Target Magazine
ທ່ານ ເຄນ ເທບວົງສາ ຜູ້ຊ່ວຍຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ຫົວໜ້າຝ່າຍປະຕິບັດການໄຟຟ້າ ນະຄອນຫຼວງວຽງຈັນ ໃຫ້ສຳພາດໃນວັນທີ 14 ພຶດສະພາ 2020 ວ່າ: ເພື່ອປະຕິບັດຕາມຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 31/ນຍ ລົງວັນທີ 02 ເມສາ 2020 ວ່າດ້ວຍການກຳນົດນະໂຍບາຍ ແລະ ມາດຕະການເພື່ອຫຼຸດຜ່ອນຜົນກະທົບຈາກການລະບາດຂອງພະຍາດ ໂຄວິດ-19 ຕໍ່ສະພາບເສດຖະກິດຂອງ ສປປ ລາວ ໃຫ້ຄົ້ນຄວ້າຜ່ອນຜັນລາຄາ ແລະ ຕໍ່ເວລາໃນການຊຳລະຄ່າໄຟ ແລະ ນ້ຳປະປາ ຂອງຜູ້ຊົມໃຊ້ຄົວເຮືອນ ແລະ ພາກທຸລະກິດ.
ພາຍຫຼັງໄດ້ຮັບຂໍ້ຕົກລົງ ດັ່ງກ່າວ ກະຊວງພະລັງງານ ແລະ ບໍ່ແຮ່ ໄດ້ຄົ້ນຄວ້າ ແລະ ຮີບຮ້ອນສົມທົບກັບໜ່ວຍງານສະເພາະກິດຂອງລັດຖະບານ ທີ່ຄົ້ນຄວ້ານະໂຍບາຍທີ່ຕິດພັນກັບພາກປະຊາຊົນ ແລະ ສັງຄົມ ເພື່ອຄົ້ນຄວ້ານະໂຍບາຍກ່ຽວກັບການຫຼຸດຄ່າກະແສໄຟຟ້າ ເພື່ອເປັນສ່ວນໜຶ່ງໃນການຊ່ວຍເຫຼືອພໍ່ແມ່ປະຊາຊົນ ພະນັກງານ ລັດຖະກອນ ທະຫານ ຕຳຫຼວດ ແລະ ພາກທຸລະກິດໃນໄລຍະວິກິດຂອງການແຜ່ລະບາດຂອງພະຍາດ ໂຄວິດ-19.
ຜ່ານການຄົ້ນຄວ້າຢ່າງເລິກເຊິ່ງ ກະຊວງພະລັງງານ ແລະ ບໍ່ແຮ່ ກໍໄດ້ຕົກລົງເຫັນດີກ່ຽວກັບປະຕິບັດນະໂຍບາຍຫຼຸດຄ່າໄຟ ໄດ້ອອກແຈ້ງການສະບັບເລກທີ 438/ພບ ລົງວັນທີ 08 ເມສາ 2020 ເຖິງລັດວິສາຫະກິດໄຟຟ້າລາວ ໃນການປະຕິບັດໂຄງສ້າງລາຄາໄຟຟ້າໃໝ່ ແຕ່ 2020 ຫາ ປີ 2025 ໂດຍໃຫ້ເລີ່ມປະຕິບັດນັບແຕ່ເດືອນພຶດສະພາ 2020 ເປັນຕົ້ນໄປ (ໝາຍຄວາມວ່າ ບິນຄ່າໄຟເດືອນພຶດສະພາ ແມ່ນ ພະລັງງານຂອງເດືອນເມສາ) ໃນໂຄງສ້າງລາຄາໄຟຟ້າໃໝ່ນີ້ ພາກທີ່ຢູ່ອາໄສ ໄດ້ຫຼຸດລາຄາຈາກອັດຕາຄິດໄລ່ 6 ຂັ້ນ ມາເປັນຂັ້ນດຽວ ລາຄາ 710 ກີບ/kWh ແຕ່ມີນະໂຍບາຍຫຼຸດລາຄາລົງ 50% ຕໍ່ຜູ້ໃຊ້ໄຟບໍ່ເກີນ 150 kWh ລາຄາ 355 ກີບ/kWh ພາກອື່ນໆທີ່ບໍ່ແມ່ນທີ່ຢູ່ອາໄສ ກໍໄດ້ຮັບສ່ວນຫຼຸດເຊັ່ນກັນ ເຮັດໃຫ້ຜູ້ຊົມໃຊ້ແຕ່ລະປະເພດໄດ້ຮັບສ່ວນຫຼຸດ 2-35% ພ້ອມນັ້ນ ກໍໄດ້ມີນະໂຍບາຍເລື່ອນເວລາຊຳລະຄ່າໄຟອອກໄປ ຈາກ 7-30 ວັນ ເປັນ 7-45 ວັນ.
ພິເສດ ການປະຕິບັດນະໂຍບາຍຕໍ່ພະນັກງານແພດໝໍທີ່ເຮັດວຽກຢູ່ກອງໜ້າປະຈັນບານໂດຍກົງ ທີ່ມີຄວາມສ່ຽງສູງຕໍ່ການຕ້ານ-ສະກັດກັ້ນພະຍາດ COVID-19 ໂດຍມີການຢັ້ງຢືນຈາກໂຮງໝໍທີ່ກ່ຽວຂ້ອງ ຈາກບັນດາແຂວງທົ່ວປະເທດ ຈະໄດ້ຮັບນະໂຍບາຍຫຼຸດຄ່າໄຟ 15% ຂອງພະລັງງານທີ່ນຳໃຊ້ໃນເດືອນພຶດສະພາ ມິຖຸນາ ແລະ ກໍລະກົດ (ເປັນໄລຍະເວລາ 3 ເດືອນ) ປີ 2020 ກ່ອນຫັກອາກອນ.
ໂອກາດນີ້ ທ່ານ ເຄນ ເທບວົງສາ ຍັງຮຽກຮ້ອງເຖິງພໍ່ແມ່ປະຊາຊົນ ຈົ່ງມີສະຕິໃນການນຳໃຊ້ໄຟຟ້າ ໝັ່ນກວດກາອຸປະ ກອນໄຟຟ້າ ສາຍໄຟຟ້າພາຍໃນເຮືອນຂອງຕົນຢ່າງເປັນປົກກະຕິ ຖ້າເຫັນວ່າມີການນຳໃຊ້ມາດົນ ຫຼືມີການສຳລຸດເສຍຫາຍ ກໍໃຫ້ປ່ຽນແທນໃນທັນທີ ບໍ່ໃຫ້ຖືເບົາ ເພາະມັນຈະສົ່ງຜົນກະທົບຮ້າຍແຮງ ເປັນຕົ້ນເກີດໄຟຟ້າຊ໊ອດ ເຮັດໃຫ້ເກີດໄຟໄໝ້ເຮືອນ ຊານ ສົ່ງຜົນກະທົບຮ້າຍແຮງຕໍ່ຊັບສິນສ່ວນຕົວ ແລະ ສ່ວນລວມ.
ທີ່ມາ: ໜັງສືພຶມລາວພັດທະນາ
