ກອງບັນຊາການ ປກສ ນະຄອນຫຼວງວຽງຈັນ ໄດ້ອອກແຈ້ງການ ເລກທີ 395/ປກສ.ນວ ລົງວັນທີ 15 ຕຸລາ 2018 ເລື່ອງ: ເພີ່ມທະວີປ້ອງກັນຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມໃນໄລຍະ ງານບຸນອອກພັນສາ ປະວໍລະນາ ຊ່ວງເຮືອປະເພນີ ທ່າວັດຈັນ ປະຈໍາປີ ພ.ສ2561.
ໃນຂໍ້ 3 ຂອງແຈ້ງການໄດ້ກໍານົດເສັ້ນທາງສັນຈອນ ແລະ ບ່ອນຈອດລົດປະເພດຕ່າງໆດັ່ງນີ້:
ກ. ບັນດາລົດໂດຍສານ.
- ມາຈາກທິດເໜືອ ມີຈຸດປະສົງມາທ່ຽວງານບຸນ ແມ່ນອະນຸຍາດໃຫ້ເຂົ້າຈອດຕາມສະຖານທີ່ທາງອະນຸກໍາມະການອະນຸຍາດ ຫຼື ຈອດຕາມແຄມຖະໜົນສຸພານຸວົງ ແລະ ທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ກີດຂວາງການສັນຈອນ.
- ມາຈາກທິດໃຕ້ ອະນຸຍາດໃຫ້ຈອດຢູ່ສະຖານທີ່ຈອດລົດຂອງພະແນກໂຍທາທິການ ແລະ ທາງຮ່ອມໂຮງຮຽນມໍປາຍ ເພຍວັດ ຫຼື ຈອດຕາມແຄມຖະໜົນສຸພານຸວົງ ແລະ ທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ກີດຂວາງການສັນຈອນ.
- ມາຈາກຖະໜົນ 13 ໃຕ້ ອະນຸຍາດໃຫ້ຈອດຕາມສະຖານທີ່ຈອດລົດຕໍ່ໜ້າສະໜາມກິລາເຈົ້າອານຸວົງ,ຫໍວັດທະນະທໍາ ແລະ ທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ກີດຂວາງການສັນຈອນ.
ຂ. ບັນດາລົດສ່ວນຕົວ,ລົດຕຸກໆ ຈໍາໂບ້.
ໃຫ້ຈອດຕາມສະຖານທີ່ຈອດລົດ ທີ່ອະນຸກໍາມະການຈັດງານ ໄດ້ກໍານົດໄວ້ ແລະ ປະຕິບັດຕາມການສັນຍານຂອງເຈົ້າໜ້າທີ່ຕໍາຫຼວດຈະລາຈອນ ຕາມຈຸດ ຕາມປ້ອມຕ່າງໆ.
ຄ. ລົດຈັກ ລົດຖີບ.
ອະນຸຍາດໃຫ້ຈອດຕາມສະຖານທີ່ ຈອດລົດ ທີ່ອະນຸກໍາມະການຈັດງານກໍານົດໄວ້.
ງ. ສໍາລັບຜູ້ໃຊ້ພາຫະນະ ທີ່ບໍ່ປະສົງຈະໄປຮ່ວມງານ.
- ມາຈາກຖະໜົນ 13 ເໜືອ ມີຈຸດປະສົງໄປຖະໜົນ 13 ໃຕ້,ຖະໜົນທ່າເດື່ອ ໃຫ້ນໍາໃຊ້ ຖະໜົນອາຊຽນ, ຖະໜົນໜອງບຶກ ແລະ ຖະໜົນດົງໂດກ.
- ມາຈາກຖະໜົນ 13 ໃຕ້ ແລະ ຖະໜົນເລກ 10 ມີຈຸດປະສົງໄປຖະໜົນ 13 ເໜືອ ໃຫ້ໃຊ້ຖະໜົນ 450 ປີ,ຖະໜົນກໍາແພງເມືອງ ແລະ ຖະໜົນມິດຕະພາບ.
ໃນລະຫວ່າງ ວັນທີ 22-25 ຕຸລາ 2018 ຫ້າມພາຫະນະທຸກປະເພດາໃຊ້ຖະໜົນເຈົ້າຟ້າງຸ່ມ (ແຄມຂອງ) ເລີ່ມແຕ່ສາມແຍກ ຄຣີນິກສາກົນ ໄປຈົນເຖິງ ສາມແຍກປາກປ່າສັກ.
ສະເພາະພາຫະນະຂົນສົ່ງສິນຄ້າປະເພດຕ່າງໆ ທີ່ມີຈຸດປະສົງນໍາເອົາສິນຄ້າເຂົ້າໄປຂາຍໃນງານບຸນ ແມ່ນອະນຸຍາດໃຫ້ນໍາສົ່ງເຄື່ອງໄດ້ແຕ່ເວລາ 5-9 ໂມງເຊົ້າ.