ກະຊວງວັດທະນະທຳ ແລະ ທ່ອງທ່ຽວ ສປ ຈີນ ຮ່ວມກັບກະຊວງຖະແຫຼງຂ່າວ, ວັດ ທະນະທຳ ແລະ ທ່ອງທ່ຽວ ສປປລາວ ຈັດພິທີປິດປີທ່ອງທຽ່ວ ລາວ-ຈີນ 2019 ໄດ້ຈັດຂຶ້ນຢ່າງຍິ່ງໃຫຍ່ ໃນວັນທີ 16 ທັນວາຜ່ານມາ ທີ່ນະຄອນຫຼວງປັກກິງ ສປ ຈີນ ໂດຍເປັນກຽດເຂົ້າຮ່ວມຂອງ ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ສປປ ລາວ, ມີສະຫາຍ ປ້າຍມ້າ ສືຫຼີນ ຮອງປະທານສະພາ ປະຊາຊົນທົ່ວປະເທດຈີນ, ມີແຂກຖືກເຊີນທັງພາຍ ໃນ ແລະ ຕ່າງປະເທດ.
ໃນພິທີດັ່ງກ່າວ, ສະຫາຍ ຈາງ ຊູ ຮອງລັດຖະມົນຕີກະຊວງວັດທະນະທຳ ແລະ ທ່ອງທ່ຽວຈີນ ໄດ້ກ່າວຕ້ອນຮັບແຂກ ແລະ ໄດ້ຕີລາຄາສູງຕໍ່ການນຳສູງສຸດທັງສອງຝ່າຍລາວ ແລະ ຈີນໄດ້ຕັດສິນໃຈຮ່ວມກັນເປີດປີທ່ອງທ່ຽວ ລາວ-ຈີນ ຂຶ້ນໃນປີ 2019 ຊຶ່ງເປັນສັນຍາລັກໃໝ່ໃນການຮ່ວມມືດ້ານວຽກງານທ່ອງທ່ຽວ ເພື່ອອຳນວຍຄວາມສະດວກໃຫ້ປະຊາຊົນທັງສອງປະເທດໄດ້ມີການໄປມາຫາສູ່ກັນຖານບ້ານໃກ້ເຮືອນຄຽງທີ່ດີ ຕໍ່ກັນ.
ໃນໂອກາດນີ້, ສະຫາຍ ກິແກ້ວ ໄຂຄຳພິທູນ ຄະນະ ເລຂາທິການສູນກາງພັກ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທຽ່ວ ສປປ ລາວ ໄດ້ກ່າວວ່າ: ສປປ ລາວ ແລະ ສປ ຈີນ ໄດ້ຈັດປີ ທ່ອງທ່ຽວ ລາວ-ຈີນ 2019 ຂຶ້ນ ເພື່ອປະຕິບັດຕາມຄວາມມຸ້ງມາດປາຖະໜາຂອງສອງ ຜູ້ນຳສູງສຸດ ລາວ-ຈີນຄື: ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ສປປ ລາວ ແລະ ສະຫາຍ ສີ ຈິ້ນຜິງ ເລຂາທິການໃຫຍ່ ປະທານປະ ເທດ ສປ ຈີນ ທີ່ຢາກເຫັນປະ ຊາຊົນທັງສອງປະເທດໄປມາ ຫາສູ່ກັນຖານບ້ານໃກ້ເຮືອນຄຽງ.
ໃນລະຫວ່າງວັນທີ 23-28 ກັນຍາ 2019. ຈັດຕັ້ງການຕ້ອນຮັບຂະບວນລົດຄາຣາວານ ນັກທ່ອງທ່ຽວຈີນ ຈໍານວນ 20 ຄັນ ຄຽງຄູ່ກັນນີ້ ຝ່າຍຈີນຍັງໄດ້ຈັດຊຸດເຝິກອົບ ຮົມພະນັກງານລາວນໍາທ່ຽວພາສາຈີນ ແລະ ໄດ້ມອບລົດ ຈໍານວນ 22 ຄັນ ໃຫ້ຝ່າຍລາວເປັນຂອງຂວັນ. ໄດ້ເປີດຖ້ຽວບິນປະຖົມມະລືກ ວຽງຈັນ-ຊຽງໄຮ້-ວຽງຈັນ ແລະ ຖ້ຽວບິນອື່ນໆ. ການເປີດປີທ່ອງທ່ຽວ 2019 ນີ້ ໄດ້ສະແດງໃຫ້ເຫັນວ່າມີສະ ຖິຕິນັກທ່ອງທ່ຽວຈີນ ທີ່ເຂົ້າມາທ່ຽວລາວຈາກ 199.857 ຄົນ ໃນ ປີ 2012 ເປັນ 799.929 ຄົນ ໃນປີ 2018 ນັບມື້ເພີ່ມຂຶ້ນ ຢ່າງຕໍ່ເນື່ອງ, ປີ 2019 ຕາມສະຖິຕິທາງການ ໃນ 9 ເດືອນຕົ້ນປີ 2019, ມີນັກທ່ອງທ່ຽວຈີນທີ່ເຂົ້າມາທ່ອງທ່ຽວລາວ ຫຼາຍກວ່າ 756.952 ເທື່ອຄົນ ແລະ ຄາດຄະເນວ່າ ໃນໄລຍະ 3 ເດືອນສຸດທ້າຍຂອງໄຕມາດປີນີ້ ຄົງຈະບັນລຸເຖິງ 1 ລ້ານເທື່່ອຄົນຕາມຄາດໝາຍທີ່ຫວັງໄວ້ ຄຽງຄູ່ກັນນັ້ນ ນັກທ່ອງທ່ຽວລາວຈໍານວນບໍ່ໜ້ອຍກໍ່ພາກັນໄປທ່ຽວຈີນເຊັ່ນດຽວກັນ.
(ຂ່າວ-ພາບ: ກະຊວງ ຖວທ)