Target Magazine
ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ສໍາເລັດການເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຄັ້ງທີ 25, ພາຍໃຕ້ຫົວຂໍ້: “ຄົ້ນຫາລະບຽບໂລກແບບໃໝ່ ເພື່ອແກ້ໄຂຄວາມວຸ້ນວາຍໃນໂລກ (Seeking a new global order-overcoming the chaos)”, ໃນວັນທີ 30-31 ພຶດສະພາ 2019, ທີ່ ນະຄອນຫຼວງໂຕກຽວ, ປະເທດ ຍີ່ປຸ່ນ.
ໃນກອງປະຊຸມຄັ້ງນີ້, ພະນະທ່ານນາຍົກລັດຖະມົນຕີ ໄດ້ຂຶ້ນກ່າວປາໄສ ໂດຍໄດ້ຍົກໃຫ້ເຫັນເຖິງສະພາບການຄວາມວຸ້ນວາຍສັບສົນທີ່ພວມເກີດຂຶ້ນໃນປະຈຸບັນ ແລະ ໄດ້ສະແດງທັດສະນະ ແລະ ວິໄສທັດ ເພື່ອແກ້ໄຂຄວາມຫຍຸ້ງຍາກສັບສົນດັ່ງກ່າວ ດ້ວຍຂໍ້ລິເລີ່ມ ແລະ ກົນໄກການຮ່ວມມື ທີ່ມີຄວາມຍຸຕິທໍາ, ໂປ່ງໃສ່, ເທົ່າທຽມກັນ ແລະ ບໍ່ຂຶ້ນກັບປະເທດໃດໜຶ່ງ ຫຼື ກຸ່ມເສດຖະກິດໃດໜຶ່ງ ບົນພື້ນຖານການມີສ່ວນຮ່ວມຂອງປະຊາຄົມໃນທົ່ວໂລກ ເພື່ອຈະນໍາພາໂລກນີ້ ກ້າວໄປສູ່ໂລກແຫ່ງໂລກາພິວັດທີ່ມີຄຸນນະພາບສູງ, ຍືນຍົງມີຄວາມສະເໝີພາບ, ມີຜົນປະໂຫຍດຮ່ວມກັນ ແລະ ຄົງຮັກສາໄວ້ສັນຕິພາບ, ສະຖຽນລະພາບ ແລະ ຄວາມໝັ້ນຄົງໃນໂລກ.
ໃນໂອກາດດັ່ງກ່າວ ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະເຮັດວຽກກັບ ພະນະທ່ານ ຊິນໂຊ ອາເບະ, ນາຍົກລັດຖະມົນຕີ ຍີ່ປຸ່ນ, ເຊິ່ງໄດ້ແລກປ່ຽນຄໍາຄິດເຫັນ ກ່ຽວກັບ ການຮ່ວມມືສ່ອງຝ່າຍ ແລະ ຫຼາຍຝ່າຍ, ປຶກສາຫາລື ເພື່ອເພີ່ມທະວີຮັດແໜ້ນການຮ່ວມມືສອງຝ່າຍ ກໍ່ຄື ທິດທາງການຮ່ວມມືໃນຕໍ່ໜ້າ.
ນອກຈາກນັ້ນ, ຝ່າຍລາວ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງ ກອງປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 10 ພາຍໃຕ້ການເຈົ້າພາບຂອງຍີ່ປຸ່ນ ໃນເດືອນຕຸລາ 2018 ທີ່ ນະຄອນຫຼວງໂຕກຽວ ໃນໄລຍະຜ່ານມາ ແລະ ທັງສອງຝ່າຍຈະສືບຕໍ່ຮ່ວມມືກັນຈັດຕັ້ງປະຕິບັດຍຸດທະສາດໂຕກຽວ 2018 ເພື່ອການຮ່ວມມືແມ່ນ້ຳຂອງ-ຍີ່ປຸ່ນ (Tokyo Strategy 2018 for Mekong-Japan Cooperation) ໃຫ້ປະສົບຜົນສຳເລັດ.
ພ້ອມດຽວກັນນີ້, ຍັງໄດ້ມີພິທີລົງນາມເອກະສານແລກປ່ຽນ 2 ສະບັບຄື: ໂຄງການພັດທະນາຊັບພະຍາກອນມະນຸດ, ມີມູນຄ່າ 308 ລ້ານເຢນ, ເຊິ່ງແມ່ນໂຄງການຊ່ວຍເຫຼືອລ້າ ຂອງລັດຖະບານຍີ່ປຸ່ນ ແລະ ການປັບປຸງສົນທິສັນຍາຂົນສົ່ງທາງອາກາດສອງຝ່າຍ ສປປ ລາວ ແລະ ຍີ່ປຸ່ນ.
ຮ່ວມລົງນາມເອກະສານດັ່ງກ່າວໂດຍ ທ່ານ ວິໂຣດ ສຸນດາຣາ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ຍີ່ປຸ່ນ, ຕາງໜ້າລັດຖະບານລາວ ແລະ ທ່ານ ຕາເກຊິ ຮິກິຣາລະ, ເອກອັກຄະຣາຊະທູດ ຍີ່ປຸ່ນ ປະຈໍາ ສປປ ລາວ, ຕາງໜ້າລັດຖະບານຍີ່ປຸ່ນ ໂດຍການເປັນສັກຂີພິຍານຂອງ ສອງທ່ານນາຍົກລັດຖະມົນຕີ ແຫ່ງ ສປປ ລາວ ແລະ ຍີ່ປຸ່ນ.
ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ຍັງໄດ້ໃຫ້ສໍາພາດຕໍ່ໜັງສືພິມ ແລະ ໂທລະພາບ ນິກເກ ກ່ຽວກັບ ສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ໃນປະຈຸບັນ ແລະ ທັດສະນະ ຕໍ່ການພົວພັນຮ່ວມມືລະຫວ່າງ ສປປ ລາວ ກັບ ບັນດາປະເທດຕ່າງໆໃນພາກພື້ນ ລວມທັງຍີ່ປຸ່ນໃນປະຈຸບັນ ກໍ່ຄື ໃນອະນາຄົດ ແລະ ຕ້ອນຮັບການເຂົ້າຢ້ຽມຂໍ່ານັບຂອງ ປະທານອົງການ JETRO, ແລະ ບໍລິສັດ ຂອງຍີ່ປຸ່ນຈໍານວນໜຶ່ງ.
ການເຄື່ອນໄຫວຂອງ ພະນະທ່ານ ນາຍົກລັດຖະມົນຕີ ຢູ່ປະເທດຍີ່ປຸ່ນ ໃນເທື່ອນີ້ ເປັນກາລະໂອກາດອັນດີ ໃນການປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ກໍຄື ການເປັນຄູ່ຮ່ວມມືຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ກວ້າງຂວາງແໜ້ນແຟ້ນ ແລະ ເລິກເຊິ່ງຂຶ້ນກວ່າເກົ່າ, ໂດຍສະເພາະການດຶງດູດການລົງທຶນຈາກຍີ່ປຸ່ນ ໃຫ້ນັບມື້ນັບຫຼາຍຂຶ້ນ.
