ທໍາລາຍ ສິນຄ້າປອມແປງ, ຮຽນແບບ ມູນ​ຄ່າກວ່າ 200 ລ້ານ​ກີບ

ພິ​ທີ​ຈັດ​ທຳ​ລາຍ​ສິນ​ຄ້າ​ເຄື່ອງ​ບໍ​ລິ​ໂພກ​ປະ​ເພດ​ແກ່ນ​ຕາ​ເວັນ, ຖົງ​ບັນ​ຈຸ​ແກ່ນ​ຕາ​ເວັນ ແລະ ເຄື່ອງ​ປຸງ​ອາ​ຫານ​ ປະ​ເພດ​ແຈ່ວ​ເສ​ສວນ, ຖົງ​ບັນ​ຈຸ​ແຈ່ວ​ເສ​ສວນ ໄດ້​ຈັດ​ຂຶ້ນໃນ​ວັນ​ທີ 9 ກັນ​ຍາ 2020 ​ທີ່​ສະ​ໜາມ​ຂີ້​ເຫຍື້ອ​ ຫຼັກ 32, ບ້ານ​ນາ​ຜາ​ສຸກ, ເມືອ​ງ​ໄຊ​ທາ​ນີ, ນະ​ຄອນ​ຫຼວງວຽງ​ຈັນ ໂດຍ​ການ​ເຂົ້າ​ຮ່​ວມ​ຂອງ ທ່ານ ສົມ​ຈິດ ອິນ​ທະ​ມິດ ຮອງ​ລັດ​ຖະ​ມົນ​ຕີ​ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ, ມີ ທ່ານ ວິ​ລະ​ໄຊ ເລັ່ງ​ສະ​ຫວັດ ຫົວ​ໜ້າ​ກົມການ​ຄ້າ​ພາຍ​ໃນ ພ້ອມ​ດ້ວຍ​ພາກ​ສ່ວນ​ທີ່​ກ່ຽວ​ຂ້ອງ​ເຂົ້າ​ຮ່ວມ.

ທ່ານ ສົມ​ຊາຍ ນົງ​ລາດ ຫົວ​ໜ້າ​ພະ​ແນກກວດ​ກາ​ການ​ຄ້າ, ກົມ​ການ​ຄ້າ​ພາຍ​ໃນ ໄດ້​ຜ່ານ​ຂໍ້​ຕົກ​ລົງ ວ່າ​ດ້ວຍການທໍາລາຍສິນຄ້າທີ່ປອມແປງ-ຮຽນແບບ ແລະ ລະເມີດເຄື່ອງໝາຍການຄ້າ ວ່າ: ໂດຍປະຕິບັດຕາມພາລະບົດບາດ ແລະ ທິດຊີ້ນຳຂອງຄະນະນໍາກະຊວງອຸດ​ສາ​ຫະ​ກຳ ແລະ ການ​ຄ້າ, ກົມການຄ້າພາຍໃນ ໄດ້ຈັດພິທີທຳລາຍ ປະກອບມີ: 1. ແກ່ນຕາເວັນອົບແຫ້ງຍີ່ຫໍ້ (GNQ) ທີ່ໄດ້ບັນຈຸໃນແກັດ ຈໍານວນ 219 ແກັດ; 2. ເຄື່ອງປຸງອາຫານປະເພດ ແຈ່ວເສສວນ 201 ແກັດ; 3. ແກ່ນຕາເວັນຍັງບໍ່ທັນບັນຈຸ 105 ກິໂລ ແລະ 4. ຖົງເປົ່າບັນຈຸແກ່ນຕາເວັນ ແລະ ແຈ່ວເສສວນ 22 ເປົ້າ ລວມມູນຄ່າທັງໝົດ ປະມານ 208.405.000 ກີບ.​

ສິນ​ຄ້າ​ດັ່ງ​ກ່າວ ເຈົ້າ​ໜ້າ​ທີ່ກວດ​ກາ​ການ​ຄ້າ ໄດ້​ລົ​ງ​ຕິດ​ຕາມ, ກວດກາເປົ້າ​ໝາຍພົບ​ທີ່ ໂຮງງານ ອັດຮ່າຍ ແລະ ປຸງແຕ່ງອາຫານ, ຢູ່ບ້ານແກ້ງໄຄ້, ເມືອງໄຊທານີ ແລະ ຮ້ານຈຳໜ່າຍ ສິນຄ້າຂອງໂຮງງານດັ່ງກ່າວ ຢູ່ບ້ານຫ້ວຍຫົງ ເມືອງຈັນທະບູລີ ໃນວັນທີ 16 ມິຖຸນາ 2020 ຜ່າ​ນມາ ເຊິ່ງໂຮງງານດັ່ງກ່າວໄດ້ນໍາໃຊ້ໃບທະບຽນວິສາຫະກິດບໍລິສັດຜະລິດຕະພັນອາຫານຢົງລີ ວຽງຈັນ ຈໍາກັດຜູ້ດຽວ ມີການຜະລິດແກ່ນຕາເວັນອົບແຫ້ງ ແລະ ແຈ່ວເສສວນ ໂດຍບໍໄດ້ຮັບອະນຸຍາດ ການດຳເນີນທຸລະກິດການຜະລິດ ຈາກຂະແໜງອຸດສາຫະກໍາ, ບໍມີໃບຢັ້ງຢືນ ອຍ ຈາກຂະແໜງສາທາລະນະສຸກ

ສະນັ້ນ, ຈຶ່ງບໍ່ຮັບປະກັນທາງດ້ານຄຸນນະພາບ. ນອກນັ້ນ, ໃນຊອງບັນຈຸແກ່ນຕາເວັນຍັງລະບຸແອບອ້າງຊື່ຂອງບໍລິສັດນຳເຂົ້າອື່ນ ໂດຍບໍ່ໄດ້ຮັບອານຸຍາດ ແລະ ຊອງບັນຈຸແຈ່ວເສສວນ ກໍໃສ່ຮູບຄືກັບແຈ່ວທີ່ນໍາເຂົ້າ ຈຶ່ງເຮັດໃຫ້ຜູ້ຊົມໃຊ້ເຂົ້າໃຈຜິດແຫຼ່ງທີ່ມາ ຖືວ່າເປັນການຫຼອກລວງຜູ້ຊົມໃຊ້. ສະນັ້ນ, ຄະນະລົງກວດກາ ຈຶ່ງໄດ້ຍຶດສິນຄ້າ ແລະ ໄດ້ນຳ​ມາ​ທຳ​ລາຍ​ຖີ້ມ​ຕາມ​ລະ​ບຽບ​ການ. ສ່ວນ​ໂຮງ​ງານ​ດັ່ງ​ກ່​າວ ທາງ​ເຈົ້າ​ໜ້າ​ທີ່​ກ່ຽວ​ຂ້ອງ​ໄດ້​​ໃສ່​ມາດ​ຕະ​ການ​ຕາມ​ລະ​ບຽບ​ກົດ​ໝາຍ.

ແຫຼ່ງຂໍ້ມູນ: ຂ່າວເສດຖະກິດ ການຄ້າ

Comments