Target Magazine
4 ບຸກຄະລິກທີ່ຕ້ອງມີ! ຖ້າຢາກສ້າງທຸລະກິດໃຫ້ເຂັ້ມແຂງ!!!
ຄົນທຸກຄົນ ບໍ່ສະເພາະແຕ່ນັກທຸລະກິດ ລ້ວນແລ້ວແຕ່ມີຄວາມແຕກຕ່າງກັນ ບໍ່ວ່າຈະເປັນທາງດ້ານບຸກຄະລິກ, ຄວາມຄິດ, ຈິດໃຈ ແລະວິທີການເຮັດວຽກທີ່ມີເອກະລັກສະເພາະເປັນຂອງຕົວເອງ, ແຕ່ທ່ານຮູ້ໄດ້ແນວໃດ ວ່າບຸກຄະລິກທີ່ມີຄວາມເປັນເອກະລັກຂອງທ່ານນັ້ນ ຈະສາມາດນໍາພາທ່ານໄປສູ່ເປົ້າໝາຍ ທີ່ເອີ້ນວ່າຄວາມສໍາເລັດຂອງທ່ານໄດ້ ຫຼືບໍ່? ບາງຄົນມີຄວາມເຊື່ອໝັ້ນໃນຕົວເອງ ເຊື່ອວ່າ ດ້ວຍຄວາມສາມາດ, ຕົ້ນທຶນທີ່ຕົນເອງມີຢູ່ນັ້ນ ແນວໃດກໍຕ້ອງປະສົບຄວາມສໍາເລັດໄດ້ຢ່າງແນ່ນອນ… ແລະຄວາມຈິງແລ້ວ ບາງຄົນກໍສາມາດນໍາພາຕົນເອງໄປສູ່ເປົ້າໝາຍນັ້ນໄດ້ສໍາເລັດ, ແຕ່ບາງຄົນລົ້ມເຫຼວໃນລະຫວ່າງທາງ. ແລ້ວຈະເຮັດແນວໃດຈຶ່ງຈະປະສົບຄວາມສໍາເລັດໄດ້? ສໍາລັບນັກທຸລະກິດທັງທີ່ໄຟ່ຝັນຢາກຈະນໍາພາຕົນເອງໄປໃຫ້ເຖິງຝັນ ດ້ວຍການສ້າງທຸລະກິດໃຫ້ເຂັ້ມແຂງໄປໄດ້ຕະຫຼອດທາງ ຢາກໃຫ້ລອງມາອ່ານບົດຄວາມນີ້!!!
- ຜູ້ປະກອບການ
ໃນຕອນທໍາອິດຂອງທຸລະກິດ ເກືອບທຸກຄົນຈະມີຄວາມຕື່ນເຕັ້ນ, ມີ Idea ຫຼາກຫຼາຍ, ເຮັດວຽກຢ່າງໄວວາ ແລະຮູ້ສຶກມ່ວນໄປກັບການສ້າງສັນສິ່ງຕ່າງໆ ເຊິ່ງນີ້ເປັນບຸກຄະລິກທີ່ຄວນມີຕິດຕົວຢູ່ຕະຫຼອດ ເພາະຈະຊ່ວຍຊຸກຍູ້ໃຫ້ເຮັດສິ່ງໃໝ່ໆ ແລະສ້າງສັນຜົນງານທີ່ດີອອກມາ. ແຕ່ແນວໃດກໍຕາມ ໃນການເຮັດທຸລະກິດມີໂອກາດພົບບັນຫາທາງການເງິນ, ການດໍາເນີນວຽກ ແລະ ການບໍລິຫານເຊິ່ງບໍ່ສາມາດແກ້ໄຂໄດ້ດ້ວຍບຸກຄະລິກແບບຜູ້ປະກອບການພຽງບຸກຄະລິກດຽວ ດັ່ງນັ້ນ, ຈໍາເປັນຕ້ອງມີບຸກຄະລິກອື່ນຮ່ວມດ້ວຍ.
- ນັກລົງທຶນ
ໃນຖານະນັກລົງທຶນຕ້ອງໃຫ້ຄວາມສໍາຄັນ ກັບເລື່ອງການເງິນ ແລະ ການວາງແຜນຄາດເດົາຕ່າງໆ. ນອກຈາກນີ້ ຕ້ອງມີຄວາມເຂົ້າໃຈກັບສະພາບຂອງຕົນເອງໃນປັດຈຸບັນ ແລະໃນອະນາຄົດ ທັງໃນໄລຍະສັ້ນ, ໄລຍະກາງ ແລະໄລຍະຍາວ ຕ້ອງເຂົ້າໃຈເລື່ອງກະແສເງິນສົດ ແລະຕ້ອງກໍາຈັດຕັດສິນໃຈ ດ້ວຍອາລົມອອກໄປ ເພື່ອຈະໄດ້ຕັດສິນໃຈໄດ້ຢ່າງຖືກຕ້ອງ.
- ເຈົ້າຂອງທຸລະກິດ
ເມື່ອກ້າວເຂົ້າສູ່ການເປັນເຈົ້າຂອງທຸລະກິດ ກໍຈໍາເປັນຕ້ອງສ້າງລະບົບ ແລະ ຂະບວນການດໍາເນີນວຽກຕ່າງໆ ເພື່ອໃຫ້ທຸລະກິດກ້າວໄປໄດ້ ເຖິງວ່າຄົນອື່ນຈະເຂົ້າມາເບິ່ງແທນ ແຕ່ກ່ອນຈະເຖິງຈຸດນັ້ນຈະມີຄວາມຮູ້ສຶກວ່າ ຕົນເອງຕ້ອງມີສ່ວນຮ່ວມກັບທຸກຂັ້ນຕອນຂອງການເຮັດທຸລະກິດ ເຖິງວ່າສ່ວນໃຫຍ່ຈະຄິດຢາກເຮັດໃຫ້ທຸລະກິດເຕີບໃຫຍ່ ແລະຢາກມີອິດສະຫຼະ, ແຕ່ກໍບໍ່ມີຄວາມຄິດຢາກປ່ອຍວາງ ຫຼືໄວ້ວາງໃຈໃຫ້ຄົນອື່ນເຂົ້າມາຊ່ວຍວຽກ ແທນທີ່ເປັນສິ່ງທີ່ຄວນເຮັດເພາະສົ່ງຜົນໃຫ້ທຸລະກິດກ້າວໜ້າ.
- CEO
ໃນໂໝດຂອງການເປັນຜູ້ບໍລິຫານ ຫຼື CEO ນັ້ນ ຕ້ອງມີຄວາມເປັນຜູ້ນໍາ ແລະ ມີການຈັດການທີ່ດີ, ເພື່ອໃຫ້ທຸລະກິດເດີນໜ້າໄປໄດ້ ເຖິງຈະບໍ່ລົງມືເຮັດເອງ. ແຕ່ບັນຫາຄື ບໍ່ແມ່ນທຸກຄົນຈະມີພາວະການເປັນຜູ້ນໍາທີ່ດີ ແຕ່ບໍ່ຕ້ອງກັງວົນເພາະສາມາດເສີມສ້າງໄດ້ຈາກການຮຽນຮູ້.
ຂອບໃຈທີ່ມາ: www.smethailandclub.com
