ວັນທີ 12 ກຸມພາ 2019 ຜ່ານມາ ທີ່ທຳນຽບປະທານປະເທດ ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບການເຂົ້າຍື່ນສານຕາຕັ້ງ ຂອງບັນດາທູດປະເທດເພື່ອນມິດຄົນໃໝ່ປະຈຳລາວ ຕາມລໍາດັບດັ່ງລຸ່ມນີ້:
ເວລາ 8:30 ໂມງ ຕ້ອນຮັບການເຂົ້າຍື່ນສານຕາຕັ້ງຂອງທ່ານ ອານໂທເນຍ ຮີວ ມາດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງຈາເມກາ ປະຈຳລາວ ໂດຍມີສຳນັກງານຕັ້ງຢູ່ປັກກິ່ງ ສປ ຈີນ ກ່ອນມາປະຕິບັດໜ້າທີ່ ທ່ານ ອານໂທເນຍ ຮີວ ໄດ້ປະຕິບັດໜ້າທີ່ການທູດຢູ່ລາວ ເປັນທູດປະຈຳ ສປ ຈີນ
ການພົວພັນຮ່ວມມືສອງຝ່າຍລາວ-ຈາເມກາ ໄດ້ສ້າງຕັ້ງສາຍພົວພັນນຳກັນໃນວັນທີ 27 ສິງຫາ 1999 ໂດຍແມ່ນສຳນັກງານຜູ້ຕາງໜ້າຖາວອນ ຂອງສອງປະເທດປະຈຳສະຫະປະຊາຊາດ ເປັນຜູ້ປຶກສາຫາລື ແລະ ລົງນາມຮ່ວມກັນ.
ເວລາ 9:00 ໂມງ ຕ້ອນຮັບການເຂົ້າຍື່ນສານຕາຕັ້ງຂອງທ່ານນາງ ເກຼັດເຕີ ໂລເກັນ ທີ່ມາດຳລົງຕຳແໜ່ງເປັນເອກອັກຄະຣາຊະທູດວິສາມັນ ຜູ້ມີອຳນາດເຕັມແຫ່ງຣາຊະອານາຈັກນອກແວ ປະຈຳລາວ ໂດຍມີສຳນັກງານຕັ້ງຢູ່ນະຄອນຫຼວງຮ່າໂນ້ຍ ສສ ຫວຽດນາມ ກ່ອນມາປະຕິບັດໜ້າທີ່ການທູດຢູ່ລາວ ທ່ານນາງ ເກຼັດເຕີ ໂລເກັນ ເຄີຍດຳລົງຕຳແໜ່ງເປັນທູດປະຈຳສີລັງກາ ແລະ ມານດີບ.
ສປປ ລາວ ແລະ ຣາຊະອານາຈັກນອກແວ ໄດ້ສ້າງຕັ້ງສາຍພົວພັນນຳກັນໃນວັນທີ 12 ພະຈິກ 1991 ຜ່ານມາການຮ່ວມມືລະຫວ່າງລາວ ແລະ ນອກແວ ມີປະສິດທິຜົນໃນລະດັບທີ່ແນ່ນອນ ລັດຖະບານນອກແວ ໄດ້ຈັດຕັ້ງປະຕິບັດບົນພື້ນຖານຂອງຖະແຫຼງການວຽງຈັນ ໂດຍສະໜັບສະໜູນໃນການສ້າງຄວາມເຂັ້ມແຂງ ແລະ ຄວາມເປັນເຈົ້າການໃຫ້ລັດຖະບານລາວ ພ້ອມທັງໃຫ້ການຊ່ວຍເຫຼືອໃນຫຼາຍຂົງເຂດ ເຊິ່ງເປັນແຜນບຸລິມະສິດຂອງລັດຖະບານ ພ້ອມທັງສະໜັບສະໜູນລາວ ໃຫ້ບັນລຸເປົ້າໝາຍສະຫັດສະວັດ ແລະ ຫຼຸດອອກຈາກປະເທດດ້ອຍພັດທະນາ ໃນປີ 2020.
ເວລາ 9:30 ໂມງ ຕ້ອນຮັບການເຂົ້າຍື່ນສານຕາຕັ້ງຂອງທ່ານ ອາເມັດ ອັບດຸນລາ ອັນຮານເຈລີ ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງຣາຊະອານາຈັກບາເຣນ ປະຈຳລາວ ໂດຍມີສຳນັກງານຕັ້ງຢູ່ບາງກອກປະເທດໄທ ກ່ອນມາປະຕິບັດໜ້າທີ່ການທູດຢູ່ລາວ ທ່ານ ອາເມັດ ອັບດຸນລາ ອັນຮານເຈລີ ໄດ້ຮັບຕຳແໜ່ງເປັນເອກອັກຄະຣາຊະທູດແຫ່ງຣາຊະອານາຈັກບາເຣນ ປະຈຳຣາຊະອານາຈັກໄທ
ສປປ ລາວ ແລະ ບາເຣນ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 15 ທັນວາ 2002 ການພົວພັນທາງດ້ານການເມືອງແມ່ນຢູ່ໃນລະດັບປົກກະຕິ ໂດຍຜູ້ນຳທັງສອງປະເທດໄດ້ສົ່ງສານອວຍພອນເຊິ່ງກັນ ແລະ ກັນໃນໂອກາດວັນສຳຄັນຕ່າງໆ.
ໂອກາດນີ້ ທ່ານ ບຸນຍັງ ວໍລະຈິດ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການມາປະຕິບັດໜ້າທີ່ການທູດຢູ່ລາວຂອງທັງ 3 ທ່ານຄັ້ງນີ້ ເຊິ່ງເປັນການປະກອບສ່ວນອັນສຳຄັນເຂົ້າໃນວຽກງານການທູດຂອງລາວ ພ້ອມດຽວກັນນີ້ ທ່ານປະທານປະເທດຍັງໄດ້ອວຍພອນໃຫ້ທູດທັງ 3 ທ່ານ ຈົ່ງປະສົບຜົນສຳເລັດໃນການມາປະຕິບັດໜ້າທີ່ຂອງຕົນຢູ່ລາວ.
ຂໍ້ມູນຈາກ: ວຽງຈັນໃໝ່
ພາບຈາກ: ຂປລ.