Target Magazine
ບໍລິສັດ ຫຼັກຊັບລ້ານຊ້າງມະຫາຊົນຮ່ວມກັບ ບໍລິສັດ ຫຼັກຊັບ ທຄຕລ-ກທ ຈຳກັດ ແລະ ບໍລິສັດ ຫຼັກຊັບລາວ-ຈີນ ຈັດພິທີຖະແຫຼງຂ່າວເປີດຈອງພັນທະບັດລັດຖະບານທີ່ອອກໂດຍກະຊວງການເງິນໂດຍຜ່ານຕະຫຼາດຫຼັກຊັບລາວໃນມູນຄ່າ 714.870.000.000 ກີບ ໃນວັນທີ 25 ມີນາ 2019 ທີ່ ຕະຫຼາດຫຼັກຊັບລາວ ເປັນກຽດຖະແຫຼງຂ່າວຂອງທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ ແລະ ທ່ານ ອານຸກອນ ສຸທຳມະວົງ ຮັກສາການຜູ້ອຳນວຍການບໍລິສັດ ຫຼັກຊັບລ້ານຊ້າງມະຫາຊົນ ມີທ່ານນາງ ວຽງດາລີ ສຸພານຸວົງ ຮອງຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບ ພ້ອມດ້ວຍສື່ມວນຊົນ ແລະ ແຂກຖືກເຊີນເຂົ້າຮ່ວມ.
ທ່ານ ອານຸກອນ ສຸທຳມະວົງ ໄດ້ຖະແຫຼງຂ່າວວ່າ: ວັນທີ 25 ມີນາ 2019 ເປັນມື້ທຳອິດໃນການເປີດຈອງພັນທະບັດລັດຖະບານຜ່ານຕະຫຼາດຫຼັກຊັບລາວ ເຊິ່ງການເປີດຈອງນີ້ແມ່ນຈະດຳເນີນຮອດວັນທີ 5 ເມສາ 2019 ເລີ່ມແຕ່ 8:30-15:30 ໂມງ ສາມາດຈອງຊື້ໄດ້ທີ່ສຳນັກງານຂອງບໍລິສັດຫຼັກຊັບທັງ 3 ແຫ່ງ ທີ່ອາຄານຕະຫຼາດຫຼັກຊັບລາວ ນະຄອນຫຼວງວຽງຈັນ ການອອກພັນທະບັດຄັ້ງນີ້ມີມູນຄ່າ 714.870.000.000 ກີບ ລາຄາກຳນົດ ແລະ ລາຄາຂາຍແມ່ນໜ່ວຍລະ 1 ລ້ານກີບ ໂດຍແບ່ງພັນທະບັດອອກເປັນ 4 ລຸ້ນຄື: ອາຍຸ 1 ປີ 3 ປີ 5 ປີ ແລະ 7 ປີ ສ່ວນອາຍຸ 1 ປີ ມີມູນຄ່າບໍ່ເກີນ 210 ຕື້ກວ່າກີບ
ສ່ວນ 500 ກວ່າຕື້ກີບແມ່ນແບ່ງໃສ່ 3 ປີ 5 ປີ ແລະ 7 ປີ ອັດຕາດອກເບ້ຍ 1 ປີ ເທົ່າກັບ 5,3% 3 ປີ ແມ່ນ 6,8% 5 ປີ 6,95% ແລະ 7 ປີ 7,10% ການຈ່າຍເງິນດອກເບ້ຍແມ່ນຈ່າຍ 2 ຄັ້ງຕໍ່ປີ ແລະ ຈະກຳນົດເອົາວັນທີ 5 ເມສາ 2019 ເປັນມື້ຄິດໄລ່ອັດຕາດອກເບ້ຍ ແລະ ຈົດທະບຽນໃນຕະຫຼາດຫຼັກຊັບລາວ ເຊິ່ງການເປີດຈອງຊື້ພັນທະບັດລັດຖະບານໃນຄັ້ງນີ້ຈະໃຊ້ຫຼັກການມາກ່ອນໄດ້ກ່ອນເຊິ່ງຜູ້ລົງທຶນຕ້ອງໄດ້ຊື້ແບບທະວີຄູນເທື່ອລະ 10 ລ້ານກີບຂຶ້ນໄປ ແລະ ຈະປິດການຈອງຊື້ທັນທີຖ້າຫາກພັນທະບັດຄົບຕາມຈຳນວນທີ່ໄດ້ອອກຈຳໜ່າຍຄັ້ງນີ້ເຖິງວ່າຈະບໍ່ຮອດວັນທີ 5 ເມສາ 2019 ແລະ ຜູ້ລົງທຶນສາມາດແລກປ່ຽນມື້ໃນຕະຫຼາດຂັ້ນສອງໄດ້ເຊິ່ງຕະຫຼາດຫຼັກຊັບລາວໄດ້ມີລະບົບ ແລະ ກົນໄກການຊື້-ຂາຍພັນທະບັດແລ້ວ.
ຂອບໃຈຂໍ້ມູນຈາກ: ໜັງສືພີມ ວຽງຈັນໃຫ່ມ
