ໃນວັນທີ 21 ພຶດສະພາ 2019 ທີ່ນະຄອນຫຼວງວຽງຈັນ, ທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີ ກະຊວງການເງິນ ໄດ້ຕ້ອນຮັບ ທ່ານ ນາງ ອີເຕີລີ ຄຣີນເທັດ ຫົວໜ້າຄະນະປະເມີນ ເສດຖະກິດມະຫາພາກ ອົງການກອງທຶນ ການເງິນສາກົນ ຫຼື IMF ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໂອກາດດັ່ງກ່າວ, ທ່ານ ສົມດີ ດວງດີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ ທ່ານ ນາງ ອີເຕີລີ ຄຣີນເທັດ ທີ່ໄດ້ນຳພາຄະນະ ເດີນທາງມາຢ້ຽມຢາມ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນ ເຂົ້າໃນການຮັດແໜ້ນ ການພົວພັນຮ່ວມມື ລະຫວ່າງ ສປປ ລາວ ແລະ ອົງການກອງທຶນການເງິນສາກົນ ຫຼື IMF ທີ່ໄດ້ໃຫ້ການສະໜັບສະໜູນ ຊ່ວຍເຫຼືອແກ່ ສປປ ລາວ ໂດຍສະເພາະ ໃນການຊຸກຍູ້ ການເຕີບໂຕ ທາງດ້ານເສດຖະກິດ, ເຊິ່ງລັດຖະບານ ສ ປປ ລາວ ໄດ້ຈັດຕັ້ງປະຕິບັດວິໄສທັດ 2030 ແລະ ຍຸດທະສາດ 2025 ແລະ ແຜນພັດທະນາເສດຖະ ກິດ-ສັງຄົມ ໄລຍະ 5 ປີ ຄັ້ງທີ 8 ສໍາລັບສົກ 2016-2020. ດ້ານການພັດທະນາເສດຖະກິດ-ການເງິນ ກໍໄດ້ມີການວາງນະໂຍບາຍ ແລະ ກົນໄກໃນການຊຸກຍູ້ ເພື່ອຮັກສາສະຖຽນລະພາບ ຂອງເສດຖະກິດມະຫາພາກ, ປັບປຸງສະພາບແວດລ້ອມ ທີ່ເອື້ອອໍານວຍໃຫ້ແກ່ການຄ້າ ແລະ ການລົງທຶນ ເພື່ອສາມາດ ເຊື່ອມໂຍງ ເຂົ້າກັບເສດຖະກິດ ພາກພື້ນ ແລະ ສາກົນ.
ພ້ອມນີ້, ທ່ານ ນາງ ອີເຕີລີ ຄຣີນເທັດ ໄດ້ສະແດງຄວາມຂອບໃຈຕໍ່ ທ່ານ ຮອງນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງມາຢ້ຽມ ຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ໃຫ້ທ່ານຮອງນາຍົກລັດຖະມົນຕີ ຮັບຊາບຕື່ມອີກ.
ທີ່ມາ: ຂ່າວສານປະເທດລາວ
ຂ່າວ ສົມຫວັງ ພາບ ອ່າຍຄຳ