20,000 ໂຕນ.
ສະເພາະ, ໃນມື້ນີ້ບໍລິສັດແມ່ນຈະໄດ້ເຮັດພິທີເຊັນສັນຍາຊື້ເຂົ້າກັບສະມາຄົມເຂົ້າລາວນະຄອນຫຼວງວຽງຈັນຈຳນວນ 6.500 ໂຕນ ນັບແຕ່ວັນທີ 1 ພຶດສະພາ ຫາ ເດືອນຕຸລາ 2019 ລວມມູນຄ່າ 21.5 ຕື້ກັບ , ຖ້າລວມກັນກັບການເຊັນສັນຍາກັບຜູ້ສະໜອງອີກລາຍໜຶ່ງທີ່ແຂວງຈຳປາສັກຈຳນວນ 1.400 ໂຕນກໍລວມເປັນທັງໝົດ 7.900 ໂຕນ, ມູນຄ່າທັງໝົດປະມານ 26.2 ຕື້ກີບ.
ເຂົ້າຮ່ວມໃນພິທີເຊັນສັນຍາດັ່ງກ່າວຕາງໜ້າໃຫ້ບໍລິສັດເບຍລາວໃນການເຊັນສັນຍາແມ່ນ ທ່ານ ເຮັນຣິກແອນເດີຊັນ (Henrik Andersen) ຜູ້ອຳນວຍການ ບໍລິສັດເບຍລາວຈຳກັດ, ສ່ວນຕາງໜ້າໃຫ້ສະມາຄົມເຂົ້າລາວນະຄອນຫຼວງວຽງຈັນແມ່ນ ທ່ານ ນາງ ຈັນເພັງ ແສງທະວີ, ທ່ານ ນາງ ທິບເກສອນ ໂພທິຍາໄລ ແລະ ທ່ານນາງ ວະນິດາ ທົງມະນີຈັນ ໂດຍມີ ທ່ານວິໄລສຸກ ເຄນນະວົງ, ຫົວໜ້າກົມປູກຝັງກະຊວງກະສິກຳ ແລະ ປ່າໄມ້, ທ່ານ ປອ ຫຼ້າສາຍ ນວນທະສິງ ຫົວໜ້າ ພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ, ທ່ານວາດສະໜາສີຈະເລີນຮອງຫົວໜ້າພະແນກກະສິກຳແລະປ່າໄມ້ນະຄອນຫຼວງວຽງຈັນທ່ານສູນທອນພົມມະຈັກ, ປະທານບໍລິສັດເບຍລາວຈຳກັດ, ທ່ານ ສູນທອນ ສີຣິສັກ ຮອງຜູ້ອຳນວຍການບໍລິສັດ, ທ່ານ ດັນແຄນໂກຮວ( Duncan Crow) ຜູ້ອຳນວຍການ ຝ່າຍຊັບພຣາຍເຊນ (Supply Chain)ໃຫ້ກຽດເຂົ້າຮ່ວມເປັນສັກຂີພະຍານ.
ພ້ອມນີ້ບໍລິສັດເບຍລາວຈຳກັດຈະສືບຕໍ່ປະສານງານກັບພາກສ່ວນກ່ຽວຂ້ອງເພື່ອນຳໃຊ້ເງິນທີ່ບໍລິສັດຄາລສເບີກປະກອບສ່ວນຈຳນວນ 3 ລ້ານໂດລາສະຫະລັດເຂົ້າໃນວຽກງານເພີ້ມປະສິດທິພາບ ແລະ ສະມັດຕະພາບຂອງການຜະລິດເຂົ້າອີກດ້ວຍ.
