Target Magazine
ໃນຕອນເຊົ້າຂອງວັນທີ 31 ທັນວາ 2018 ນີ້, ຢູ່ທີ່ຫ້ອງ ປະຊຸມຂອງເຂດເສດຖະກິດພິເສດສະຫວັນ-ເຊໂນ ໄດ້ຈັດພິທີ ປະກາດໂຮມເຂດເສດຖະກິດພິເສດສະຫວັນ-ເຊໂນ ແລະ ເຂດການຄ້າຊາຍແດນ-ບ້ານແດນສະຫວັນ, ໃຫ້ກຽດເປັນປະທານ ໂດຍທ່ານ ປອ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ທອງໃສ ໄຊຍະວົງຄໍາດີ ຫົວໜ້າຄະນະບໍລິຫານເຂດເສດຖະກິດພິເສດສະຫວັນ-ເຊໂນ, ທ່ານ ປອ ໂພໄຊ ສິດທິຊົນ ຫົວໜ້າເຂດການຄ້າຊາຍແດນ-ບ້ານ ແດນສະຫວັນ, ມີບັນດາພະນັກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ໃນໂອກາດນີ້, ທ່ານ ເຕັ່ງ ເມັ່ງ ຢ່າງລືໄຊ ຮອງຫົວໜ້າກົມຈັດຕັ້ງ ແລະ ພະນັກງານກະຊວງແຜນການ ແລະ ການລົງທຶນ ໄດ້ຂຶ້ນຜ່ານມະຕິຕົກລົງ ຂອງທ່ານລັດຖະມົນຕິກະຊວງ ແຜນການ ແລະ ການລົງທຶນ ເລກທີ 3266/ກຜທ, ນະຄອນຫຼວງວຽງຈັນ ລົງວັນທີ 28 ທັນ ວາ 2018, ດ້ວຍການໂຮມເຂດເສດຖະກິດພິເສດສະຫວັນ -ເຊໂນ ແລະ ເຂດການຄ້າຊາຍ ແດນ-ບ້ານແແດນສະຫວັນ ເຂົ້າຮ່ວມກັນນັບຕັ້ງແຕ່ວັນທີ 31 ທັນວາ 2018 ເປັນຕົ້ນໄປ ໂດຍໃຫ້ ທ່ານ ທອງໃສ ໄຊຍະວົງຄໍາດີ ເປັນຜູ້ຊີ້ນໍາລວມ.
ຈາກນັ້ນ, ທ່ານ ປອ ສຸພັນ ແກ້ວມີໄຊ ກໍໄດ້ໃຫ້ກຽດໂອ້ລົມ ຕໍ່ພະນັກງານທັງສອງເຂດ ຊຶ່ງທ່ານໄດ້ກ່າວວ່າ: ເນື່ອງຈາກວ່າປະເທດລາວເຮົາເປັນ ປະເທດທີ່ບໍ່ໃຫຍ່, ເສດຖະກິດຂະຫຍາຍໂຕບໍ່ສູງຖ້າທຽບ ໃສ່ປະເທດອື່ນເປັນຕົ້ນແມ່ນປະເທດຍີ່ປຸ່ນ.
ດັ່ງນັ້ນ, ເພື່ອເຮັດໃຫ້ການປະຕິບັດແນວທາງ ນະໂຍບາຍຈາກສູນກາງລົງ ທ້ອງຖິ່ນ ເພື່ອສະດວກໃນການ ປະຕິບັດນະໂຍບາຍດຽວໃຫ້ ທົ່ວທຸກພາກສ່ວນ ເປັນຕົ້ນຫ້ອງການປະຕູດຽວ ທີ່ມີີຜູ້ຊີ້ນໍາພຽງຄົນດຽວແຕ່ມີສອງຫ້ອງການ.
ການໂຮມເຂົ້າກັນໃນຄັ້ງນີ້ ແມ່ນເປັນກໍາລັງແຮງ, ເປັນໂອກາດດີໃນການພັດທະນາເສດຖະກິດຂອງແຂວງສະຫວັນນະເຂດ ກໍຄືປະເທດຊາດເຮົາ.
ສະນັ້ນ, ຫຼັງຈາກທີ່ໂຮມກັນເຂົ້າ ເປັນອັນໜຶ່ງອັນດຽວແລ້ວພະນັກງານທຸກຄົນຈົ່ງຮັກຫອມ ປອງດອງ, ສາມັກຄີ, ຊ່ວຍເຫຼືອ ເຊິ່ງກັນ ແລະ ກັນ ຜັນຂະຫຍາຍທ່າແຮງ ທາງດ້ານເສດຖະກິດ ການລົງທຶນພາຍໃນແຂວງ ໃຫ້ມີຄວາມເຂັ້ມແຂງຍິ່ງໆຂຶ້ນໄປ.
ຂໍ້ມູນຈາກ: ຂ່າວ ສະຫວັນພັດທະນາ
