Target Magazine
4 ຄໍາຖາມຄວນຄິດ! ກ່ອນເລີ່ມຕົ້ນທຸລະກິດໃໝ່…
ໃນການເຮັດທຸລະກິດ ເມື່ອເຫັນວ່າເລີ່ມໄປໄດ້ດີກໍຢາກຈະຂະຫຍາຍກິດຈະການໃຫ້ເຕີບໃຫຍ່ຂຶ້ນ, ຢາກເປີດຮ້ານໃໝ່ ມີຫຼາຍສາຂາແຕກອອກ ເພື່ອເຈາະລູກຄ້າກຸ່ມໃໝ່ ແຕ່ຖ້າຫາກຂາດການວາງແຜນທີ່ເໝາະສົມ ຫຼືຮີບຮ້ອນຈົນເກີນໄປອາດຈະສ່ຽງຕໍ່ການສູນເສຍທຸລະກິດທີ່ມີທັງໝົດ. ດັ່ງນັ້ນ ກ່ອນທີ່ຈະຄິດເດີນໄປທາງໜ້າຢ່າລືມຖາມຄໍາຖາມ 4 ຂໍ້ສໍາຄັນດັ່ງຕໍ່ໄປນີ້: ຖ້າບໍ່ຢາກໃຫ້ທຸລະກິດຕາຍໄປດ້ວຍມືຂອງຕົນເອງ!!!
- ທຸລະກິດທີ່ມີຢູ່ນັ້ນຄວບຄຸມໄດ້ແລ້ວບໍ່?
ຜູ້ປະກອບການເກືອບທຸກຄົນໄຟ່ຝັນວ່າ ຢາກມີບໍລິສັດທີ່ສ້າງເງິນໄດ້ຫຼາຍໝື່ນລ້ານ ແຕ່ກ່ອນຈະໄປເຖິງຈຸດນັ້ນໄດ້ສິ່ງໜຶ່ງທີ່ຄວນເຮັດຄື ຢ່າເຮັດຫຍັງເກີນຕົວ ຖ້າຢາກຂະຫຍາຍກິດຈະການກໍຕ້ອງພິຈາລະນາໃຫ້ດີວ່າ ທ່ານມີຄວາມສາມາດໃນການເຮັດວຽກໃໝ່ນັ້ນ ຫຼືບໍ່? ຖ້າວຽກທີ່ມີຢູ່ມັນລົ້ນມືຢູ່ແລ້ວ ກໍບໍ່ຄວນຊອກເຂົ້າມາເພີ່ມອີກ ແລະ ຄວນຫັນມາເບິ່ງທຸລະກິດທີ່ມີຢູ່ໃນມືແລ້ວນັ້ນ ວ່າສາມາຄວບຄຸມຫຼາຍພໍແລ້ວ ຫຼືຍັງ? ຫາກຍັງຄວນຄິດວ່າຈະເພີ່ມຊັບພະຍາກອນຫຍັງເຂົ້າມາ ເພື່ອຊ່ວຍໃຫ້ທຸລະກິດມີການຄວບຄຸມຫຼາຍຂຶ້ນຈະດີກວ່າ
- ຈ່າຍໄຫວບໍ່? ຖ້າຢາກຂະຫຍາຍກິດຈະການແທ້.
ຄໍາເວົ້າທີ່ວ່າ “ທ່ານຕ້ອງໃຊ້ເງິນເພື່ອຊອກເງິນ” ນັ້ນບໍ່ໄດ້ເກີນຄວາມຈິງເລີຍໃນໂລກຂອງການເຮັດທຸລະກິດ ເຊັ່ນດຽວກັນກັບຄວາມຕ້ອງການທີ່ຢາກຂະຫຍາຍກິດຈະການ ເຖິງວ່າອາດຈະຊ່ວຍໃຫ້ມີລາຍໄດ້ຫຼາຍຂຶ້ນ ແຕ່ກໍໍບໍ່ແມ່ນເລື່ອງທີ່ຈະເກີດຂຶ້ນແບບທັນທີ ນອກຈາກນີ້ ການຂະຫຍາຍແຕ່ລະເທື່ອກໍຕ້ອງໃຊ້ເງິນ ບໍ່ວ່າຈະເປັນຄ່າດໍາເນີນການເປີດກິດຈະການ, ຄ່າສ້າງສັນສິນຄ້າໃໝ່ ຫຼືຄ່າຈ້າງທີມເຮັດການຕະຫຼາດ. ຫາກບໍ່ມີເງິນຫຼາຍພໍ ທຸລະກິດເກົ່າບໍ່ສ້າງກໍາໄລ ແລະ ບໍ່ສາມາດເຂົ້າເຖິງແຫຼ່ງທຶນໄດ້ ເພື່ອໃຊ້ຈ່າຍສໍາລັບສ່ວນນີ້ ການຂະຫຍາຍກິດຈະການກໍຄົງບໍ່ແມ່ນເລື່ອງງ່າຍທີ່ຈະເຮັດແລ້ວປະສົບຄວາມສໍາເລັດ ດັ່ງນັ້ນ ຄວນກວດສອບສະພາບທາງການເງິນສະເໝີ ກ່ອນທີ່ຈະຕັດສິນໃຈໃນການຂະຫຍາຍທຸລະກິດ.
- ຄູ່ແຂ່ງຂະຫຍາຍຕົວໄປແລ້ວ ຫຼືຍັງ?
ເຈົ້າຂອງທຸລະກິດສາມາດຮຽນຮູ້ໄດ້ຫຼາຍສິ່ງຫຼາຍຢ່າງ ໄດ້ຈາກການເບິ່ງຄູ່ແຂ່ງ ເພາະຖືວ່າມີກຸ່ມລູກຄ້າເປົ້າໝາຍດຽວກັນ ບໍ່ວ່າຈະເປັນຄວາມສໍາເລັດ ຫຼືລົ້ມເຫຼວ ກໍສາມາດນໍາມາປັບໃຊ້ ແລະ ພິຈາລະນາວ່າ ແມ່ນຫຍັງທີ່ເໝາະສົມສໍາລັບທ່ານ ຍິ່ງຖ້າຄູ່ແຂ່ງໄດ້ຂະຫຍາຍຕົວໄປກ່ອນ ຖືວ່າເປັນການປູທາງໃນພື້ນທີ່ໃໝ່ໃຫ້ກັບຄົນທີ່ຈະເດີນຕາມໄດ້ອີກທາງໜຶ່ງ ເພາະບໍ່ຕ້ອງເສຍເວລາອະທິບາຍໃຫ້ຄວາມຮູ້ແກ່ກຸ່ມຜູ້ບໍລິໂພກທີ່ເປັນເປົ້າໝາຍ. ດັ່ງນັ້ນ ສິນຄ້າ ຫຼືບໍລິການຂອງທ່ານ ຈຶ່ງສາມາດເປັນອີກຕົວເລືອກໃຫ້ແກ່ລູກຄ້າໄດ້. ແຕ່ແນວໃດກໍຕາມ ບໍ່ຄວນຖ້າດົນຈົນເກີນໄປທີ່ຈະໃຫ້ຄູ່ແຂ່ງຂະຫຍາຍຕົວໄປກ່ອນ ເພາະຍິ່ງຍ່າງນໍາຫຼັງຄົນອື່ນຫຼາຍເທົ່າໃດຍິ່ງມີຄວາມທ້າທາຍ ແລະ ຍາກໃນການດຶງລູກຄ້າຫຼາຍເທົ່ານັ້ນ.
- ພ້ອມ ຫຼືບໍ່? ສໍາລັບຄວາມທ້າທາຍຄັ້ງໃໝ່.
ການຂະຫຍາຍທຸລະກິດໃຫ້ປະສົບຄວາມສໍາເລັດ ບໍ່ແມ່ນສິ່ງທີ່ຈະເຮັດໄດ້ຕາມໃຈ ເຖິງວ່າຈະມີເງິນທຶນ, ມີເວລາ ແລະ ສະຖານທີ່ ສໍາລັບກິດຈະການໃໝ່ ແຕ່ຖ້າຫາກຂາດແຮງຈູງໃຈທີ່ດີ, ຄວາມມຸ່ງໝັ້ນ ແລະ ຄວາມພ້ອມທັງຕົວເຈົ້າຂອງ ແລະ ລູກທີມໃນການຮັບມືກັບຄວາມປ່ຽນແປງ ພ້ອມກັບສິ່ງໃໝ່ໆທີ່ຈະຕ້ອງພົບການຂະຫຍາຍກິດຈະການ ກໍຈະເປັນເລື່ອງຍາກເກີນໄປ. ດັ່ງນັ້ນ ກ່ອນທີ່ຈະຂະຫຍາຍຢ່າລືມປຶກສາກັບທີມງານກ່ອນ ເຖິງວ່າຈະເປັນເຈົ້າຂອງທຸລະກິດ ແລະ ຮັບຜິດຊອບວຽກຈໍານວນຫຼາຍ ແຕ່ການຂະຫຍາຍທຸລະກິດນັ້ນໝາຍເຖິງພາລະວຽກທີ່ເພີ່ມຂຶ້ນສໍາລັບທຸກຄົນໃນບໍລິສັດ. ສະນັ້ນ ຄວນກວດສອບໃຫ້ແນ່ໃຈວ່າ ພວກເຂົາມີຄວາມພ້ອມຫຼາຍພໍທີ່ຈະພະເຊີນກັບຄວາມທ້າທາຍຄັ້ງໃໝ່ແລ້ວ ຫຼືຍັງ.
ຂອບໃຈທີ່ມາ:
