ການແຂ່ງຂັນບານເຕະລາຍການ Bangamata U-19 Women’s International Gold Cup 2019 ຮອບຮອງຊະນະເລີດ ໃນວັນຈັນ 29 ເມສາ 2019 ເວລາ 19:00
ທີມຊາດລາວ ສາມາດເອົາຊະນະ ທີມຊາດ ຄີກິສຖານ 7-1 ໂດຍທີມຊາດລາວ ໄດ້ປະຕູຈາກ: ເບີ 8 ເປ້ ພົມພັກດີ 4 ປະຕູ ນາທີ 9,21,86, 89 ຈຸດໂທດ , ເບີ 11 ວາດີ ອິນທີຍາ 1 ປະຕູ ນາທີ 57, ເບີ 9 ມົນທິບ ສີສະເກດ 1 ປະຕູ ນາທີ 74 ແລະ ເບີ 5 ຫຼ້ານ້ອຍ ວົງສິງຄຳ 1 ປະຕູ 90+2 ຂະນະ ທີ່ ຄີກິສຖານ ໄດ້ປະຕູຈາກ: Aiturgan ນາທີ 43.
ສຳລັບນັກເຕະດີເດັ່ນໃນນັດນີ້ຍັງຕົກເປັນຂອງ ເປ້ ພົມພັກດີ ໂດຍ ຍິງໄດ້ທັງໝົດ 8 ປະຕູ ໃນລາຍການດັ່ງກ່າວໄດ້ຮັບເງິນ 500 $ ລວມ 3 ນັດ ໄດ້ຮັບເງິນ 1500 $.ຈາກໄຊຊະນະດັ່ງກ່າວສົ່ງຜົນໃຫ້ທີມຊາດຍິງ ລາວ ຮຸ່ນ ອາຍຸບໍ່ເກີນ 19 ປີ ຜ່ານເຂົ້າຊີງຊະນະເລີດ ລໍຖ້າພົບກັບ ບັງກະລາເທດ ຫຼື ມົງໂກລີ ເຊິ່ງຈະແຂ່ງຂັນໃນວັນອັງຄານ 30 ເມສາ 2019.
ຫຼັງເກມ ທ່ານ ວົງມີໄຊ ສຸບົວຄຳ ຫົວໜ້າຄູເຝິກ ໄດ້ກ່າວວ່າ: ” ດີໃຈຫຼາຍສຳລັບເກມການແຂ່ງຂັນນັດນີ້ທີ່ນັກກິລາເຮົາຫຼິ້ນຕາມເຕັກນິກ ແລະ ພວກເຮົາສາມາດເປັນໄປຕາມເປົ້າໝາຍໄດ້,
ນັດຊີງຊະນະເລີດຈະເປັນຢແບບໃດ ກໍຂໍໃຫ້ແຟນບານລາວຊ່ວຍເຊຍ, ຕອນນີ້ເປົ້າໝາຍຂອງພວກເຮົາ ແມ່ນເຮັດສຳເລັດແລ້ວ ນັດຊີງຊະນະເລີດພວກເຮົາເຕັມທີ່ ຮ້ອຍເປີເຊັນ ຈະໄດ້ບໍ່ໄດ້ມັນເປັນເລື້ອງໜຶ່ງ ແຕ່ພວກເຮົາເຕັມທີ່ຮ້ອຍເປີເຊັນທີ່ຢ່າງແນ່ນອນ ”.
ຂະນະທີ່, ເປ້ ພົມພັກດີ ນັກກິລາ ກອງໜ້າທີມຊາດລາວ ທີ່ຍິງໄດ້ 4 ປະຕູໃນນັດດັ່ງກ່າວ ໄດ້ກ່າວວ່າ: ” ຮູ້ສຶກດີໃຈທີ່ນຳພາທີມຊາດລາວ ຜ່ານເຂົ້າສູ່ຮອບຊີງຊະນະເລີດ ຈະພະຍາຍາມຫຼິ້ນໃຫ້ດີທີ່ສຸດໃນນັດຊີງຊະນະເລີດ, ຫຼິ້ນຕາມເຕັກຕິກຂອງຄູເຝິກທີ່ວາງອອກ ແລະ ຂອບໃຈເພື່ອນຮ່ວມທີມ ”.
ຮອບຊີງຊະນະເລີດຈະມີຂຶ້ນໃນວັນສຸກ 03 ພຶດສະພາ 2019 ແຂ່ງຂັນຢູ່ທີ່ສະໝາມກິລາ Bangabandhu National Stadium, Dhaka.
ທີ່ມາ : Lao Football Federation