ມາດຕະການ ການຂົນສົ່ງສິນຄ້າ ເຂົ້າ-ອອກ ລະຫວ່າງປະເທດ ໃນໄລຍະການລະບາດຂອງ ໂຄວິດ-19

ໃນໄລຍະການລະບາດຂອງໄວຣັສ ໂຄວິດ-19 ທີ່ຍັງລະບາດ ແລະ ມີຄວາມຈໍາເປັນຕ້ອງມີມາດຕະການເຝົ້າລະວັງຢ່າງໃກ້ສິດ ເພື່ອປ້ອງກັນບໍ່ໃຫ້ເຊື້ອໄວຣັດດັ່ງກ່າວ ຕິດມານໍາຍານພາຫະນະ, ສິນຄ້າ ແລະ ຄົນຂັບລົດ ມາແຜ່ລະບາດໃນ ສປປ ລາວ ແຕ່ມາດຕະການປ້ອງກັນ ແລະ ເຝົ້າລະວັງ ເຫັນວ່າມີຜົນກະທົບຕໍ່ກັບການຂົນສົ່ງສິນຄ້າ ລະຫວ່າງປະເທດ ເຮັດໃຫ້ສິນຄ້າ ຫຼື ພາຫະນະຂົນສົ່ງສິນຄ້າຄ້າງຫຼາຍຄືນຢູ່ບາງດ່ານສາກົນ ເນື່ອງຈາກຄວາມຈໍາເປັນຕ້ອງປະຕິບັດຂັ້ນຕອນຕ້ານການລະບາດຂອງໄວຣັສ ໂຄວິດ-19. ເພື່ອແກ້ໄຂບັນຫາຈຸດນີ້, ທາງກະຊວງ ໂຍທາທິການ ແລະ ຂົນສົ່ງ ຈຶ່ງໄດ້ອອກມາດຕະການ ແລະ ຂັ້ນຕອນໃນການກວດປ່ອຍສິນຄ້າໃຫ້ໄວຂຶ້ນກວ່າເກົ່າ ແນ່ໃສ່ຫຼຸດຜ່ອນຄວາມແອອັດຂອງພາຫະນະ ແລະ ສິນຄ້າທີ່ຄ້າງຢູ່ດ່ານ ຫຼື ຖ້າສິນຄ້າຄ້າງຫຼາຍວັນ ອາດເຮັດໃຫ້ສິນຄ້າປະເພດກະສິກໍາ ມີຄວາມເສຍຫາຍໄດ້.

ອີງຕາມແຈ້ງການ ເລກທີ 00283/ຍທຂ ລົງວັນທີ 24 ເມສາ 2020 ໄດ້ແນະນໍາຂັ້ນຕອນການຂົນສົ່ງສິນຄ້າ ເຂົ້າ-ອອກ ລະຫວ່າງປະເທດ ໃຫ້ເຈົ້າໜ້າທີ່ດ່ານ ແລະ ບັນດາບໍລິສັດຂົນສົ່ງຮັບຮູ້ ແລະ ເອົາໃຈໃສ່ປະຕິບັດຢ່າງເຂັ່ມງວດ ດັ່ງນີ້:

     1. ການຂົນສົ່ງສິນຄ້າຂາເຂົ້າ

• ຄົນຂັບລົດຕ່າງປະເທດທີ່ຈະຂົນສິນຄ້າເຂົ້າ ສປປ ລາວ ທີ່ສາມາດຄ່ຽນຖ່າຍຢູ່ຈຸດສະເພາະນັ້ນ ແມ່ນຕ້ອງປະຕິບັດຕາມມາດຕະການທາງສາທາລະນະສຸກໄດ້ວາງອອກຢ່າງເຂັ້ມງວດ ເຊັ່ນ: ຕ້ອງໃສ່ຜ້າປິດປາກ-ດັງ ແລະ ກວດອຸນຫະພູມຈາກເຈົ້າໜ້າທີ່ສາທາລະນະສຸກ ຢູ່ດ່ານລາວ;

• ຄົນຂັບລົດຕ່າງປະເທດທີ່ຈະຂົນສິນຄ້າປະເພດສານເຄມີອັນຕະລາຍ ແລະ ເຄື່ອງຮັບໃຊ້ໂຄງການກໍ່ສ້າງທາງດ່ວນ, ເຂື່ອນໄຟຟ້າ ແລະ ອື່ນໆ ທີ່ບໍ່ສາມາດຄ່ຽນຖ່າຍ ເນື່ອງຈາກຄວາມສ່ຽງດ້ານຄວາມປອດໄພໃນເວລາຄ່ຽນຖ່າຍ ເຊິ່ງຕ້ອງໄດ້ອະນຸຍາດໃຫ້ເຂົ້າດິນແດນເຂດລາວ ແລະ ຂົນສົ່ງໃຫ້ເຖິງປາຍທາງ ບົນພື້ນຖານການປະຕິບັດທີ່ເຂັ້ມງວດຄື: ມີເອກະສານຢັ້ງຢືນຈາກເຈົ້າຂອງໂຄງການ ຫຼື ຕົວແທນຢູ່ລາວ ເຖິງສິນຄ້າທີ່ຈະຂົນສົ່ງ ແລະ ຈຸດໝາຍປາຍທາງໃຫ້ຈະແຈ້ງ ແລະ ຖືກຕ້ອງ ເພື່ອໃຫ້ເຈົ້າໜ້າທີ່ປະຈໍາຢູ່ຈຸດທາງຜ່ານນັ້ນຮັບຮູ້ ແລະ ອໍານວຍຄວາມສະດວກ ເຊິ່ງຜູ້ຂັບມີສິດເຂົ້າເຖິງຈຸດທີ່ກໍານົດສົ່ງສິນຄ້າເທົ່ານັ້ນ. ໃນກໍລະນີທີ່ຜູ້ຂັບຕ້ອງໄດ້ຄ້າງຄືນ ແມ່ນເຈົ້າຂອງໂຄງການຕ້ອງເປັນຄົນຮັບຜິດຊອບ ຈັດກຽມສະຖານທີພັກເຊົ່າໃຫ້ມີຄວາມປອດໄພ ແລະ ແຍກປ່ຽວຈາກຜູ້ອື່ນ.

     2. ການຂົນສົ່ງສິນຄ້າຂາອອກ

• ລົດຂົນສົ່ງຂອງລາວ ສາມາດຂົນສົ່ງສິນຄ້າ ໄປເຖິງຈຸດຄ່ຽນຖ່າຍໃສ່ລົດຕ່າງປະເທດ ຫຼື ໄປເຖິງຈຸດໝາຍປາຍທາງ ໃນກໍລະນີທີ່ປະເທດທີສອງໄດ້ອະນຸຍາດ;
• ອະນຸຍາດໃຫ້ລົດຂົນສົ່ງ ແລະ ຕູ້ຄອນເທນເນີເປົ່າສາມາດເຂົ້າມາເອົາສິນຄ້າຢູ່ ດ່ານລາວ ເພື່ອຈະສົ່ງອອກ;

• ຄົນຂັບລົດ ແລະ ຜູ້ຕິດຕາມ ທີ່ເປັນຄົນຕ່າງປະເທດນັ້ນ ຕ້ອງປະຕິບັດຕາມມາດຕະການທີ່ໄດ້ວ່າງອອກຈາກ ສາທາລະນະສຸກຢ່າງເຂັ້ມງວດ ກໍຄື: ການປິດປາກ-ດັງ ແລະ ວັດແທກອຸນຫະພູມຢູ່ດ່ານລາວ.

ທີ່ມາ: www.laotradeportal.gov.la