ໃນວັນທີ 14 ກຸມພາ 2019, ຜູ້ຕາງໜ້າຈາກອົງການ ການກຸສົນ Spirit of America ແລະ ສະຖານທູດສະຫະລັດອາເມຣິກາ ໄດ້ມອບອຸປະກອນ ເປັນຈຳນວນເງິນ ຫຼາຍກວ່າ 10.000 ໂດລາສະຫະລັດ ເພື່ອສົ່ງເສີມ Laos Buffalo Dairy ຢູ່ທີ່ນະຄອນຫຼວງພະບາງ.
The Laos Buffalo Dairy ແມ່ນເປັນທຸລະກິດຮ່ວມ ຂອງສະຫະລັດອາເມຣິກາ ຢູ່ທີ່ຫຼວງພະບາງໂດຍການເຊົ່າສັດລ້ຽງເຊັ່ນ: ຄວາຍ ຈາກຊາວກະສິກອນເພື່ອແລກປ່ຽນກັບນໍ້ານົມຄວາຍ.
ຫຼັງຈາກນັ້ນ, ນໍ້ານົມຄວາຍຈະໄດ້ຖືກນຳໄປແປຮູບເປັນຫຼາກຫຼາຍຜະລິຕະພັນ ເຊັ່ນ: ເນີຍແຂງ, ນົມສົ້ມ ແລະ ກະແລມ ເພື່ອໄປຈຳໜ່າຍ ໃນຕະຫຼາດທ້ອງຖິ່ນ. Laos Buffalo Dairy ໄດ້ສ້າງລະບົບຕ່ອງໂສ້ການຜະລິດເພື່ອສະໜອງຜະລິດຕະພັນໃຫ້ແກ່ຮ້ານອາຫານ ທີ່ຫຼວງພະບາງ ແລະ ນະຄອນຫຼວງວຽງຈັນ ແລະ ໃນຫວ່າງບໍ່ດົນມານີ້ ໄດ້ມີບັນດາປະເທດໃນອາຊີລວມທັງປະເທດຍີ່ປຸ່ນ ທີ່ໄດ້ສັ່ງຊື້ຜະລິດຕະພັນດັ່ງກ່າວ.
ນັບຕັ້ງແຕ່ເປີດທຳການຜະລິດໃນປີ 2016, The Laos Buffalo Dairy ໄດ້ເພີ່ມການຜະລິດໃນແຕ່ລະມື້ເພື່ອຕອບສະໜອງຄວາມຮຽກຮ້ອງຕ້ອງການໃຫ້ແກ່ລູກຄ້າທັງພາຍໃນ ແລະ ຕ່າງປະເທດ ທີ່ມີຈຳນວນເພີ່ມຂື້ນ ແລະ ນີ້ຍັງເປັນການປະກອບສ່ວນອັນສໍາຄັນດ້ານສຸຂະພາບ ແລະ ຄວາມເປັນຢູ່ທີ່ດີຂອງເສດຖະກິດທ້ອງຖິ່ນ.
ຊາວກະສິກອນທີ່ໃຫ້ເຊົ່າຄວາຍຂອງເຂົາເຈົ້າເປັນໄລຍະເວລາຫຼາຍກວ່າຫົກເດືອນໄດ້ມີລາຍໄດ້ທີ່ໝັ້ນຄົງເຊິ່ງຊ່ວຍໃຫ້ພວກເຂົາສາມາດຈ່າຍຄ່າໃຊ້ຈ່າຍຕ່າງໆພາຍໃນຄົວເຮືອນ ລວມທັງຄ່າຮຽນ ແລະ ຄ່າອາຫານ. ຄວາຍທີ່ຢູ່ໃນ Laos Buffalo Dairy ຍັງໄດ້ຮັບການສັກຢາວັກແຊ່ງ ເຊິ່ງຊ່ວຍໃຫ້ອັດຕາການຕາຍຂອງລູກສັດລ້ຽງຫຼຸດລົງຢ່າງຫຼວງຫຼາຍ ແລະ ສິ່ງທີ່ສຳຄັນຍັງເປັນການພັດທະນາສຸຂະພາບຂອງສັດລ້ຽງໃນໄລຍະຍາວ.
ທ່ານເອກອັກຄະລັດຖະທູດ ຣີນາ ບິດເຕີ ໄດ້ຮ່ວມເປັນສັກຂີພະຍານໃນພິທີມອບ ທ່ານໄດ້ກ່າວວ່າ: Laos Buffalo Dairy ເປັນຕົວແບບທຸລະກິດທີ່ດີຈາກສະຫະລັດອາເມຣິກາ ໃນການເຮັດໜ້າທີ່ຢູ່ຕ່າງປະເທດ ແລະ ສົ່ງເສີມການເປັນແບບຢ່າງທາງດ້ານທຸລະກິດທີ່ມີຄວາມຮັບຊອບຕໍ່ສັງຄົມ ແລະ ທຸລະກິດນີ້, ທຸກໆຄົນລ້ວນແຕ່ມີຜົນປະໂຫຍດ – ຊາວກະສິກອນໄດ້ມີລາຍຮັບ, ສັດລ້ຽງໄດ້ຮັບວັກແຊ່ງ ແລະ ຜູ້ບໍລິໂພກ ຄືຂ້າພະເຈົ້າເອງ ກໍໄດ້ປະໂຫຍດຈາກເນີຍແຂງ ແລະ ກະແລມ.
ຄວາຍຈຳນວນ 100ໂຕບວກກັບລູກຂອງພວກມັນຢູ່ Laos Buffalo Dairy ແຫ່ງນີ້ໄດ້ເຮັດໃຫ້ຜະລິດຕະພັນນົມເພີ່ມຂື້ນ ແລະ ສາມາດສ້າງວຽກໃໝ່ໄດ້ເກືອບຮອດ 500 ຕໍາແໜ່ງງານໃຫ້ຕະຫຼາດແຮງງານຢູ່ໃນທ້ອງຖິ່ນ.
ທ່ານ Susie Martin ຜູ້ອໍານວຍໃຫຍ່ Laos Buffalo Dairy ໄດ້ສະແດງຄວາມຍີນດີຕໍ່ກັບການສະໜັບສະໜູນເຊິ່ງມັນເປັນການຊ່ວຍເປີດໂອກາດໃຫ້ທຸລະກິດກ້າວສູ່ຕະຫຼາດໃໝ່ໃນ ສປປ ລາວ ແລະ ຕະຫຼາດອື່ນໆນໍາອິກ. ທ່ານ ກ່າວວ່າ: ພວກເຮົາຮູ້ສຶກດີໃຈຫຼາຍຕໍ່ກັບການສະໜັບສະໜູນທີ່ພວກເຮົາໄດ້ຮັບຈາກ ອົງການ Spirit of America ແລະ ສະຖານທູດສະຫະລັດອາເມຣິກາ.
ອຸປະກອນເຫຼົ່ານີ້ຍັງຈະຊ່ວຍໃຫ້ພວກເຮົາສາມາດຜະລິດປະລິມານນໍ້ານົມທີ່ມີຄຸນນະພາບໃຫ້ຫຼາຍຂື້ນກວ່າເກົ່າເພື່ອຕອບສະໜອງຢ່າງພຽງພໍໃຫ້ແກ່ຕະຫຼາດໃນ ສປປ ລາວ ແລະ ຍັງເປັນການເປີດໂອກາດໃນການສົ່ງອອກອິກດ້ວຍ. ນອກຈາກນີ້, ພວກເຮົາຍັງສາມາດເຊົ່າຄວາຍຈຳນວນຫຼາຍຂື້ນຈາກປະຊາຊົນໃນທ້ອງຖິ່ນ.
ທ່ານ Terrell Chandler ຜູ້ບໍລິຫານຂອງ ອົງການ Spirit of America ໄດ້ກ່າວວ່າ: ການໃຫ້ສະໜັບສະໜູນໃຫ້ແກ່ Laos Buffalo Dairy ໃນເທື່ອນີ້ໄດ້ສະແດງໃຫ້ເຫັນເຖິງຄຸນຄ່າອັນສໍາຄັນດ້ານຜູ້ປະກອບການຈາກສະຫະລັດອາເມລິກາ, ສະແດງໃຫ້ເຫັນເຖິງຄວາມກ້າວຫນ້າ ແລະ ໂອກາດທີດີຂື້ນໃນຊີວິດ.
ອົງການ Spirit of America ມີຄວາມຍີນດີຕໍ່ກັບການຮ່ວມມືກັບສະຖານທູດສະຫະລັດອາເມຣິກາ ແລະ Laos Buffalo Dairy ເພື່ອສົ່ງເສີມໃຫ້ແກ່ Laos Buffalo Dairy ໃນການສ້າງຄວາມແຕກຕ່າງອັນສໍາຄັນໃຫ້ແກ່ເສດຖະກິດໃນທ້ອງຖິ່ນ ແລະ ໃນຊຸມຊົນ. ພວກເຮົາຖືວ່ານີ້ເປັນຫົນທາງອັນສຳຄັນໃນການຮັດແໜ້ນສາຍພົວພັນລະຫວ່າງສອງປະເທດນຳອິກ.
ຂໍ້ມູນຈາກ: ສະຖານທູດອາເມຣິກາ.