Target Magazine
ພາຍຫຼັງລັດຖະບານໄດ້ອະນຸມັດໃຫ້ກະຊວງການຕ່າງປະເທດ ດຳເນີນໂຄງການອອກວີຊາຜ່ານລະບົບອີເລັກໂຕຣນິກ ຫຼື eVisa ເພື່ອຄວາມສະດວກ ແລະ ວ່ອງໄວໃຫ້ແກ່ນັກທ່ອງທ່ຽວທີ່ມີຄວາມປະສົງຂໍວີຊາເຂົ້າ ສປປ ລາວ.
ຫຼ້າສຸດ, ໃນວັນທີ 9 ກໍລະກົດ 2019 ກະຊວງການຕ່າງປະເທດ ໂດຍສົມທົບກັບບັນດາພາກສ່ວນທີ່ກ່ຽວຂ້ອງ ໄດ້ຈັດພິທີເປີດການບໍລິການນຳໃຊ້ວີຊາອອນລາຍ (eVisa) ຢ່າງເປັນທາງການ ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ.
ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ກ່າວວ່າ: ມາເຖິງປັດຈຸບັນ ສປປ ລາວ ໄດ້ມີຂໍ້ຕົກລົງຍົກເວັ້ນວີຊາປະເພດຕ່າງໆແບບສອງຝ່າຍ ແລະ ຍົກເວັ້ນຝ່າຍດຽວ ກັບ 46 ປະເທດໃນທົ່ວໂລກ. ພ້ອມດຽວກັນນັ້ນ, ກໍຍັງໄດ້ບໍລິການອອກວີຊາໃຫ້ແກ່ຄົນຕ່າງປະເທດ ທີ່ມີຈຸດປະສົງເຂົ້າມາ ສປປ ລາວ ຜ່ານ ບັນດາສະຖານທູດ, ສະຖານກົງສຸນໃຫຍ່ ແລະ ຫ້ອງການກົງສຸນຂອງ ສປປ ລາວ ຢູ່ຕ່າງປະເທດ ກໍຄືຜ່ານໜ່ວຍງານອອກວີຊາປະຈຳຢູ່ດ່ານສາກົນຕ່າງໆ 21 ດ່ານ ໃນຂອບເຂດທົ່ວປະເທດ ເພື່ອເປັນທາງເລືອກສຳລັບການຂໍວີຊາ ເຂົ້າສປປ ລາວ ຕື່ມອີກ.
ແຕ່ການບໍລິການອອກວີຊາໃຫ້ແກ່ຄົນຕ່າງປະເທດ ຍັງມີຂີດຈຳກັດ ແລະ ບໍ່ທົ່ວເຖິງ, ທັງນີ້ ກໍຍ້ອນຈຳນວນສຳນັກງານຜູ້ຕາງໜ້າ ກໍຄືສະຖານກົງສຸນ ແຫ່ງ ສປປ ລາວ ຢູ່ຕ່າງປະເທດ ຍັງມີຈຳນວນຈຳກັດ, ອັນໄດ້ເຮັດໃຫ້ຂະບວນການຂໍວີຊາເຂົ້າ ສປປ ລາວ ພົບຄວາມຫຍຸ້ງຍາກ, ໂດຍສະເພາະແມ່ນຢູ່ໃນບັນດາປະເທດທີ່ບໍ່ມີສຳນັກງານຕາງໜ້າການທູດລາວເຮົາຕັ້ງຢູ່. ໂດຍປະຕິບັດນະໂຍບາຍເປີດກວ້າງການພົວພັນຮ່ວມມືກັບຕ່າງປະເທດໃນການຍົກລະດັບລະບົບການອອກວີຊາເຂົ້າ ສປປ ລາວ ໄປສູ່ລະດັບທັນສະໄໝ, ວ່ອງໄວ, ມີປະສິດທິພາບ ແລະ ໂປ່ງໃສ ເທື່ອລະກ້າວ ລັດຖະບານ ແຫ່ງ ສປປ ລາວ ຈຶ່ງໄດ້ຕົກລົງໃຫ້ມີການພັດທະນາລະບົບອອກວີຊາອອນລາຍ ເພື່ອເປັນທາງເລືອກໃໝ່ໜຶ່ງອີກໃຫ້ແກ່ຄົນຕ່າງປະເທດ ໂດຍແນໃສ່ຊຸກຍູ້ສົ່ງເສີມການພົວພັນຮ່ວມມືໃນດ້ານຕ່າງໆ ກໍ່ຄືການໄປມາຫາສູ່ ລະຫວ່າງ ຄົນລາວ ແລະ ຄົນຕ່າງປະເທດໃຫ້ມີການຂະຫຍາຍຕົວຍິ່ງຂຶ້ນ.
ລະບົບດັ່ງກ່າວນີ້ຈະໄດ້ນຳໃຊ້ໄປຄຽງຄູ່ກັບລະບົບທີ່ປະຕິບັດຢູ່ໃນປັດຈຸບັນ. ເຊິ່ງທຸກຄົນສາມາດສະເໜີຂໍວີຊາເຂົ້າ ສປປ ລາວ ທາງອອນລາຍໄດ້ທຸກເວລາ ແລະ ທຸກສະຖານທີ່ ທີ່ມີອິນເຕີເນັດ. ລັດຖະບານ ໄດ້ອະນຸຍາດໃຫ້ນໍາໃຊ້ 7 ດ່ານ ຄື: ສະໜາມບິນສາກົນວັດໄຕ; ຂົວມິດຕະພາບ 1; ຂົວມິດຕະພາບ 2; ຂົວມິດຕະພາບ 4; ສະໜາມບິນສາກົນຫຼວງພະບາງ; ສະໜາມບິນສາກົນປາກເຊ ແລະ ດ່ານບໍ່ເຕັນ ເພື່ອເປັນດ່ານໃນການຮອງຮັບ ແລະ ບໍລິການສຳລັບຄົນຕ່າງປະເທດທີ່ນຳໃຊ້ວີຊາອອນລາຍ ເຂົ້າມາ ສປປ ລາວ. ແຕ່ໃນໃນໄລຍະເລີ່ມຕົ້ນຈະເລີ່ມໃຫ້ບໍລິການຢູ່ 2 ບ່ອນກ່ອນຄື: ສະໜາມບິນສາກົນວັດໄຕ ແລະ ຂົວມິດຕະພາບ 1 ນະຄອນຫຼວງວຽງຈັນ-ໜອງຄາຍ, ຊຶ່ງໃນປັດຈຸບັນ ຜູ້ທີ່ໃຊ້ວີຊາອອນລາຍ ສາມາດເຂົ້າ ສປປ ລາວ ໄດ້ ໂດຍຜ່ານ 2 ດ່ານ ຕາມ Website: www.laoevisa.gov.la, ຫຼັງຈາກນັ້ນ, ໃນເວລາອັນໃກ້ນີ້ ຈະຂະຫຍາຍລະບົບໄປສູ່ດ່ານອື່ນທີ່ຍັງເຫຼືອ ຈົນກວ່າສໍາເລັດທັງໝົດ 7 ດ່ານ.
ສ່ວນໄລຍະທີ 2 ຈະໄດ້ມີການຄົ້ນຄວ້າ ແລະ ສະເໜີຂໍອະນຸມັດ ຈາກລັດຖະບານ ໃນການສືບຕໍ່ພັດທະນາ ຢູ່ດ່ານສາກົນອື່ນ ໃນຂອບເຂດທົ່ວປະເທດ, ໂດຍອີງໃສ່ເງື່ອນໄຂ ແລະ ຄວາມຈໍາເປັນຕົວຈິງໃນອະນາຄົດ, ທ່ານ ສະເຫຼີມໄຊ ກົມມະສິດ ກ່າວ.
ທີ່ມາ: ຂ່າວເສດຖະກິດ-ການຄ້າ
