Target Magazine
ໃນວັນທີ 31 ກໍລະກົດ 2021, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫລວງນ້ຳທາ ເພື່ອຊຸກຍູ້, ກວດກາ ແລະ ຕິດຕາມການຈັດຕັ້ງປະຕິບັດວຽກງານຮີບດ່ວນ.
ການມາເຄື່ອນໄຫວຢ້ຽມຢາມໃນຄັ້ງນີ້, ສະແດງໃຫ້ເຫັນເຖິງຄວາມເປັນຫ່ວງເປັນໃຍຂອງພັກ ແລະ ລັດຖະບານ ທີ່ມີຕໍ່ທ້ອງຖິ່ນໂດຍສະເພາະແມ່ນແຂວງຫລວງນ້ຳທາ, ທັງເປັນການໃຫ້ຊຸກຍູ້ໃຫ້ອຳນາດການປົກຄອງທ້ອງຖິ່ນ ກໍຄືພະນັກງານ ແລະ ປະຊາຊົນບັນດາເຜົ່າ ໃຫ້ເປັນເຈົ້າການໃນການປະກອບສ່ວນເຂົ້າໃນນະບວນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືຂອງແຂວງ ດ້ວຍຄວາມຮັບຜິດ ຊອບສູງ ແລະ ມີຜົນສຳເລັດຕາມຄາດໝາຍທີ່ວາງໄວ້.ໂອກາດນີ້, ທ່ານ ຄຳໄຫລ ສີປະເສີດ ເຈົ້າແຂວງຫລວງນ້ຳທາ ກໍໄດ້ລາຍງານສະພາບການຈັດຕັ້ງປະຕິບັດວຽກງານຕ່າງໆ ເຊັ່ນ: ວຽກງານປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19, ການອໍານວຍຄວາມສະດວກ ແລະ ແກ້ໄຂບັນຫາສິ່ງກິດຂວາງ ຂອງໂຄງການທາງລົດໄຟ ລາວ-ຈີນ, ການແກ້ໄຂບັນຫາການຂົນສົ່ງສິນຄ້າຜ່ານດ່ານບໍ່ເຕ່ນ-ບໍ່ຫານ, ການເຮັດຮົ້ວຕາມຊາຍແດນລາວ-ຈີນ ຂອບເຂດບໍ່ເຕ່ນ-ບໍ່ຫານ, ການກຳນົດຂອບເຂດທາງຫລວງແຫ່ງຊາດ ແລະ ດ່ານສາກົນ ກັບຂອບເຂດເສດ ຖະກິດ, ການພັດທະນາປິ່ນອ້ອມ (ສະຖານີສິນຄ້າທ່າບົກ) ຢູ່ເຂດສະຖານີລົດໄຟນາເຕີຍ, ການແກ້ໄຂຜົນກະທົບຈາກໄພທໍາມະຊາດ, ລວມທັງແຜນພັດທະນາເສດຖະກິດ-ສັງຄົມຂອງແຂວງໂດຍສັງເຂບ.ໂອກາດດຽວກັນ, ທ່ານ ສອນໄຊ ສີພັນດອນ ໂດຍຕາງໜ້າໃຫ້ຄະນະພັກ, ຄະນະນຳ ສະແດງຄວາມຊົມເຊີຍ ມາຍັງຄະນະນຳແຂວງຫລວງນ້ຳທາ ກໍຄື ບັນດາເມືອງ ແລະ ທຸກຂະແໜງການ ທີ່ໄດ້ພ້ອມກັນເອົາໃຈໃສ່ ແລະ ຜ່ານຜາຂໍ້ຫຍຸ້ງຍາກຕ່າງໆ ຈົນໄດ້ຮັບຜົນສຳເລັດ. ພ້ອມກັນນັ້ນ, ກໍໄດ້ໃຫ້ກຽດໂອ້ລົມເພື່ອເປັນເຂັມຊີ້ທິດເຍືອງທາງ ໃຫ້ແກ່ການພັດທະນາເສດຖະກິດ-ສັງຄົມຂອງແຂວງ ແນໃສ່ເພື່ອເສີມຂະຫຍາຍຈຸດດີ, ແກ້ໄຂບັນດາຄົງຄ້າງ ແລະ ເອົາຊະນະສິ່ງທ້າທາຍຕ່າງໆ ເພື່ອຮັບປະກັນເຮັດໃຫ້ ການພັດທະນາໃນຕໍ່ໜ້າ ບັນລຸຕາມຈຸດປະສົງລະດັບຄາດໝາຍທີ່ວາງໄວ້ ເພື່ອນຳເອົາຜົນປະໂຫຍດສູງສຸດມາສູ່ປະເທດຊາດ ກໍຄືປະຊາຊົນພາຍໃນແຂວງຫລວງນ້ຳທາ ໃຫ້ນັບມື້ນັບມີຊີວິດດີຂຶ້ນຢ່າງຕໍ່ເນື່ອງ.
ນອກຈາກນັ້ນ, ຄະນະດັ່ງກ່າວ ກໍໄດ້ລົງຢ້ຽມຢາມເຂດພັດທະນາຊາຍແດນດ່ານບໍ່ເຕ່ນ, ໂຄງການກໍ່ສ້າງສະຖານນີໂດຍສານບໍ່ເຕ່ນ, ສະຖານີນາເຕີຍ, ສະຖານີນາໝໍ້, ສະຖານີເມືອງໄຊ ແລະ ໂຄງການກໍ່ສ້າງບ້ານຈັດສັນ ທີ່ຖືກຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນ ເພື່ອຊຸກຍູ້ຂະບວນການການກໍ່ສ້າງ ແລະ ພັດທະນາດັ່ງກ່າວ ໃຫ້ສຳເລັດຕາມແຜນການທີ່ວາງໄວ້.
ຄຽງຄູ່ກັນນັ້ນ, ທ່ານຮອງນາຍົກລັດຖະມົນຕີ ກໍໄດ້ມອບເງິນສົດຈຳນວນ 130 ລ້ານກີບ ໃຫ້ແຂວງຫລວງນ້ຳທາ, ເຊິ່ງໃຫ້ກຽດຕາງໜ້າຮັບໂດຍ ທ່ານ ຄໍາໄຫລ ສີປະເສີດ ເພື່ອເປັນທຶນປະກອບສ່ວນນໍາໃຊ້ເຂົ້າໃນການແກ້ໄຂວຽກງານຈຳເປັນ ແລະ ຮີບດ່ວນ.
