Target Magazine
ກອງປະຊຸມເປີດໂຄງການກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ເພື່ອເຊື່ອມສານບົດບາດຍິງ-ຊາຍ ເຂົ້າໃນວາລະການ ພັດທະນາແຫ່ງຊາດ ຂອງ ສປປ ລາວ ໄດ້ຈັດຂຶ້ນເມື່ອບໍ່ດົນມານີ້ ທີ່ອົງການສະຫະປະຊາຊາດ ປະຈຳ ລາວ ໂດຍມີ ທ່ານນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານ ນາງ ແຄດເທີລີນ ເຟືອງ (Catherine Phoung) ຮອງຜູ້ຕາງໜ້າອົງການສະຫະປະຊາຊາດ ປະຈໍາລາວ, ທ່ານ ວິກເຕີ ເວລດິວີໂສ (Victor Valdivieso) ຮອງຜູ້ຕາງໜ້າອົງການສະຫະປະຊາຊາດ ກອງທຶນ ເພື່ອປະຊາກອນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ແຄດເທີລີນ ເຟືອງ ໄດ້ກ່າວວ່າ: ໂຄງການການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ມີຈຸດປະສົງ ເພື່ອເອົາໃຈໃສ່ການເຊື່ອມໂຍງທີ່ສຳຄັນ ລະຫວ່າງ ຄວາມຮຸນແຮງຕໍ່ບົດບາດ ຍິງ-ຊາຍ ແລະ ຜົນສໍາເລັດຂອງວາລະການພັດທະນາແຫ່ງຊາດ ແລະ ເປົ້າໝາຍການພັດທະນາແບບຍືນຍົງ (SDGs) ແລະ ຈະສະໜັບສະໜູນໃຫ້ແກ່ອຳນາດການປົກຄອງທຸກຂັ້ນ ໃນການວາງແຜນການລິເລີ່ມຂອງຂະແໜງການ ເພື່ອແກ້ໄຂ ແລະ ຫຼຸດຜ່ອນຄວາມຮຸນແຮງດັ່ງກ່າວ.
ໂຄງການດັ່ງກ່າວ ແມ່ນເພື່ອສ້າງຄວາມເຂັ້ມແຂງໃຫ້ແກ່ຄວາມສາມາດແຫ່ງຊາດ ສຳລັບການປ້ອງກັນທີ່ມີປະສິດທິຜົນ, ເປັນລະບົບ ແລະ ມີຄວາມຮັບຜິດຊອບຕໍ່ການໃຊ້ຄວາມຮຸນແຮງຕໍ່ແມ່ຍິງ ໃນ ສປປ ລາວ, ສະຫະພັນແມ່ຍິງລາວ ຈະເຮັດວຽກຮ່ວມ ກັນກັບອົງການສະຫະປະຊາຊາດ ເພື່ອການພັດທະນາ ແລະ ອົງການສະຫະປະຊາຊາດ ກອງທຶນເພື່ອປະຊາກອນ ຢູ່ ສປປ ລາວ ມີງົບປະມານທຶນສະໜັບສະໜູນ ທັງໝົດ 2,7 ລ້ານໂດລາ ຈາກອົງ ການຮ່ວມມືສາກົນ ສ ເກົາຫຼີ (KOICA), ໄລຍະເວລາໃນການຈັດຕັ້ງປະຕິບັດ 4 ປີ ຊຶ່ງເລີ່ມແຕ່ເດືອນທັນວາ 2020 ເຖິງເດືອນພະຈິກ 2024.
ທ່ານ ນາງ ບົວຈັນ ສີຫານາດ ໄດ້ກ່າວເນັ້ນວ່າ: ໃນລະດັບຊາດ, ໂຄງການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ສໍາລັບການເຊື່ອມສານບົດບາດຍິງ-ຊາຍ ເຂົ້າໃນວາລະການພັດທະນາແຫ່ງຊາດ ໃນ ສປປ ລາວ ຈະປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາແມ່ຍິງແຫ່ງຊາດ ຄັ້ງທີ VIII, ແຜນປະຕິບັດງານເພື່ອການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກນ້ອຍ (2021-2025) ໄດ້ຖືກເຊື່ອມສານເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ IX.
ໃນລະດັບພາກພື້ນ, ໂຄງ ການນີ້ຈະປະກອບສ່ວນເຂົ້າໃນການຈັດຕັ້ງປະຕິບັດແຜນປະຕິບັດງານພາກພື້ນອາຊຽນ ວ່າດ້ວຍ ການລຶບລ້າງຄວາມ ຮຸນແຮງຕໍ່ແມ່ຍິງ ແລະ ໃນລະດັບສາກົນ, ມັນຍັງຈະປະ ກອບສ່ວນໂດຍກົງໃຫ້ແກ່ການບັນລຸເປົ້າໝາຍການພັດທະນາແບບຍືນຍົງ SDG 5 ແລະ SDG 16 ພ້ອມທັງສົນທິສັນຍາ ວ່າດ້ວຍ ການລຶບລ້າງທຸກຮູບການຈຳແນກຕໍ່ແມ່ຍິງ (CEDAW) ແລະ ICPD 25. ດ້ວຍຄວາມເຫັນດີເຫັນພ້ອມໃນທົ່ວໂລກທີ່ນັບມື້ນັບຮັບຮູ້ຄວາມຮຸນແຮງຕໍ່ບົດບາດຍິງ-ຊາຍ ເຊັ່ນດຽວກັບຕໍ່ແມ່ຍິງ ຖືວ່າເປັນການລະເມີດສິດທິມະນຸດຂັ້ນພື້ນຖານທີ່ຮ້າຍແຮງ. ໃນເວລານີ້, ບັນຫາດັ່ງກ່າວແມ່ນໄດ້ເພີ່ມຫຼາຍຂຶ້ນ ໃນທຸກພາກສ່ວນຂອງສັງຄົມ ຊຶ່ງ ສປປ ລາວ ກໍບໍ່ມີຂໍ້ຍົກເວັ້ນ ໃນປີ 2020, ການລະ ບາດຂອງພະຍາດ COVID-19 ໄດ້ເຮັດໃຫ້ຄວາມບໍ່ສະເໝີພາບ ລະຫວ່າງ ຍິງ-ຊາຍ ແລະ ຄວາມບໍ່ເທົ່າທຽມໃນສັງຄົມຫຼາຍຂຶ້ນ, ການລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແມ່ນພາກສ່ວນໜຶ່ງທີ່ສຳຄັນຂອງຂະບວນການພັດທະນາ.
ແຫຼ່ງຂໍ້ມູນ: ປະຊາຊົນ
