Target Magazine
ໃນສະພາບອາດກາດທີ່ຮ້ອນອົບເອົ້າ ມັນໄດ້ສົ່ງຜົນກະທົບຫຼາຍຢ່າງຕໍ່ສິ່ງທີ່ມີຊີວິດຢູ່ໃນໂລກ ໃນນັ້ນ ກໍມີຜົນກະທົບຕໍ່ຜູ້ຊົມໃຊ້ໄຟຟ້າ ໃນໄລຍະທີ່ກ້າວເຂົ້າສູ່ລະດູແລ້ງທີ່ອາກາດຮ້ອນອົບເອົ້າຢູ່ປະເທດເຮົາ ກໍຄື ຢູ່ນະຄອນຫຼວງວຽງຈັນ ທີ່ເປັນຕົວເມືອງໃຫຍ່ການຊົມໃຊ້ໄຟຟ້າເປັນບັນຫາສຳຄັນ ແລະ ຂາດບໍ່ໄດ້ ເມື່ອອາກາດຮ້ອນແນ່ນອນການຊົມໃຊ້ເຄື່ອງໄຟຟ້າກໍເພີ່ມຂຶ້ນເປັນຕົ້ນ ແອ, ພັດລົມ ແລະ ອື່ນໆ ເພື່ອສະດວກໃຫ້ແກ່ການດຳລົງຊີວິດປະຈຳວັນຂອງຄົນເຮົາ ໂດຍສະເພາະ ເດືອນເມສາຜ່ານມາ ຜູ້ຊົມໃຊ້ໄຟຟ້າຫຼາຍຄົນມີການຈົ່ມວ່າໄປໃນຫຼາຍແງ່ຫຼາຍມູມ ອອກມາວ່າຄ່າໄຟຟ້າສູງຜິດປົກກະຕິທຽບໃສ່ໄລຍະຜ່ານມາ ທັງໆທີ່ເຄື່ອງໃຊ້ຍັງຄືເກົ່າບໍ່ມີການປ່ຽນແປງ ແຕ່ຄ່າກະແສໄຟຟ້າໃນເດືອນຜັດມີການປ່ຽນແປງຕົວເລກເງິນສູງສອງເທົ່າ ສາມເທົ່າຕົວ ຈາກສະພາບດັ່ງກ່າວນັ້ນ ຫຼາຍຄົນໄດ້ເອົາລົງທາງສື່ອອນລາຍ ເປັນຕົ້ນ ເຟສບຸກແບບເວົ້າໄປຕາມພາສາຄວາມເຂົ້າໃຈຂອງຕົນເອງ ທີ່ເປັນທາງລົບໃຫ້ແກ່ໄຟຟ້າລາວ ກໍຄື ໄຟຟ້ານະຄອນຫຼວງວຽງຈັນ.
ທ່ານ ເຄນ ເທບວົງສາ ຜູ້ຊ່ວຍຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ມະຫາຊົນ ຫົວໜ້າຝ່າຍປະຕິບັດການໄຟຟ້ານະຄອນຫຼວງວຽງຈັນ ໄດ້ໃຫ້ສຳພາດ ວັນທີ 22 ພຶດສະພາ 2019 ວ່າ: ສາເຫດທີ່ພາໃຫ້ຄ່າກະແສໄຟຟ້າຜູ້ຊົມໃຊ້ສູງໃນໄລຍະເດືອນມີນາຫາເດືອນເມສາ 2019 ນັ້ນ ຍ້ອນສະພາບອາກາດຮ້ອນອົບເອົ້າ ຈຶ່ງເຮັດໃຫ້ການຊົມໃຊ້ໄຟຟ້າຂອງແຕ່ລະຄົວເຮືອນ ສຳນັກງານ ອົງການ ແລະ ຫົວໜ່ວຍທຸລະກິດເພີ່ມຂຶ້ນ.
ສະເພາະການຊົມໃຊ້ໄຟຟ້າທີ່ຢູ່ອາໄສ ແມ່ນປະຕິບັດການເສຍຄ່າໄຟຟ້າ 6 ຂັ້ນ ຖ້າທຽບເດືອນມີນາໃສ່ເດືອນກຸມພາຂັ້ນ 1 ແຕ່ 0-25 ບໍ່ໄດ້ເພີ່ມຂັ້ນ 2 ແຕ່ 26-150 ເພີ່ມຂຶ້ນ 2% ຂັ້ນ 3 ແຕ່ 151-300 ເພີ່ມ 10% ຂັ້ນ 4 ແຕ່ 301-400 ເພີ່ມ 20,5% ຂັ້ນ 5 ແຕ່ 401-500 ເພີ່ມ 24% ແລະ ຂັ້ນ 6 ແຕ່ 500 ຂຶ້ນໄປເພີ່ມ 29% ທຽບໃສ່ລະດູການຂ້າມຜ່ານລະດູຝົນຫາລະດູແລ້ງ ແມ່ນເພີ່ມຂຶ້ນຍ້ອນລະດູແລ້ງອາກາດຮ້ອນຫຼາຍ ແຕ່ລະຄົວເຮືອນຈະໃຊ້ເກີນຕົວຂັ້ນ 6 ໃຫຍ່ກວ່າ 500 ກິໂລວັດໂມງ ຈຶ່ງເປັນສາເຫດເຮັດໃຫ້ຄ່າກະແສໄຟຟ້າສູງໃນເດືອນເມສາຜ່ານມາຄື: ຂັ້ນ 1 ລາຄາ 348 ກີບ ຂັ້ນ 2 ລາຄາ 414 ກີບ ຂັ້ນ 3 ລາຄາ 799 ກີບ ຂັ້ນ 4 ລາຄາ 880 ກີບ ຂັ້ນ 5 ລາຄາ 965 ກີບ ແລະ ຂັ້ນ 6 ລາຄາ 999 ກີບຕໍ່ກິໂລວັດໂມງ ສຳລັບເດືອນເມສາທຽບໃສ່ເດືອນມີນາຄື: ຂັ້ນ 1 ເພີ່ມຂຶ້ນ 1,5% ຂັ້ນ 2 ເພີ່ມຂຶ້ນ 7% ຂັ້ນ 3 ເພີ່ມຂຶ້ນ 24% ຂັ້ນ 4 ເພີ່ມຂຶ້ນ 34% ຂັ້ນ 5 ເພີ່ມຂຶ້ນ 42% ແລະ ຂັ້ນ 6 ເພີ່ມຂຶ້ນ 150% ເຮົາສັງເກດເຫັນວ່າແຕ່ລະຂັ້ນໄດ້ເພີ່ມຂຶ້ນເປັນຈຳນວນຫຼາຍສົມຄວນ ໃນທົ່ວນະຄອນຫຼວງ ມີໝໍ້ນັບໄຟທີ່ຢູ່ອາໄສທັງໝົດ 304.928 ໜ່ວຍ ແລະ ມີລູກຄ້າ 303.501 ລູກຄ້າ ສະເພາະໃນເດືອນເມສາການຊົມໃຊ້ໄຟຟ້າເພີ່ມຂຶ້ນ 26% ກໍຍ້ອນຫຼາຍຄົວເຮືອນຊົມໃຊ້ໄຟຟ້າເປີດແອ ແລະ ພັດລົມເພີ່ມເວລາຂຶ້ນ ນອກນີ້ຄວາມຮ້ອນຍັງເຮັດໃຫ້ການຕົກເຮ່ຍກະແສໄຟຟ້າຢູ່ຕາມສາຍໄຟຕື່ມອີກ ສ່ວນລາຄາໄຟຟ້າແມ່ນຍັງປະຕິບັດຕາມລາຄາເກົ່ານັບແຕ່ປີ 2017 ເປັນຕົ້ນມາ ດັ່ງນັ້ນ ຈຶ່ງແຈ້ງມາຍັງສັງຄົມ ກໍຄື ຜູ້ຊົມໃຊ້ໄຟຟ້າຈົ່ງເຂົ້າໃຈວ່າ ການເພີ່ມຂຶ້ນບໍ່ແມ່ນຍ້ອນການຂຶ້ນຄາລາຄ່າໄຟຟ້າ ຍ້ອນການຊົມໃຊ້ໄຟຟ້າເພີ່ມຂຶ້ນ ແຕ່ເຖິງຢ່າງໃດກໍຕາມ ຖ້າຫາກຜູ້ຊົມໃຊ້ໄຟຟ້າຫາກມີຄວາມສົງໄສວ່າລາຄາໄຟຟ້າຂອງຕົນສູງຜິດປົກກະຕິ ກໍສາມາດແຈ້ງຫຼືສະເໜີມາຍັງໄຟຟ້ານະຄອນຫຼວງ ເພື່ອຈະໄດ້ລົງໄປກວດກາເບິ່ງສະພາບຕົວຈິງ ເພື່ອຄວາມໂປ່ງໃສສອງຝ່າຍ
ຂອບໃຈຂໍ້ມູນຈາກ: ນສພ ວຽງຈັນໃຫ່ມ
