ການລະບາດຂອງພະຍາດໄຂ້ຍຸງລາຍ ຍັງສືບຕໍ່ແຜ່ລະບາດໃນທົ່ວປະເທດ ແລະ ເສຍຊີວິດແລ້ວ 2 ຄົນ ຢູ່ ນະຄອນຫຼວງວຽງຈັນ ແລະ ແຂວງໄຊຍະບູລີ.
ກົມຄວບຄຸມພະຍາດ ຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ວ່າ: ນັບແຕ່ທ້າຍເດືອນທັນວາ 2019 ຫາ ວັນທີ 18 ພຶດສະພາ 2020, ທົ່ວປະເທດ ໄດ້ມີກໍລະມີຄົນເຈັບ ຈາກພະຍາດໄຂ້ຍຸງລາຍ 1,234 ກໍລະນີ, ເສຍຊີວິດແລ້ວ 2 ຄົນ.
ໃນນັ້ນ ນະຄອນຫຼວງວຽງຈັນ ເປັນອັນດັບໜຶ່ງທີ່ມີຜູ້ຕິດເຊື້ອພະຍາດໄຂ້ຍຸງລາຍ 327 ກໍລະນີ ເສຍຊີວິດ 1 ຄົນ, ແຂວງ ອັດຕະປື 184 ກໍລະນີ, ວຽງຈັນ 169 ກໍລະນີ, ຄຳມ່ວນ 93 ກໍລະນີ, ບໍລິຄຳໄຊ 92 ກໍລະນີ, ສະຫວັນນະເຂດ 84 ກໍລະນີ, ສາລະວັນ 77 ກໍລະນີ, ໄຊຍະບູລີ 72 ກໍລະນີ ເສຍຊີວິດ 1 ຄົນ ແລະ ແຂວງອື່ນໆ ເຊິ່ງແຂວງທີ່ຍັງບໍ່ມີການລາຍງານຄົນເປັນໄຂ້ຍຸງລາຍ ແມ່ນແຂວງຫົວພັນ ແລະ ຊຽງຂວາງ.
ປະຈຸບັນ ພະຍາດໄຂ້ຍຸງລາຍໄດ້ເກີດຢູ່ຫຼາຍແຂວງສົ່ງຜົນໃຫ້ມີຜູ້ເສຍຊີວິດ ແລະ ຈຳນວນຄົນເຈັບເພີ່ມຂຶ້ນ ເຊິ່ງທາງດຽວທີ່ຈະປ້ອງກັນພະຍາດນີ້ໄດ້ນັ້ນ ທຸກຄົນຕ້ອງພ້ອມກັນ ເອົາໃຈໃສ່ປະຕິບັດຫຼັກການ 5 ປ ໄປພ້ອມກັບການທຳລາຍແຫຼ່ງເພາະພັນໜອນຍຸງຢ່າງເປັນປະຈຳໃນທຸກອາທິດ.
ຂອບໃຈ ຂ່າວ ແລະ ພາບ : ວຽງຈັນທາຍ