ຣາຊະອານາຈັກໄທປະກາດຫ້າມນຳເຂົ້າ ແລະ ສົ່ງຜ່ານ ໝູ ຫຼື ຜະລິດຕະພັນໝູຊົ່ວຄາວຈາກ ສປປ ລາວ

ກະຊວງກະສິກຳ ແລະ ປ່າໄມ້ໄດ້ອອກແຈ້ງການກ່ຽວກັບການກວດພົບເຊື້ອພະຍາດອະຫິວາໝູອາຟຣິິກາ ຢູ່ເມືອງຕູ້ມລານ ແຂວງສາລະວັນ ເລກທີ 1609/ກປລ, ລົງວັນທີ 20 ມິຖຸນາ 2019 ເພື່ອປ້ອງກັນ ແລະ ສະກັດກັ້ນບໍ່ໃຫ້ພະຍາດອະຫິວາໝູອາຟຣິກາ ແຜ່ລະບາດຢູ່ໃນ ສປປ ລາວ, ເນື່ອງຈາກ ພະຍາດດັ່ງກ່າວແມ່ນພະຍາດລະບາດແຜ່ລາມໄວຢ່າງຮ້າຍແຮງ ແລະ ເປັນຄັ້ງທຳອິດທີ່ກວດພົບຢູ່ ສປປ ລາວ.

ໃນວັນທີ 17 ມິຖຸນາ 2019,​ ສູນວິໄຈພະຍາດສັດ, ກົມລ້ຽງສັດ ແລະ ການປະມົງ ໄດ້ກວດພົບເຊື້ອພະຍາດອະຫິວາໝູອາຟຣິກາ ຈຳນວນ 8 ຕົວຢ່າງ ທີ່ສົ່ງມາກວດຈາກ 7 ບ້ານ ທີ່ມີການລະບາດຄື:​ ບ້ານ ສາມັກຄີໄຊ, ດິນດາກ, ໂພນງາມ, ແກ້ງຮັງ, ນາລະຈາງ, ຫ້ວຍຫວ້າ ແລະ ນາຮ່ອງ ທີ່ຂຶ້ນກັບ ເມືອງຕູ້ມລານ,​ແຂວງ ສາລະວັນ ເຊິ່ງພະຍາດດັ່ງກ່າວເປັນຄັ້ງທຳອິດທີ່ກວດພົບຢູ່ ສປປ ລາວ. ພະຍາດດັ່ງກ່າວເປັນພະຍາດທີ່ຮ້າຍແຮງ ສາມາດຕິດຕໍ່ໃສ່ໝູທຸກຊະນິດ, ທຸກສາຍພັນ, ທຸກອາຍຸ, ທຸກເພດ ແລະ ທຸກໄວ ລວມທັງໝູປ່າ. ພະຍາດນີ້ມີຄວາມທົນທານສູງຕໍ່ສະພາບແວດລ້ອມ, ບໍ່ມີຢາກັນ, ບໍ່ມີຢາປິ່ນປົວໂດຍກົງ, ໝູທີ່ຕິດເຊື້ອພະຍາດນີ້ມີອັດຕາການຕາຍສູງເຖິງ 100% ແຕ່ບໍ່ຕິດໃສ່ຄົນ.

ເພື່ອບໍ່ໃຫ້ພະຍາດແຜ່ລາມອອກສູ່ວົງກ້ວາງ ແລະ ສົ່ງຜົນກະທົບດ້ານລົບຕໍ່ການຜະລິດໝູ ແລະ ການດຳລົງຊີວິດຂອງປະຊາຊົນ ຕ້ອງໄດ້ພ້ອມກັນຕ້ານ ສະກັດກັ້ນ ແລະ ຕອບໂຕ້ພະຍາດໃຫ້ສະຫງົບລົງໂດຍໄວ ເປັນຕົ້ນແມ່ນ ການທຳລາຍໝູທີ່ຕິດເຊື້ອ ຫຼື ສ່ຽງຕໍ່ການຕິດເຊື້ອເພື່ອຕັດວົງຈອນຂອງເຊື້ອພະຍາດດ້ວຍການເຜົາ ຫຼື ຝັງ ໃຫ້ຖືກຕ້ອງຕາມຫຼັກວິຊາການ. ບັນດາແຂວງອ້ອມຂ້າງທີ່ມີຄວາມສ່ຽງ ເປັນຕົ້ນແມ່ນ ແຂວງ ສະຫວັນນະເຂດ, ເຊກອງ, ຈຳປາສັກ ຄວນເຝົ້າລະວັງ ແລະ ຕິດຕາມການແຜ່ລະບາດຂອງພະຍາດດັ່ງກ່າວ.

ນອກຈາກນັ້ນ, ຣາຊະອານາຈັກໄທໄທກໍໄດ້ປະກາດຫ້າມນຳເຂົ້າ ແລະ ສົ່ງຜ່ານ ໝູ ແລະ ຜະລິດຕະພັນໝູຊົ່ວຄາວຈາກ ສປປ ລາວ ເຊິ່ງມີຜົນບັງຄັບໃຊ້ເປັນເວລາ 90 ວັນ ເລີ່ມວັນທີ 22 ມິຖຸນາ 2019 ເປັນຕົ້ນມາ ເພື່ອເປັນການປ້ອງກັນບໍ່ໃຫ້ມີການລະບາດແຜ່ກະຈາຍເຂົ້າສູ່ປະເທດ ເຊິ່ງຈະສົ່ງຜົນກະທົບຕໍ່ອຸດສາຫະກຳການລ້ຽງໝູໃນປະເທດ. ສຳລັບປະເທດເພື່ອນບ້ານອື່ນ ແມ່ນຍັງບໍ່ທັນມີແຈ້ງການຫ້າມນຳເຂົ້າຊົ່ວຄາວ ໝູ ແລະ ຜະລິດຕະພັນໝູຈາກ ສປປ ລາວ.

ຄລິກທີນີ້ເພື່ອເບິ່ງລາຍລະອຽດ ແລະ ແຈ້ງການສະບັບເຕັມຂອງກະຊວງກະສິກຳ ແລະ ປ່າໄມ້
ຄລິກທີນີ້ເພື່ອເບິ່ງລາຍລະອຽດ ແລະ ປະກາດສະບັບເຕັມຂອງຣາຊະອານາຈັກໄທ

ທີ່ມາ: ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ / Lao PDR Trade Portal