Target Magazine
ໃນວັນທີ 26 ຕຸລາຜ່ານມາ, ຢູ່ກະຊວງແຮງງານ ແລະ ສະຫວັດດີການສັງຄົມ, ທ່ານ ຫງວຽນບາຮຸ່ງ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ໄດ້ມອບເງິນຈໍານວນ 50 ລ້ານກີບ ກ່າວຮັບໂດຍທ່ານ ປະເດີມພອນ ສົນທານີ ຮອງລັດຖະມົນຕີ ກະຊວງແຮງງານ ແລະ ສະຫັວດດີການສັງຄົມ, ເພື່ອໃຫ້ກະຊວງດັ່ງກ່າວ ນໍາໄປຊ່ວຍເຫຼືອປະຊາຊົນຜູ້ປະສົບໄພນໍ້າຖ້ວມ ຢູ່ແຂວງສະຫວັນນະເຂດ.
ໃນພິທີມອບ-ຮັບ, ທ່ານ ຫງວຽນບາຮຸ່ງ ກ່າວວ່າ: ເມື່ອໄດ້ຮູ້ຂ່າວປັດຈຸບັນ ແຂວງສະຫວັນນະເຂດ ທາງພາກກາງຂອງລາວ ຖືກຜົນກະທົບຈາກໄພນໍ້າຖ້ວມຢ່າງໜັກໜ່ວງ. ດັ່ງນັ້ນ, ສະຖານທູດຫວຽດນາມ ປະຈໍາລາວ ໄດ້ຕັດສິນໃຈໃຫ້ການຊ່ວຍເຫຼືອ ເພື່ອໜູນຊ່ວຍວຽກງານຟື້ນຟູຜົນເສຍຫາຍຈາກພາຍຸນໍ້າຖ້ວມແລະເຊື່ອໝັ້ນວ່າ: ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ປະຊາຊົນຊາວແຂວງສະຫວັນນະເຂດ ຈະສາມາດຜ່ານຜ່າຄວາມຫຍຸ້ງຍາກນີ້ໄປໄດ້ດີ, ເຮັດໃຫ້ຊີວິດການເປັນຢູ່ສືບຕໍ່ດີຂຶ້ນ. ພ້ອມກັນນັ້ນ, ຊາວຫວຽດນາມ ທີ່ອາໄສຢູ່ ສປປ ລາວ ກໍໄດ້ໃຫ້ການຊ່ວຍເຫຼືອຈໍານວນເງິນ 100 ລ້ານກີບ ແລະ ໃນເວລາອັນໄກ້ນີ້ ຈະໄດ້ຈັດຕັ້ງຄະນະລົງໄປຊ່ວຍເຫຼືອ ແລະ ຢ້ຽມຢາມຖາມຂ່າວປະຊາຊົນແຂວງສະຫວັນນະເຂດ. ໂອກາດດຽວກັນນີ້ ທ່ານ ຫງວຽນບາຮຸ່ງ ກໍໄດ້ລາຍງານສະພາບໄພນໍ້າຖ້ວມຢູ່ບັນດາແຂວງທາງພາກກາງຫວຽດນາມ ຊຶ່ງເຮັດໃຫ້ມີຜູ້ເສຍຊີວິດ ແລະ ຄວາມເສຍຫາຍທາງດ້ານສັບສິນຢ່າງຫຼວງຫຼາຍ. ພ້ອມທັງ ສະແດງຄວາມຂອບໃຈການນໍາພັກ, ລັດຖະບານລາວ ທີ່ໄດ້ສົ່ງຄໍາຢ້ຽມຢາມຖາມຂ່າວ ແລະ ອົໄດ້ໃຫ້ການຊ່ວຍເຫຼືອ ໃນໄລຍະຜ່ານມາ. ພ້ອມທັງຢັ້ງຢືນວ່າ: ຫວຽດນາມ ເວລາໃດກໍຢູ່ຄຽງບ່າຄຽງໄຫຼ່ ແລະ ໃຫ້ການຊ່ວຍເຫຼືອ ລາວ ພິເສດແມ່ນໃນໄລຍະພົບຄວາມຫຍຸ້ງຍາກສັບສົນ.
ທ່ານ ປະເດີມພອນ ສົນທານີ ໄດ້ສະແດງຄວາມຂອບໃຈຕໍ່ທ່ານ ທູດ ແລະ ຄະນະຜູ້ຕາງໜ້າສະຖານທູດຫວຽດນາມ, ບັນດາອົງການຕ່າງໆປະຈໍາລາວ ແລະ ຊາວຫວຽດນາມທີ່ອາໄສຢູ່ ລາວ ທີ່ໃຫ້ການຊ່ວຍເຫຼືອ, ແບ່ງເບົາຄວາມຫຍຸ້ງຍາກ ແລະ ຕີລາຄາສູງບັນດາການເຄື່ອນໄຫວຂອງທູດຫວຽດນາມ ປະຈໍາ ລາວ ເວລາໃດກໍກຽມພ້ອມໃຫ້ການຊ່ວຍເຫຼືອລັດຖະບານ ແລະ ປະຊາຊົນລາວບັນດາເຜົ່າ ແລະ ຈະນໍາໃຊ້ຈໍານວນເງິນດັ່ງກ່າວຢ່າງມີປະສິດທິຜົນໃນວຽກງານຟື້ນຟູສະພາບໄພນໍ້າຖ້ວມ.
ແຫຼ່ງຂໍ້ມູນ: ປະຊາຊົນ
