ສໍາລັບຜູ້ປະກອບການ ຫຼືບໍລິສັດໃຫຍ່ໆ ການທຸ່ມເທເງິນເພື່ອເຮັດການຕະຫຼາດບໍ່ແມ່ນເລື່ອງໃຫຍ່ ແຕ່ສໍາລັບຜູ້ປະກອບການໃໝ່ໆ ທີ່ຫາກະເຂົ້າມາສູ່ໂລກທຸລະກິດ ອາດຈະຕ້ອງມາຮຽນຮູ້ກັບຍຸດທະສາດທີ່ມີປະສິດທິພາບ ເພື່ອໃຫ້ປະສົບຄວາມສໍາເລັດໂດຍບໍ່ຕ້ອງສິ້ນເປືອງຫຼາຍ…

ຍຸດທະສາດທາງການຕະຫຼາດສໍາລັບ Startup

ສໍາລັບຜູ້ທີ່ປະກອບທຸລະກິດ Startup ຖ້າລອງຖາມຕົວເອງເບິ່ງວ່າ ທຸກມື້ນີ້ສິນຄ້າຂອງເຮົາສາມາດສ້າງຍອດຂາຍໄດ້ດ້ວຍຕົນເອງແລ້ວບໍ່? ຄົງຕ້ອງບອກວ່່າ ຍັງ ເພາະເຖິງວ່າສິນຄ້າດີເດັ່ນຂະໜາດໃດ ແຕ່ຖ້າຂາດຊ່ອງທາງການຈໍາໜ່າຍ ແລະຕະຫຼາດທີ່ດີ ທຸລະກິດຍ່ອມບໍ່ປະສົບຄວາມສໍາເລັດຢ່າງແນ່ນອນ. ສໍາລັບຜູ້ປະກອບການ ຫຼືບໍລິສັດໃຫຍ່ໆ ການທຸ່ມເທເງິນເພື່ອເຮັດການຕະຫຼາດບໍ່ແມ່ນເລື່ອງໃຫຍ່ ແຕ່ສໍາລັບຜູ້ປະກອບການໃໝ່ໆ ທີ່ຫາກະເຂົ້າມາສູ່ໂລກທຸລະກິດ ອາດຈະຕ້ອງມາຮຽນຮູ້ກັບຍຸດທະສາດທີ່ມີປະສິດທິພາບ ແລະຊ່ວຍສ້າງຄວາມສໍາເລັດໃນໄລຍະທໍາອິດແບບບໍ່ຕ້ອງເປືອງເງິນຫຼາຍເຊັ່ນ:

1. ການໃຊ້ Affiliate Marketing

Affiliate Marketing ຄືຍຸດທະສາດການຕະຫຼາດທີ່ເຮົາໄດ້ຮັບ Commission ຈາກການນໍາສິນຄ້າ ຫຼືບໍລິການໄປPromote ໃຫ້້ Website ຫຼື Social media ແລະເຮົາໄດ້ສ່ວນແບ່ງກໍາໄລຈາກຍອດຂາຍນັ້ນໆ. ເບິ່ງອີກແງ່ໜຶ່ງ ເມື່ອເຮົາເປັນນ້ອງໃໝ່ໃນວົງການທຸລະກິດ ເຮົາສາມາດໃຊ້ Affiliate Marketing ໂດຍການໄປຝາກຂາຍສິນຄ້າຕາມ Website ທີ່ມີຄົນຮູ້ຈັກຫຼາຍໆ ເພື່ອເພີ່ມຍອດຂາຍໄດ້ຢ່າງສົມເຫດສົມຜົນ ດັ່ງນັ້ນ ພະຍາຍາມບອກຈຸດເດັ່ນຂອງສິນຄ້າໃຫ້ໄດ້ ເພື່ອກະຕຸ້ນໃຫ້ຜູ້ທີ່ໄດ້ຮັບສິນຄ້າໄປ Promote ຫຼືຈໍາໜ່າຍຕໍ່ ສາມາດກະຕຸ້ນລູກຄ້າໃຫ້ຕ້ອງການຊື້ສິນຄ້າຂອງເຮົາ.

2. ພັດທະນາ Content Marketing

ໃນປັດຈຸບັນທຸລະກິດ 100 ລະ 90 ລ້ວນແຕ່ໃຊ້ Content Marketing ເພື່ອພັດທະນາ ແລະຂະຫຍາຍທຸລະກິດກັນຢ່າງຕໍ່ເນື່ອງ ແນວໃດກໍຕາມ ເຖິງວ່າການຕະຫຼາດປະເພດນີ້ຈະໄດ້ຮັບຄວາມນິຍົມ ແຕ່ບໍ່ແມ່ນວ່າທຸກຄົນທີ່ນໍາໄປໃຊ້ຈະປະສົບຄວາມສໍາເລັດໄດ້ ເຊິ່ງເຮົາຕ້ອງພະຍາຍາມພິຈາລະນາໃຫ້ດີວ່າ ເຮົາສ້າງເນື້ອໃນໃຫ້ໃຜອ່ານ (ກຸ່ມເປົ້າໝາຍ) ຕ້ອງການຈະບອກຫຍັງ ແລະປະໂຫຍດທີ່ກຸ່ມເປົ້າໝາຍຈະໄດ້ຮັບແມ່ນຫຍັງ? ຫາກຂາດ 3 ສິ່ງນີ້ Content Marketing ທີ່ເຮົາພະຍາຍາມຢ່າງດີຍ່ອມບໍ່ປະສົບຜົນຕາມທີ່ຕັ້ງໃຈ.

3. ເຮັດ PR ດ້ວຍຕົວເອງ

ລອງຄິດເບິ່ງຫຼິ້ນໆວ່າແຕ່ລະມື້ ມີທຸລະກິດເລີ່ມໃໝ່ຈັກທຸລະກິດ ມີຜະລິດຕະພັນໃໝ່ໆໂລດແລ່ນໃນໂລກ Online ເພີ່ມຂຶ້ນຈັກຢ່າງ ຕົວເລກເຫຼົ່ານັ້ນຄືການແຂ່ງຂັນທັງທາງກົງ ແລະທາງອ້ອມ ເຊິ່ງສາມາດດຶງດູດຄວາມສົນໃຈຈາກກຸ່ມເປົ້າໝາຍຂອງເຮົາໄປໄດ້; ການລົງມືສ້າງການປະຊາສໍາພັນຜະລິດຕະພັນ ຫຼືທຸລະກິດໃນຮູບແບບຕ່າງໆ ທັງໂລກ Online ແລະ Offline ລວມເຖິງສ້າງຄວາມສໍາພັນທີ່ດີກັບນັກຂ່າວ, ນັກຂຽນ ຜູ້ມີອິດທິພົນເທິງໂລກ Online ຍ່ອມເປັນຕົວເລືອກທີ່ດີ. ທັງນີ້ ຕ້ອງກຽມພ້ອມຮັບມືຄວາມຜິດຫວັງໄວ້ແດ່ ເພາະເຮົາອາດຈະບໍ່ໄດ້ຮັບການຕອບສະໜອງຈາກນັກຂ່າວເທົ່າທີ່ຄວນ ຍົກເວັ້ນແຕ່ວ່າຜະລິດຕະພັນ ຫຼືບໍລິການຂອງເຮົາເປັນສິ່ງໃໝ່ ແຕກຕ່າງຈາກຄູ່ແຂ່ງໃນຕະຫຼາດ ແລະໜ້າສົນໃຈແທ້ໆ.

4. ເປີດໃຈໃຫ້ Fin Tech

Fin Tech ຄືການປະຍຸກໃຊ້ເຕັກໂນໂລຊີມາບໍລິການດ້ານການເງິນ ແລະການລົງທຶນໃນການເຮັດທຸລະກິດໃຫ້ມີປະສິດທິພາບຍິ່ງຂຶ້ນເຊັ່ນ ການຊໍາລະເງິນ Online ເປັນຕົ້ນ ເຊິ່ງ Fin Tech ນັ້ນ ມີປະໂຫຍດກັບທຸລະກິດໃນປັດຈຸບັນຫຼາຍ ເພາະຜູ້ຊື້ບໍ່ຈໍາເປັນຕ້ອງຈັບເງິນເປັນຈໍານວນຫຼາຍເພື່ອໄປຊື້ເຄື່ອງ ແຕ່ຈະຊໍາລະເງິນຄ່າສິນຄ້າຈາກ Wallet ຊໍາລະຜ່ານ Application ເທິງໂທລະສັບມືຖື ຫຼືແມ່ນແຕ່ຮ້ານຂາຍເຄື່ອງຝາກທີ່ລະນຶກບາງແຫ່ງ ກໍສາມາດເພີ່ມຊ່ອງທາງການຊໍາລະເງິນເປັນການໂອນເງິນຜ່ານບັນຊີທະນາຄານໄດ້ອີກດ້ວຍ ເຮັດໃຫ້ເຮົາມີໂອກາດໄດ້ເງິນຈາກຫຼາຍໆທາງ ແລະສ້າງໂອກາດໃນການຂາຍໄດ້ຫຼາຍຂຶ້ນ.

ຂອບໃຈທີ່ມາ: SMETHAILANDCLUB

Comments