Target Magazine
ຖອດຖອນບົດຮຽນ ໃນການຈັດຕັ້ງປະຕິບັດ ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງຢູ່ບັນດາແຂວງພາກເໜືອຂອງ ສປປ ລາວ.
ວັນທີ 5 ພຶດສະພາ ນີ້ ທີ່ແຂວງຫຼວງນໍ້າທາ, ກົມເສດຖະກິດ ກະຊວງການຕ່າງປະເທດ ໄດ້ຈັດກອງປະຊຸມພາຍໃຕ້ຫົວຂໍ້ “ການແລກປ່ຽນ ແລະ ຖອດຖອນບົດຮຽນໃນການຈັດຕັ້ງປະຕິບັດ ຂໍ້ລິເລີ່ມ ໜືຶ່ງແລວ ໜຶ່ງເສັ້ນທາງ ຢູ່ບັນດາແຂວງພາກເໜືອຂອງ ສປປ ລາວ”
ກອງປະຊຸມຄັ້ງນີ້ເປັນໜຶ່ງໃນກິດຈະກຳສຳຄັນທີ່ໄດ້ຮັບການສະໜັບສະໜູນດ້ານທຶນຮອນຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ຊຶ່ງມີຜູ້ຕາງໜ້າຈາກບັນດາກົມພາຍໃນກະຊວງການຕ່າງປະເທດ, ບັນດາຂະແໜງການທີ່ກ່ຽວຂ້ອງຈາກສູນກາງ ແລະ 6 ແຂວງພາກເໜືອຂອງ ສປປ ລາວ ເຂົ້າຮ່ວມຄື: ແຂວງ ວຽງຈັນ, ຫຼວງພະບາງ, ອຸດົມໄຊ, ຫຼວງນໍ້າທາ, ບໍ່ແກ້ວ ແລະ ຜົ້ງສາລີ.
ຈຸດປະສົງຂອງກອງປະຊຸມສໍາມະນາໃນຄັ້ງນີ້ ແມ່ນເພື່ອປຶກສາຫາລື ແລະ ແລກປ່ຽນບົດຮຽນ ກ່ຽວກັບ ການຈັດຕັ້ງປະຕິບັດວຽກງານການຮ່ວມມືພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ຂອງ ສປປ ລາວ ໂດຍສະເພາະບັນດາແຂວງພາກເໜືອ ແນໃສ່ຂົນຂວາຍກຳລັງແຮງ ແລະ ຍາດແຍ່ງເອົາຜົນປະໂຫຍດດ້ານຕ່າງໆຈາກ ໂດຍສະເພາະດ້ານເສດຖະກິດ-ສັງຄົມ, ການພັດທະນາພື້ນຖານໂຄງລ່າງ ແລະ ຄວາມຮູ້ດ້ານເຕັກນິກວິທະຍາສາດ.
ໝາກຜົນຕົວຈິງທີ່ ສປປ ລາວ ໄດ້ຮັບ ກໍແມ່ນການພັດທະນາພື້ນຖານໂຄງລ່າງ ເຮັດໃຫ້ ສປປ ລາວ ສາມາດ ເຊື່ອມຈອດເຂົ້າກັບປະເທດໃນອະນຸພາກພື້ນ, ພາກພື້ນ ແລະ ສາກົນ ຊຶ່ງໃນນີ້ ອັນທີ່ ພົ້ນເດັ່ນ ກໍແມ່ນ ທາງດ່ວນ ແລະ ໂຄງການລົດໄຟຄວາມໄວສູງ ລາວ-ຈີນ ທີ່ເປັນໂຄງການຮ່ວມມືທີ່ໃຫຍ່ທີ່ສຸດ ສຳລັບ ສປປ ລາວ ພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ.
ພ້ອມດຽວກັນນັ້ນ, ສປປ ລາວ ແລະ ສປ ຈີນ ຍັງໄດ້ຮ່ວມກັນສ້າງແລວທາງເສດຖະກິດລາວ-ຈີນ ຊຶ່ງເປັນແລວທາງເສດຖະກິດໃໝ່ ເພື່ອເພີ່ມທະວີການເຊື່ອມຈອດດ້ານການຄ້າ-ການລົງທຶນ. ນອກຈາກນີ້, ຂະແໜງການທີ່ກ່ຽວຂ້ອງຂອງ ສປປ ລາວ ຍັງໄດ້ເຂົ້າຮ່ວມໃນຫຼາຍກົນໄກຮ່ວມມືຂອງ ຂໍ້ລິເລີ່ມໜຶ່ງແລວ ໜຶ່ງເສັ້ນທາງນີ້ ເຊັ່ນ: ເສັ້ນທາງສາຍໄໝດີຈີຕອນ, ດ້ານພະລັງງານ, ການທ່ອງທ່ຽວ, ການພັດທະນາສີຂຽວ, ດ້ານສາທາລະນະສຸກ ແລະ ອື່ນໆ.
ຂໍ້ມູນ: ກະຊວງການຕ່າງປະເທດ
