ສາຍດ່ວນ 1516 ແມ່ນເບີໂທເພື່ອເປີດໂອກາດ ໃຫ້ປະຊາຊົນລາວທຸກຊັ້ນຄົນ ໃນສັງຄົມ ສາມາດໂທມາສະເໜີ ແລະ ລາຍງານ ທຸກບັນຫາທີ່ເກີດຂຶ້ນ ທີ່ສ້າງຄວາມເດືອດຮ້ອນໃຫ້ກັບຕົນເອງ ແລະ ສັງຄົມ ຫຼື ໂທແຈ້ງກ່ຽວກັບວຽກງານການບໍລິຫານວຽກງານຂອງລັດຖະບານ. ແລ້ວລັດຖະບານ ຈະຮັບເອົາລາຍງານນັ້ນ ເພື່ອໄປແກ້ໄຂ ແລະ ຕອບຂໍ້ສະເໜີຂອງທຸກໆຄົນທີ່ລາຍງານເຂົ້າມາ.
ສາຍດ່ວນ 1516 ຂອງລັດຖະບານ ໄດ້ເປີດນໍາໃຊ້ຢ່າງເປັນທາງການ ໃນວັນທີ 14 ພະຈິກ 2016 ອີງຕາມການແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີເລກທີ 1774/ຫສນຍ.ກປພ ລົງວັນທີ 11-11-2016 ໂດຍອີງຕາມທິດຊີ້ນໍາຂອງທ່ານນາຍົກຄັ້ງວັນທີ 5 ກໍລະກົດ 2016.
ແລະໃນປີ 2018 ມີປະຊາຊົນໄດ້ໂທເຂົ້າມາ ແລະ ໄດ້ຮັບຄຳສະເໜີຂອງປະຊາຊົນ ແລະ ທຸກພາກສ່ວນຢູ່ໃນສັງຄົມ ມີທັງໝົດ ຈຳນວນ 2.700 ຄຳຖາມ, ໃນນັ້ນ ຄຳຖາມ ຂໍຄຳປຶກສາຈຳນວນ 2.250 ຄຳຖາມ, ບັນຫາທີ່ພົ້ນເດັ່ນກວ່າໝູ່ ແລະ ໂທເຂົ້າມາຫຼາຍແມ່ນ 1. ບັນຫາທີ່ດິນຈຳນວນ 735 ຄຳຖາມ. 2. ບັນຫາການປະຕິບັດຄຳຕັດສິນຂອງສານ ຈຳນວນ 458 ຄຳຖາມ. 3 ບັນຫາຢາເສບຕິດຈຳນວນ 375 ຄຳຖາມ. 4. ບັນຫາເງິນເດືອນຈຳນວນ 380 ຄຳຖາມ. 5. ການສໍ້ລາດບັງຫລວງ ຈຳນວນ 200 ຄຳຖາມ. 6. ບັນຫາການລັກລອບຕັດໄມ້ ແລະ ຂົນສົ່ງໄມ້ ຈຳນວນ 266 ຄຳຖາມ. 7. ບັນຫາເສັ້ນທາງຈຳນວນ 186 ຄຳ ຖາມ. 8. ບັນຫາໂຕເລກລັດ ຖະກອນຈຳນວນ 100 ຄຳຖາມ.