ພານາໂຊນິກ (Panasonic) ກຽມປິດໂຮງງານການຜະລິດເຄື່ອງໃຊ້ໄຟຟ້າໃນປະເທດໄທ ໃນເດືອນກັນຍານີ້ ແລະ ຈະຍ້າຍຖານການຜະລິດໄປປະເທດຫວຽດນາມ ພ້ອມຕັ້ງເປັນສູນກາງການຜະລິດໃຫຍ່ຫວັງຫຼຸດຕົ້ນທຶນ.
ວັນທີ 21 ພຶດສະພາ 2020 ນິກເຄອິ ອາຊຽນລີວິວ ເວັບໄຊເສດຖະກິດຂອງຍີ່ປຸ່ນລາຍງານວ່າ: ພານາໂຊນິກ ຜູ້ຜະລິດ ເຄື່ອງໃຊ້ໄຟຟ້າ ກຽມປິດໂຮງງານ ຜະລິດ ເຄື່ອງໃຊ້ ໄຟຟ້າ ຂະໜາດໃຫຍ່ ແຫ່ງໜຶ່ງ ຢູ່ປະເທດໄທ ພາຍໃນ ໄຕມາດ 3 ຂອງ ປີນີ້ ແລະ ຈະຕັ້ງໂຮງງານ ຂະໜາດໃຫຍ່ກວ່າ ໃນຫວຽດນາມ ເພື່ອເພີ່ມປະສິດທິພາບ ການຜະລິດ.
ສຳລັບ ໂຮງງານ ດັ່ງກ່າວ ໃນໄທ ຈະຢຸດຜະລິດ ເຄື່ອງຊັກຜ້າ ໃນເດືອນກັນຍາ ແລະ ຕູ້ເຢັນ ໃນເດືອນຕຸລາ ກ່ອນປິດ ອາຄານ ໂຮງງານໃນເດືອນມີນາປີໜ້າ. ຂະນະດຽວກັນ ສູນວິໄຈ ແລະ ພັດທະນາ ທີ່ຢູ່ ອາຄານ ໃກ້ກັນ ກໍຈະປິດລົງ ອີກດ້ວຍ.
ສາເຫດທີ່ຍ້າຍ ການຜະລິດ ໄປຍັງ ຫວຽດນາມ ຄາດວ່າ ຈະຊ່ວຍຫຼຸດ ຕົ້ນທຶນ ການຜະລິດ ໃຫ້ແກ່ ບໍລິສັດໄດ້ ລະດັບໜຶ່ງ ເພາະຕົ້ນທຶນການຈັດຊື້ ອາໄຫຼ່ ແລະ ຊິ້ນສ່ວນ ອຸປະກອນ ໃນຫວຽດນາມ ຕ່ຳກວ່າ ຢູ່ປະເທດໄທ ເຊິ່ງ ຫຼາຍປີ ຜ່ານມາ ບັນດາບໍລິສັດ ຂ້າມຊາດ ເປັນຕົ້ນ ຊຳຊຸງ, ແອລຈີ ແລະ ຜູ້ຜະລິດ ຈາກຍີ່ປຸ່ນ ຈຳນວນຫຼາຍ ໄດ້ເລີ່ມຍ້າຍ ຖານການຜະລິດເຂົ້າໄປ ຍັງຫວຽດນາມ.
ປັດຈຸບັນ, ພະນັກງານ ຂອງ ພານາໂຊນິກ ໃນໄທ ລວມມີ 800 ຄົນ ຈະຖືກອອກຈາກຕຳແໜ່ງ ແຕ່ຈະໄດ້ຮັບ ການຊ່ວຍເຫຼືອ ດ້ານຕ່າງໆ ລວມທັງ ການຊອກຫາ ຕຳແໜ່ງງານ ທີ່ເໝາະສົມ ພາຍໃນອົງການຕໍ່ໄປ. ປັດຈຸບັນ, ທາງບໍລິສັດ ໄດ້ຕັ້ງເປົ້າໝາຍ ຫຼຸດຄ່າໃຊ້ຈ່າຍ ລົງໃຫ້ໄດ້ ປະມານ 930 ລ້ານໂດລາສະຫະລັດ ພາຍໃນປີງົບ ປະມານ 2022.
ທີ່ມາ: www.prachachat.net