Target Magazine
ວັນທີ 20 ມິຖຸນານີ້, ຢູ່ນະຄອນຫຼວງພຽງຢາງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດແຫ່ງ ສປ ຈີນ ໄດ້ພົບປະກັບ ທ່ານ ຄິມຈອງອຶນ ປະທານຄະນະກຳມະການສູນກາງພັກ ແຮງງານເກົາຫລີ ປະທານຄະນະກຳມະການແຫ່ງລັດ ສປປ ເກົາຫລີ.
ທ່ານສີຈິ້ນຜິງກ່າວວ່າ: ນັບແຕ່ປີກາຍນີ້ເປັນຕົ້ນມາ, ຂ້າພະເຈົ້າໄດ້ພົບປະກັບສະຫາຍປະທານ 4 ຄັ້ງ. ຂ້າພະເຈົ້າມາຢ້ຽມຢາມຄັ້ງນີ້ມີຈຸດປະສົງປັບປຸງ ແລະ ສືບທອດມູນເຊື້ອມິດຕະພາບລະຫວ່າງຈີນກັບ ສປປ ເກົາຫລີ ແລະ ຊຸກຍູ້ຂະບວນການແກ້ໄຂບັນຫາແຫຼມເກົາຫລີທາງການເມືອງ. ຂ້າພະເຈົ້າເຊື່ອວ່າ, ຜ່ານຈາກການຢ້ຽມຢາມຄັ້ງນີ້, ພວກເຮົາຍ່ອມຈະສາມາດຮ່ວມກັນສ້າງອະນາຄົດແຫ່ງການພົວພັນຈີນ-ສປປ ເກົາຫລີທີ່ດີງາມ ແລະ ຮ່ວມກັນຂຽນປະຫວັດສາດໜ້າໃໝ່ແຫ່ງມິດຕະພາບລະຫວ່າງສອງປະເທດ.
ທ່ານ ສີຈິ້ນຜິງ ກ່າວຕື່ມວ່າ, ປັດຈຸບັນ, ການພົວພັນຈີນ-ສປປ ເກົາຫລີ ໄດ້ກ້າວເຂົ້າສູ່ໄລຍະປະຫວັດສາດໃໝ່. ຈີນຍິນດີເພີ່ມທະວີການແລກປ່ຽນ ແລະ ຮ່ວມມືກັບ ສປປ ເກົາຫລີ ໃນຂົງເຂດຕ່າງໆ ເຊັ່ນ: ການສຶກສາ, ສາທາລະນະສຸກ, ກິລາ, ສື່ມວນຊົນ, ຊາວໜຸ່ມ, ທ້ອງຖິ່ນ ແລະ ອື່ນໆ ເພື່ອເພີ່ມຄວາມຜາສຸກໃຫ້ແກ່ປະຊາຊົນສອງຊາດ.
ທ່ານ ຄິມຈອງອຶນ ກ່າວວ່າ: ຂ້າພະເຈົ້າຍິນດີຖືການຢ້ຽມຢາມຄັ້ງນີ້ຂອງສະຫາຍເລຂາທິການໃຫຍ່ເປັນໂອກາດທີ່ດີ ເພື່ອຊຸກຍູ້ໃຫ້ ສປປ ເກົາຫລີ ແລະ ຈີນເພີ່ມທະວີການແລກປ່ຽນທາງຍຸດທະສາດ, ລົງເລິກການໄປມາຫາສູ່ບົນຈິດໃຈມິດຕະພາບໃນທຸກຂົງເຂດ ແລະ ຍົກການພົວພັນ ສປປ ເກົາຫລີ-ຈີນຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ສປປ ເກົາຫລີຕີລາຄາຢ່າງສູງຕໍ່ຈີນ ທີ່ໄດ້ເສີມຂະຫຍາຍບົດບາດສຳຄັນໃນຂະບວນການແກ້ໄຂບັນຫາແຫຼມເກົາຫລີ, ຍິນດີສືບຕໍ່ເພີ່ມທະວີການແລກປ່ຽນ ແລະ ປະສານງານກັບຈີນ ເພື່ອປົກປັກຮັກສາສັນຕິພາບ ແລະ ສະຖຽນລະພາບຢູ່ແຫຼມເກົາຫລີ.
ທີ່ມາ: CRI-FM93
