Target Magazine
ໃນຕອນບ່າຍວັນທີ 23 ກໍລະກົດ 2019 ທີ່ຫ້ອງປະຊຸມໃຫຍ່ ກະຊວງອຸດສາຫະກຳ ແລະ ການຄ້າ, ໄດ້ຈັດພິທີເປີດ ທຶນສົມທົບເພື່ອສົ່ງເສີມທຸລະກິດ (ທສທ) ພາຍໃຕ້ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT) ເຊິ່ງບໍລິສັດໜຶ່ງຈະໄດ້ຮັບທຶນຊ່ວຍເຫຼືອສູງສຸດ 200.000 ໂດລາສະຫະລັດ ຕະຫຼອດໄລຍະ 3 ປີຂອງໂຄງການ. ໂດຍການເຂົ້າຮ່ວມທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ), ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງ ກະຊວງ ອຄ, ທ່ານ ຈ໋ອງ ເບີນາລ໌ ຄາຣາສໂກ ເອກອັກຄະລັດຖະທູດ ອົດສະຕາລີ ປະຈຳລາວ, ມີບັນດາແຂກຖືກເຊີນ ແລະ ພາກສ່ວນທີກ່ຽວຂ້ອງເຂົ້າຮ່ວມ.
ພິທີເປີດໂຄງການທຶນສົມທົບເພື່ອສົ່ງເສີມທຸລະກິດ ພາຍໃຕ້ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT) ໄດ້ເປີດຄັ້ງທຳອິດໃນວັນທີ 15 ກຸມພາ 2019 ທີ່ຜ່ານມາ, ເຊິ່ງເປົ້າໝາຍລວມຂອງໂຄງການແມ່ນເພື່ອຫຼຸດຜ່ອນອຸປະສັກທີ່ມີຕໍ່ການເຕິບໂຕຂອງພາກທຸລະກິດ ໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນໃນການຄ້າ ແລະ ຍົກລະດັບຄວາມສາມາດໃນການແຂ່ງຂັນຂອງຫົວໜ່ວຍທຸລະກິດຂອງລາວ.
ໂຄງການມີຄວາມພະຍາຍາມທີ່ຈະປັບປຸງລະບຽບການຕ່າງໆ ເພື່ອຊ່ວຍຫຼຸດຜ່ອນຄ່່າໃຊ້ຈ່າຍພາຍນອກຂອງບໍລິສັດ, ໂດຍສະເພາະແມ່ນຄ່າໃຊ້ຈ່າຍທີ່ຕິດພັນກັບການກໍ່ສ້າງ ແລະ ດຳເນີນທຸລະກິດ,ບັນຫາທີ່ຕິດພັນກັບການປະຕິບັດສັນຍາ ລວມທັງຄ່າໃຊ້ຈ່າຍໃນການຄ້າຂາຍທີ່ຂ້ອນຂ້າງສູງ, ການປັບປຸງເຫຼົ່ານີ້ແມ່ນສອດຄ່ອງກັບຈຸດປະສົງຂອງຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 02/ນຍ. ແລະ ໂຄງການ BAF ກໍເປັນໜຶ່ງໃນແຜນສະໜັບສະໜູນທີ່ສຳຄັນຂອງລັດຖະບານລາວ. ເປັນໂຄງທີ່ໄດ້ຮັບການສະໜັບສະໜູນຂອງ ທະນາຄານໂລກ, ລັດຖະບານອົດສະຕາລີ ແລະ ລັດຖະບານໄອແລນ, ເຊິ່ງ ຈາກປະສົບການທີ່ດີໃນໄລຍະຜ່ານມາ BAF ໄດ້ສະໜອງທຶນໃຫ້ພາກທຸລະກິດແລ້ວ 208 ບໍລິສັດ ແລະ ຊ່ວຍເຫຼືອໃຫ້ບໍລິສັດເຫຼົ່ານັ້ນສາມາດເພີ່ມຍອດຂາຍພາຍຫຼັງໄດ້ຮັບການຊ່ວຍເຫຼືອ.
ທ່ານ ເຮັນຣີ້ ສເຕັດເຕີ້ ຫົວໜ້າໂຄງການ BAF ໄດ້ກ່າວວ່າ: ຮູບແບບການຊ່ວຍເຫຼືອບັນດາບໍລິສັດ ເພື່ອຂະຫຍາຍທຸລະກິດຂອງໂຄງການນີ້ມີ 2 ຮູບແບບ ຄື: 1. ການບໍລິການໃຫ້ຄຳປຶກສາໂດຍບໍ່ຄິດຄ່າບໍລິການ ເພື່ອຊ່ວຍໃຫ້ຄຳແນະນຳແກ່ບັນດາບໍລິສັດໃນການປັບປຸງການດຳເນີນທຸລະກິດ, ສ້າງຜະລິດຕະພັນ ແລະ ການບໍລິການທີ່ດີກວ່າເກົ່າ ແລະ ສ້າງຄວາມອາດສາມາດໃນການແຂ່ງຂັນໃຫ້ມີຄວາມເຂັ້ມແຂງ ແລະ 2. ໃຫ້ທຶນສົມທົບ 50% ສໍາລັບຄ່າໃຊ້ຈ່າຍໃນການຈັດຈ້າງວິຊາການ ໂດຍທຶນຊ່ວຍເຫຼືອສູງສຸດຕໍ່ 1 ບໍລິສັດ 200.000 ໂດລາສະຫະລັດ ຕະຫຼອດໄລຍະ 3 ປີຂອງໂຄງການ.
ຂັ້ນຕອນການຊ່ວຍເຫຼືອຂອງໂຄງການ ມີດັ່ງນີ້:
1. ການຕິດຕໍ່ຄັ້ງທໍາອິດ: ໂດຍການລົງຢ້ຽມຢາມ ແລະ ໃຫ້ຄໍາແນະນໍາ, ວິເຄາະການຂະຫຍາຍຕົວຂອງທຸລະກິດ, ແຜນການຂະຫຍາຍຕົວຂອງທຸລະກິດ.
2. ແຜນການຂະຫຍາຍຕົວຂອງທຸລະກິດ: ພັດທະນາແຜນການຈັດຕັ້ງປະຕິບັດ, ພົວພັນຜູ້ສະໜອງທາງດ້ານວິຊາການ.
3. ການສະໝັກຂໍທຶນ ແລະ ການອະນຸມັດ: ຂັ້ນຕອນການປະກອບ ແລະ ເອກະສານຂໍທຶນ, ກວດສອບເອກະສານສະໝັກຂໍທຶນ, ອະນຸມັດການຂໍທຶນ.
4. . ການຈັດຕັ້ງປະຕິບັດ: ຈັດຕັ້ງປະຕິບັດກິດຈະກໍາທີ່ຖືກອະນຸມັດ.
5. ການຮ້ອງຂໍຈ່າຍເງິນທົດແທນຄືນ: ຊ່ວຍການກະກຽມຄໍາຮ້ອງຂໍຈ່າຍເງິນທົດແທນຄືນ, ຈ່າຍເງິນທົດແທນຄືນ.
ສຳລັບເງື່ອນໄຂບໍລິສັດທີ່ຈະສະໝັກຂໍທຶນໄດ້ ຄື: ທຸກບໍລິສັດເອກະຊົນທີ່ສະໜອງວຽກເຮັດງານທຳໃຫ້ແກ່ພົນລະເມືອງລາວ ໃນ ສປປ ລາວ, ທຸກບໍລິສັດເອກະຊົນທຸກຂະໜາດທີ່ມີ ຫຼື ຍັງບໍ່ທັນມີການຂຶ້ນທະບຽນເປັນທາງການ, ບໍລິສັດທີ່ມີແມ່ຍິງເປັນເຈົ້າຂອງ ຫຼື ເປັນຜູ້ບໍລິຫານໃຫ້ບຸລິມະສິດພິເສດ, ທຸລະກິດທີ່ສ້າງຄວາມປ່ຽນແປງ, ສ້າງຄວາມສາມາດໃນການແຂ່ງຂັນ ແລະ ທຸລະກິດທີ່ຢູ່ໃນໄລຍະການຂະຫຍາຍຕົວ (ມີແຜນການຂະຫຍາຍຢ່າງຊັດເຈນ, ມີແຜນນຳໃຊ້ນະວັດຕະກຳໃໝ່) ເຊິ່ງທ່ານສາມາດສະໝັກຂໍທຶນ ແລະ ເບິ່ງລາຍລະອຽດທີ່ເວັບໄຊ www.baflaos.com
E-Mail: [email protected]
tel: 020 55542658
