Target Magazine
ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ອ່ານສານ ໃນໂອກາດ ວັນຄົບຮອບ 55 ປີ ແຫ່ງການສ້າງຕັ້ງອາຊຽນ ແລະ ຄົບຮອບ 25 ປີ ສປປ ລາວ ເຂົ້າເປັນສະມາຊິກອາຊຽນ
ຮຽນບັນດາ ທ່ານຜູ້ນຳ ພັກ-ລັດ ທີ່ເຄົາລົບ ແລະ ນັບຖືຢ່າງສູງ. ພໍ່ແມ່ພີ່ນ້ອງຊາວລາວ ທີ່ນັບຖື ແລະ ຮັກແພງ ທັງຫຼາຍ
ມື້ນີ້ ວັນທີ 8 ສິງຫາ 2022 ເປັນມື້ຄົບຮອບ 55 ປີ ຂອງການສ້າງຕັ້ງອາຊຽນ. ສປປ ລາວ ໄດ້ເຂົ້າເປັນສະມາຊິກອາຊຽນ ໃນວັນທີ 23 ກໍລະກົດ 1997, ເຊິ່ງປີນີ້ກໍເປັນປີຄົບຮອບ 25 ປີທີ່ ສປປ ລາວເປັນສະມາ ຊິກອາຊຽນ. ຂ້າພະເຈົ້າ ຕາງຫນ້າໃຫ້ລັດຖະບານແຫ່ງ ສປປ ລາວ ຂໍສະແດງຄວາມຊົມເຊີຍອັນອົບອຸ່ນ ມາຍັງ ພໍ່ແມ່ພີ່ນ້ອງຊາວລາວ ກໍຄືບັນດາສະມາຊິກຄອບຄົວອາຊຽນ ເນື່ອງໃນໂອກາດວັນອາຊຽນ ແລະ ຄົບຮອບ 25 ປີ ຂອງການເປັນສະມາຊິກອາຊຽນ ຂອງ ສປປ ລາວ.
ຕະຫລອດໄລຍະ 55 ປີ ຜ່ານມາ, ອາຊຽນ ໄດ້ດຳເນີນການຮ່ວມມື ດ້ວຍ “ວິຖີທາງອາຊຽນ” ໄດ້ປະສົບຜົນສໍາເລັດ ໃນການພັດທະນາເສດຖະກິດ ກາຍມາເປັນປະຊາຄົມອາຊຽນທີ່ມີເສດຖະກິດໃຫຍ່ອັນດັບ 5 ຂອງໂລກ ແລະ ມີພົນ ລະເມືອງຫຼາຍກວ່າ 600 ລ້ານຄົນ.
ສປປ ລາວ ເຊື່ອຫມັ້ນວ່າ ການເປັນປະທານອາຊຽນຂອງ ກຳປູເຈຍ ໃນປີ 2022 ພາຍໃຕ້ຄຳຂວັນ “ອາຊຽນ: ຮ່ວມກັນແກ້ໄຂບັນດາສິ່ງທ້າທາຍ” ຈະໄດ້ຮັບຜົນສຳເລັດ ອັນເປັນການປະກອບສ່ວນເຂົ້າໃນການສ້າງຄວາມເຂັ້ມແຂງຂອງອາຊຽນໃນການຮັບມືກັບສິ່ງທ້າທາຍຕ່າງໆ.
ບັນດາທ່ານ, ພໍ່ແມ່ພີ່ນ້ອງ ທີ່ຮັກແພງ ທັງຫຼາຍ,ອາຊຽນ ເປັນບູລິມະສິດຫນຶ່ງ ທີ່ສຳຄັນຂອງນະໂຍບາຍຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຂອງ ສປປ ລາວ. ທັງເປັນການສ້າງເງື່ອນໄຂທີ່ເອື້ອອຳນວຍໃຫ້ແກ່ພາລະກິດ ແຫ່ງການປົກປັກຮັກສາ ແລະ ສ້າງສາພັດທະນາ ປະເທດຊາດຂອງພວກເຮົາ ເຮັດໃຫ້ ສປປ ລາວ ໄດ້ຮັບຄວາມໄວ້ເນື້ອເຊື່ອໃຈ ແລະ ການຮ່ວມມືຈາກປະເທດສະມາຊິກອາຊຽນ ແລະ ບັນດາຄູ່ຮ່ວມມືພາຍນອກ.
ບັນດາທ່ານ, ພໍ່ແມ່ພີ່ນ້ອງ ທີ່ຮັກແພງ ທັງຫຼາຍ, ເພື່ອເປັນປະທານອາຊຽນ ແລະ ເປັນເຈົ້າພາບຈັດກອງປະຊຸມອາຊຽນໃນລະດັບຕ່າງໆ ໃນປີ 2024. ຂ້າພະເຈົ້າ ເຊື່ອຫມັ້ນວ່າ ພາຍໃຕ້ການຊີ້ນຳ-ນຳພາຢ່າງໃກ້ຊິດຂອງການນຳພັກ-ລັດ ແລະ ຄວາມປຸ້ມລຸມສາມັກຄີຂອງພີ່ນ້ອງຊາວລາວ, ພວກເຮົາຈະສາມາດເປັນປະທານອາຊຽນ ແລະ ເປັນເຈົ້າພາບທີ່ດີ ໃນປີ 2024 ໄດ້ຢ່າງສຳເລັດຜົນ.
ຂໍ້ມູນ: Lao Youth Radio FM 90.0 Mhz
