Target Magazine
ປັດຈຸບັນ ສິນຄ້ານຳເຂົ້າຫຼາຍຊະນິດທີ່ຂາຍຢູ່ໃນຕະຫຼາດ ແລະ ຮ້ານຄ້າທົ່ວໄປ ແມ່ນໄດ້ມີການປັບຂຶ້ນເລັກໜ້ອຍ ເພາະສິນຄ້າສ່ວນໃຫຍ່ແມ່ນນຳເຂົ້າຈາກຕ່າງປະເທດ ທີ່ພົວພັນເຖິງອັດຕາແລກປ່ຽນ ເຊິ່ງສົ່ງຜົນກະທົບໂດຍກົງຕໍ່ຊາວຄ້າຂາຍ ແລະ ຜູ້ບໍລິໂພກ.
ໃນວັນທີ 16-17 ກໍລະກົດ 2019 ທີມງານຂ່າວໜັງສືພິມວຽງຈັນໃຫມ່ ໄດ້ລົງເກັບກຳຂໍ້ມູນການຊື້ຂາຍຂອງແມ່ຄ້າຢູ່ຕະຫຼາດໜອງບົວທອງ ເມືອງສີໂຄດຕະບອງ ແລະ ຕະຫຼາດຫົວຂົວ ເມືອງໄຊເສດຖາ ນະຄອນຫຼວງວຽງວັນ ເຫັນວ່າ ແມ່ຄ້າຂາຍເຄື່ອງພົບບັນຫາຂາຍເຄື່ອງບໍ່ໄດ້ດີ ແລະ ມີຜົນກຳໄລໜ້ອຍລົງ ທຽບໃສ່ເມື່ອກ່ອນ ຍ້ອນສິນຄ້ານຳເຂົ້າຈາກຕ່າງປະເທດມີລາຄາແພງຍ້ອນເງິນໂດລາສະຫະລັດ ແລະ ເງິນບາດໄທສູງ ທຽບໃສ່ເງິນກີບ ຜ່ານການສອບຖາມ ນາງ ປື້ມ ວຽງຄຳແກ້ວ ເຈົ້າຂອງຮ້ານຂາຍເຄື່ອງແຫ້ງຕະຫຼາດໜອງບົວທອງ ໃຫ້ຮູ້ວ່າ: ການຈຳໜ່າຍສິນຄ້າປະເພດເຄື່ອງປຸງແຕ່ງອາຫານ ເຊັ່ນ: ແປ້ງນົວ ນ້ຳຕານ ນ້ຳປາ ນ້ຳມັນພືດ ແລະ ອື່ນໆ ແມ່ນໄດ້ປັບລາຄາຂຶ້ນເພີ່ມ 1.000-2.000 ກີບ ເນື່ອງຈາກລາຄາຕົ້ນທຶນສູງຂຶ້ນ ເພາະສິນຄ້າເຫຼົ່ານີ້ແມ່ນສິນຄ້ານຳເຂົ້າຈາກປະເທດໃກ້ຄຽງເຊັ່ນ: ແປ້ງນົວຖົງນ້ອຍ ຈາກລາຄາ 6.000 ກີບໃນເມື່ອກ່ອນມາເປັນ 7.000 ກີບ ນ້ຳປາ 6.000 ກີບ ມາເປັນ 8.000 ກີບ ແລະ ສິນຄ້ານຳເຂົ້າອື່ນໆກໍໄດ້ປັບລາຄາຂຶ້ນເຊັ່ນດຽວກັນ ເຊິ່ງພາຍຫຼັງທີ່ສິນຄ້າໄດ້ປັບລາຄາຂຶ້ນນີ້ ເຫັນວ່າຍອດຈຳໜ່າຍຫຼຸດລົງ.
ນາງ ໂຢດ ມິ່ງບຸບຜາ ເຈົ້າຂອງຮ້ານຂາຍຜັກ ຕະຫຼາດໜອງບົວທອງ ໄດ້ກ່າວວ່າ: ສຳລັບລາຄາຜັກສ່ວນໃຫຍ່ແມ່ນບໍ່ມີຜົນກະທົບ ແລະ ບໍ່ໄດ້ປັບລາຄາຂຶ້ນ ເພາະຜັກສ່ວນໃຫຍ່ທີ່ນຳມາຂາຍແມ່ນຜັກທີ່ປູກຢູ່ພາຍໃນປະເທດ ແຕ່ຈະປັບສະເພາະຜັກທີ່ນຳເຂົ້າຈາກປະເທດໃກ້ຄຽງ ໂດຍປັບໃຫ້ຮູບແບບຫຼຸດປະລິມານລົງແຕ່ຂາຍໃນລາຄາເທົ່າເດີມ ເຊັ່ນ: ຜັກຫ້ອມປ້ອມ ຜັກບົ່ວ ຜັກສະນາລີ ເພື່ອບໍ່ໃຫ້ສົ່ງຜົນກະທົບກັບຜູ້ຊື້ ກໍຄື ຜູ້ບໍລິໂພກ.
ນາງ ຈັນສະແຫວງ ສຸລິວົງ ເຈົ້າຂອງຮ້ານຂາຍອາຫານສຸກ ຕະຫຼາດໜອງບົວທອງ ໄດ້ກ່າວວ່າ: ນັບແຕ່ເງິນບາດໄດ້ປັບສູງຂຶ້ນ ບັນດາຜູ້ປະກອບການຂາຍອາຫານສຸກ ໄດ້ຮັບຜົນກະທົບໂດຍກົງ ເພາະສິນຄ້າເຄື່ອງປຸງແຕ່ງທຸກປະເພດແມ່ນປັບສູງຂຶ້ນ ແຕ່ລາຄາຂາຍແມ່ນບໍ່ສາມາດປັບລາຄາຂຶ້ນໄດ້ ຕ້ອງຂາຍໃນລາຄາເທົ່າເກົ່າ ຂາຍເລີ່ມແຕ່ຖົງລະ 5.000 ກີບຂຶ້ນໄປ ຈຶ່ງສົ່ງຜົນເຮັດໃຫ້ກຳໄລຫຼຸດລົງກວ່າເຄິ່ງໜຶ່ງ ແຕ່ຖ້າປັບລາຄາຂາຍສູງຂຶ້ນ ກໍຈະສົ່ງຜົນໃຫ້ອາຫານສຸກບໍ່ໄດ້ຂາຍ ເພາະລູກຄ້າແມ່ນໄດ້ຄຸ້ນເຄີຍກັບລາຄາຂາຍເກົ່າ ສະນັ້ນ ຈຶ່ງຈຳເປັນຕ້ອງໄດ້ແບກຫາບລາຄາເກົ່າໄວ້ ປັດຈຸບັນມີແຕ່ລໍຄອຍໃຫ້ສິນຄ້າຫຼຸດລົງ ກໍຄື ຄ່າເງິນບາດຫຼຸດລົງເຊັ່ນກັນ.
ຂອບໃຈຂໍ້ມູນຈາກ: ໜັງສືພິມວຽງຈັນໃຫ່ມ
