Target Magazine
ກອງປະຊຸມສະຫຼຸບ ຕີລາຄາ ແລະ ຖອດຖອນບົດຮຽນ ວຽກງານພະລັງງານ ແລະ ບໍ່ແຮ່ ປີ 2018 ແລະ ໄຕມາດທີ 1 ປີ 2019 ທົ່ວປະເທດ ຈັດຂຶ້ນວັນທີ 3-4 ມີຖຸນາ 2019 ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ມີບັນດາເຈົ້າແຂວງ ຮອງລັດຖະມົນຕີ ຮອງເຈົ້າແຂວງທົ່ວປະເທດ ຜູ້ຕາງໜ້າຈາກບັນດາກະຊວງ ອົງການຈັດຕັ້ງສາກົນ ຜູ້ປະກອບການດ້ານພະລັງງານ ແລະ ບໍ່ແຮ່ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ຄໍາມະນີ ອິນທິລາດ ກ່າວວ່າ: ບົນພຶ້ນຖານການຈັດຕັ້ງປະຕິບັດແນວທາງຫັນເປັນອຸດສາຫະກໍາ ແລະ ທັນສະໄໝຂອງພັກຊຶ່ງໄດ້ກໍານົດອອກຢູ່ໃນມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ມາເຖິງປັດຈຸບັນ ໄດ້ດຳເນີນການພັດທະນາວຽກງານພະລັງງານແລະບໍ່ແຮ່ ທີ່ມີລັກສະນະເປັນລະບົບຄົບຊຸດ
ມີບາດກ້າວຂະຫຍາຍຕົວທີ່ໜັກແໜ້ນ ຕໍ່ເນື່ອງ ແລະ ມີດ້ານທີ່ໄດ້ຮັບການພັດທະນາຢ່າງກ້າວກະໂດດ ເຊິ່ງລວມຍອດມູນຄ່າການຜະລິດ ຂອງຂະແໜງການພະລັງງານ ແລະ ບໍ່ແຮ່ ປະຈໍາປີ 2018 ບັນລຸໄດ້ 28,247 ຕື້ກີບ ທຽບໃສ່ປີ 2017 ເພີ່ມຂຶ້ນ 11% ເຊິ່ງໄດ້ປະກອບສ່ວນ GDP ແຫ່ງຊາດ 16.8% ໃນນັ້ນຂະແໜງພະລັງງານເພີ່ມຂຶ້ນ 13.5% ແລະ ຂະແໜງບໍ່ແຮ່ ເພີ່ມຂຶ້ນ 7.5%.
ໃນຊຸມປີທີ່ຜ່ານມາ ໄດ້ຮັບຜົນສຳເລັດໃນການພັດທະນາອຸດສາຫະກຳພະລັງງານໄຟຟ້າທີ່ໜັກແໜ້ນຕໍ່ເນື່ອງ ປັດຈຸບັນ ທົ່ວປະເທດມີແຫຼ່ງຜະລິດໄຟຟ້າແລ້ວ 63 ແຫ່ງ ລວມກຳລັງຕິດຕັ້ງ 7,213 ເມກາວັດ ສາມາດຜະລິດກະແສໄຟຟ້າໄດ້ປະມານ 37,035 ລ້ານກິໂລວັດໂມງຕໍ່ປີ ພ້ອມດຽວກັນນີ້ ກໍ່ຍັງມີແຫຼ່ງຜະລິດພະລັງງານໄຟຟ້າທີ່ກຳລັງກໍ່ສ້າງ ແລະ ກໍາລັງຈະລົງມືກໍ່ສ້າງ 37 ແຫ່ງ
ຄາດຄະເນວ່າຈະສໍາເລັດທັງໜົດຮອດປີ 2020-2021 ແລະ ປະເທດລາວເຮົາຈະມີແຫຼ່ງຜະລິດພະລັງງານໄຟຟ້າ 100 ແຫ່ງ ມີກຳລັງຕິດຕັ້ງປະມານ 13,062 ເມກາວັດ ແລະ ມີກຳລັງຜະລິດປະມານ 66.944 ລ້ານກິໂລວັດໂມງຕໍ່ປີ ໃນນີ້ ປະມານ 85% ຈະສົ່ງອອກໄປຈຳໜ່າຍຢູ່ຕ່າງປະເທດ ເຊິ່ງຜົນສຳເລັດທີ່ກ້າວກະໂດດໃນການພັດທະນາດ້ານນີ້ໄດ້ສ້າງເງື່ອນໄຂຕອບສະໜອງການຊົມໃຊ້ພະລັງງານໄຟຟ້າຢູພາຍໃນປະເທດຢ່າງພຽງພໍ ແລະ ການສົ່ງອອກກໍນັບມື້ເພີ່ມຂຶ້ນ.
ປະເທດລາວເຮົາໄດ້ຄາດຄະເນຄວາມຕ້ອງການພະລັງງານໄຟຟ້າໃນຊຸມປີຕໍ່ໜ້າເປັນຕົ້ນແມ່ນຮອດປີ 2020 ສະເພາະການຊົມໃຊ້ຢູ່ພາຍໃນປະເທດ ແມ່ນຍັງມີຄວາມຕ້ອງການປະລິມານທີ່ສູງພໍສົມຄວນ ເພື່ອຮັບໃຊ້ບັນດາໂຄງການຍຸດທະສາດ ໂຄງການບູລິມະສິດຂອງລັດຖະບານເປັນຕົ້ນ: ການພັດທະນາເຂດເສດຖະກິດພິເສດ ເຂດເສດຖະກິດສະເພາະຫຼາຍກວ່າ 10 ແຫ່ງໃນທົ່ວປະເທດ ໂຄງການກໍ່ສ້າງທາງລົດໄຟຄວາມໄວສູງ ໂຄງການກໍ່ສ້າງແຫຼ່ງຜະລິດພະລັງງານໄຟຟ້າ ໂຄງການຂຸດຄົ້ນປຸງແຕ່ງແຮ່ທາດ
ນອກນັ້ນ ລັດຖະບານຍັງໄດ້ມີນະໂຍບາຍກະຕຸ້ນສົ່ງເສີມເສດຖະກິດຂະໜາດນ້ອຍ ຂະໜາດກາງ ຂະໜາດໃຫຍ່ ນັບທັງໂຄງການພັດທະນາຊົນນະບົດ ການພັດທະນາພື້ນຖານໂຄງລາງຄົມມະນາຄົມ-ຂົນສົ່ງ ແລະ ອື່ນໆ ພ້ອມກັນນີ້ລັດຖະບານກໍໄດ້ມີສັນຍາຮ່ວມມືສຶກສາຄວາມເປັນໄປໄດ້ໃນການ ຊື້-ຂາຍ ແລະ ແລກປ່ຽນ ພະລັງງານໄຟຟ້າກັບບັນດາປະເທດໃກ້ກ້ຄຽງ ເຊັນ: ສສ ຫວຽດນາມ ໄທ ມາເລເຊຍ ເຂດບໍລິເວນຊາຍແດນລະຫວ່າງ ສສປ ລາວ-ປະເທດກໍາປູເຈຍ ເຂດບໍລິເວນຊາຍແດນລະຫວ່າງ ສສປ ລາວ-ປະເທດມຽນມາ ແລະ ສປ ຈີນ.
ປະຈຸບັນການພັດທະນາລະບົບສາຍສົ່ງ ແລະ ສະຖານີ ກໍໄດ້ຮັບການພັດທະນາເປັນລະບົບຄົບຊຸດສົມຄວນ ແລະ ມີການຂະຫຍາຍຕົວທີ່ວ່ອງໄວ ເຊິ່ງມາຮອດປັດຈຸບັນ ລະບົບສາຍສົ່ງແຮງດັນສູງແຕ່ລະປະເພດ ແຮງດັນກາງ ແລະ ແຮງດັນຕໍ່າ ເຊິ່ງໄດ້ຮັບການກໍ່ສ້າງ ແລະ ນໍາໃຊ້ແລ້ວ ມີຄວາມຍາວເຖິງ 62,000 ກວ່າກິໂລແມັດວົງຈອນ ແລະ ມີສະຖານີຈ່າຍໄຟຟ້າ 70 ແຫ່ງ ພ້ອມດຽວກັນນີ້ ການພັດທະນາວຽກງານໄຟຟ້າຊົນນະບົດ ຕິດແໜ້ນກັບການພັດທະນາຊົນນະບົດ
ການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ບົນພື້ນຖານຖືເອົາການຂະຫຍາຍຕາງໜ່າງໄຟຟ້າໄປສູ່ຊົນນະບົດ ຂຶ້ນໄປຫາເຂດພູດອຍ ເຂດຫ່າງໄກສອກຫຼີກ ເຂດພື້ນຖານການປະຕິວັດໃນສະໄໝກູ້ຊາດເປັນແຜນງານບູລິມະສິດ ໃນການພັດທະນາໄຟຟ້າຢູ່ປະເທດເຮົາໃນໄລຍະໃໝ່ ເຊິ່ງມາຮອດປັດຈຸບັນນີ້ 90% ຂອງຈໍານວນບ້ານ ແລະ 95% ຂອງຈຳນວນຄົວເຮືອນໃນທົ່ວປະເທດໄດ້ຊົມໃຊ້ໄຟຟ້າຢ່າງຖາວອນ.
ການສັງລວມວຽກງານຈັດສັນ-ຍົກຍ້າຍ ໄດ້ທັງໜົດ 200 ກວ່າໝູ່ບ້ານ ມີ 12,000 ກວ່າຄອບຄົວໃນທົ່ວປະເທດປະມານ 60,000 ກວ່າຄົນ ແລະ ນໍາໃຊ້ທຶນເຂົ້າໃນການຈັດສັນ-ຍົກຍ້າຍແລະຍັບຍ້າຍປະມານ 500 ກວ່າລ້ານໂດລາສະຫະລັດ ຫຼື ປະມານ 4,336 ຕື້ກີບ ເຊິ່ງເປັນທຶນຂອງການພັດທະນາໂຄງການປະກອບສ່ວນ ນອກນັ້ນຍັງໄດ້ສ້າງວຽກເຮັດງານທໍາໃຫ້ຄົນລາວ 100,000 ກວ່າຕໍ່າແໜ່ງງານ ໃນນີ້ ໄດ້ຍົກລະດັບສີມືແຮງງານຄົນລາວ ໃຫ້ເທົ່າທຽມກັບສາກົນຫຼາຍກວ່າ 10.000 ຕໍາແໜ່ງງານ
ເຊິ່ງປະຈຳຢູ່ໂຄງການຂະໜາດໃຫຍ່ ເຊັ່ນ: ໂຄງການບໍ່ຄໍາ-ທອງ ເຊໂປນ ພູເບ້ຍ ເຂື່ອນນໍ້າເທີນ 2 ໂຮງໄຟຟ້າຄວາມຮ້ອນຫົງສາ ເຂື່ອນໄຟຟ້ານໍ້າຂອງໄຊຍະບູລີ ເຂື່ອນເທີນຫີນບູນ ນໍ້າເທີນ 1 ນໍ້າງຽບ 1 ແລະ ໂຄງການອຶ່ນໆ ນອກຈາກວຽກງານຈັດສັນ-ຍົກຍ້າຍແລ້ວ ຜູ້ພັດທະນາໂຄງການ ສືບຕໍ່ຈັດສັນ-ຟື້ນຟູຊີວິດການເປັນຢູ່ຂອງປະຊາຊົນທີ່ຖືກຜົນກະທົບຈາກໂຄງການເພື່ອຮັບປະກັນໃຫ້ໄດ້ຮັບການຊ່ວຍເຫຼືອ ແກ້ໄຂຢ່າງເໝາະສົມ.
ປະຈຸບັນ ສປປ ລາວ ສາມາດຄົ້ນພົບຈຸດປາກົດແຮ່ທາດໄດ້ຫຼາຍກວ່າ 570 ຈຸດ ໃນຂອບເຂດເນື້ອທີ່ປະມານ: 162,104 ກິໂລຕາແມັດ ເທົ່າກັບ 70% ຂອງເນື້ອທີ່ທົ່ວປະເທດ ປະຈຸບັນມີ 271ບໍລິສັດ ມີ 424 ກິດຈະການ ໃນນີ້ ບັນດາບໍລິສັດທີ່ພວມດຳເນີນການຊອກຄົ້ນແລະສຳຫຼວດມີ 151 ບໍລິສັດມີ 239 ກິດຈະການ ແລະ ບໍລິສັດທີ່ກະກຽມແລະ ດຳເນີນການຂຸດຄົ້ນ ມີ 120 ບໍລິສັດ ມີ 185 ກິດຈະການ ປະເພດແຮ່ທາດທີ່ອອກອະນຸຍາດຂຸດຄົ້ນ ມີ 28 ປະເພດຄື:
ຄໍາ ທອງ ເງິນ ກົ່ວ ເຫຼັກ ແກ້ວຊັບຟາຍ ຫີນປູນ ດິນໜຽວ ກາແນັດ ຖ່ານຫີນ ຖ່ານຕົມ ຂີ້ເຈຍ ຫີນກຣານິດ ໂດໂລໄມ ຫີນບາຊານ ມັງການ ຫີນຊາຍ ຫີນກວາສ໌ ດິນແດງ ຟູອໍລາຍ ບາຣິດ ເກືອກິນ ເກືອໂປຕາສ໌ ມາເຢຊຽມ ຫີນກາບໂບຣ ດີໂອລິດ ຣີໂອຣິດ ຫີນດີໂອໄລຕູບ ພ້ອມດຽວກັນນີ້ ໃນປີ 2018 ການຈັດເກັບລາຍຮັບເຂົ້າງົບປະມານແຫ່ງຊາດ ຂອງຂະແໜງການພະລັງງານ ແລະ ບໍ່ແຮ່ ປະຕິບັດໄດ້ 316.3 ລ້ານ ຫຼື ປະມານ 27,437.23 ຕື້ກີບ ໃນນີ້ ຂະແໜງພະລັງງານປະຕິບັດໄດ້ 230,6 ລ້ານໂດລາ ປະມານ 1,999.45 ຕື້ກີບ ແລະ ຂະແໜງບໍ່ແຮ່ 85.7 ລ້ານໂດລາ ປະມານ 7,431 ຕື້ກີບ
ກອງປະຊຸມຄັ້ງນີ້ ໃນຕະຫຼອດໄລຍະເວລາຂອງການດຳເນີນກອງປະຊຸມຈະໄດ້ພ້ອມກັນສະຫຼຸບ ຕີລາຄາ ຖອດຖອນບົດຮຽນສະພາບການພັດທະນາວຽກງານພະລັງງານ ແລະ ບໍ່ແຮ່ ໃນປີ 2018 ທີ່ຜ່ານມາຕິດພັນກັບການສະຫຼຸບສະພາບການປະຕິບັດແຜນພັດທະນາພະລັງງານ ແລະ ບໍ່ແຮ່ໄລຍະກາງສະໄໝ ຂອງແຜນ 5 ປີຄັ້ງທີ VIII ພ້ອມດຽວກັນນີ້ ກໍຈະໄດ້ພ້ອມກັນຄົ້ນຄວ້າ ປຶກສາຫາລືເພື່ອກໍານົດທິດທາງ ໜ້າທີ່ ແລະ ລະດັບຄາດໝາຍສໍາລັບປີ 2019
ປຶກສາຫາລືກັນເພື່ອປັບປຸງເພີ່ມເຕີມບາງໜ້າທີ່ ຄາດໝາຍໃນໄລຍະທ້າຍຂອງແຜນການ 5 ປີ ແນໃສ່ເພື່ອສູ້ຊົນບັນລຸຄາດໝາຍ ເຊິ່ງໄດ້ກໍານົດໄວ້ຢູ່ໃນແຜນພັດທະນາວຽກງານພະລັງງານ ແລະ ບໍ່ແຮ່ ໄລຍະປີ 2016-2020 ໃນແຕ່ລະດ້ານໃຫ້ເປັນອັນລະອຽດ ເປັນລະບົບຄົບຊຸດ ໃຫ້ສອດຄ່ອງກັບ ສະພາບເສດຖະກິດ-ສັງຄົມ ໃນໄລຍະໃໝ່.
