Target Magazine
ວັນທີ 21 ຕຸລາ ນີ້ ຄອບຄົວການນຳ ແລະ ສະມາຄົມນັກທຸລະກິດຍິງແຂວງສະຫວັນນະເຂດ ນໍາໂດຍທ່ານ ນາງ ວິລາວັນ ພົມວິຫານ ພັນລະຍາທ່ານເຈົ້າແຂວງສະຫວັນນະເຂດ ແລະ ທ່ານ ນາງ ສາຍສະໝອນ ອິນທິຈັກ ຮອງປະທານສະມາຄົມນັກທຸລະກິດຍິງ ແຂວງສະຫວັນນະເຂດພ້ອມຄະນະ, ໄດ້ລົງມອບເຄື່ອງຊ່ວຍເຫຼືອໃຫ້ກັບປະຊາຊົນຜູ້ປະສົບໄພນ້ຳຖ້ວມທີ່ເມືອງສອງຄອນ
ການລົງມອບເຄື່ອງທາງຄອບຄົວການນໍາແຂວງພ້ອມຄະນະ ກໍ່ໄດ້ພາກັນຂີ່ເຮືອໄປທີ່ບ້ານວິໄຊສົງ ເຊິ່ງເປັນຈຸດພັກເຊົາຊົ່ວຄາວຂອງປະຊາຊົນທີ່ອົບພະຍົບມາຈາກບ້ານສິງທ່າ, ສອງຄອນ ແລະ ບ້ານດົງສະຫວ່າງ
ໃນນີ້ມີປະຊາຊົນທີ່ຍ້າຍມາຈາກບ້ານສອງຄອນຈຳນວນ 207 ຄອບຄົວ, ມີພົນລະເມືອງ 1.164 ຄົນ, ຍິງ 589 ຄົນ, ບ້ານດົງສະຫວ່າງ 386 ຄອບຄົວ, ພົນລະເມືອງ 2.349 ຄົນ, ຍິງ 1.151 ຄົນ ແລະ ບ້ານສິງທ່າ ມີ 109 ຄອບຄົວ, ພົນລະເມືອງ 658 ຄົນ, ຍິງ 462 ຄົນ ເຄື່ອງທີ່ນຳໄປມອບປະກອບມີ ເຂົ້າສານ 720 ຖົງ, ນ້ຳດື່ມ 720 ແຟັກ, ມີ່, ປາກະປ໋ອງ 720 ຊຸດ ລວມມູນຄ່າເປັນເງິນທັງໝົດ 76 ລ້ານກີບ
ເຄື່ອງຈໍານວນດັ່ງກ່າວແມ່ນໄດ້ມາຈາກການລະດົມນຳຄອບຄົວເອື້ອຍນ້ອງເລດີ້ ນະຄອນຫຼວງວຽງຈັນ ໃຫ້ກຽດມອບເຄື່ອງຊ່ວຍເຫຼືອໃນຄັ້ງນີ້ໂດຍແມ່ນທ່ານ ນາງ ວິລາວັນ ພົມວິຫານ ພັນລະຍາທ່ານເຈົ້າແຂວງສະຫວັນນະເຂດ ພ້ອມຄະນະ,
ມີການນຳຂອງເມືອງແລະຕາງໜ້າປະຊາຊົນທັງສາມບ້ານເປັນຜູ້ຮັບ.ທັງນີ້ກໍ່ເພື່ອເປັນການແບ່ງເບົາບັນເທົາທຸກ ພ້ອມທັງເປັນການແກ້ໄຂສຸກເສີນສະເພາະໜ້າ ໃຫ້ກັບປະຊາຊົນທີ່ໄດ້ຮັບຜົນກະທົບໃນຄັ້ງນີ້.
