15 ປີຜ່ານມາ ກອງທຶນລຶບລ້າງຄວາມທຸກຍາກ (ທລຍ) ໄດ້ມີຜົນສໍາເລັດຫຼາຍດ້ານໃນການຈັດຕັ້ງປະຕິບັດວຽກງານແກ້ໄຂຄວາມທຸກຍາກໃຫ້ປະຊາຊົນ ຢູ່ໃນເຂດຊົນນະບົດຫ່າງໄກສອກຫຼີກ ຂອງ 43 ເມືອງທຸກຍາກ ໃນ 10 ແຂວງ ຂອງ ສປປ ລາວ ເຊິ່ງຜູ້ໄດ້ຮັບຜົນປະໂຫຍດກວມເອົາ 1,2 ລ້ານກວ່າຄົນ ມີຊີວິການເປັນຢູ່ທີ່ດີຂຶ້ນ.
ໃນວັນທີ 26 ທັນວາ 2018 ທີ່ສຳນັກງານຍາຍົກລັດຖະມົນຕີ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ໃນນາມເຄີຍເປັນຜູ້ຊີ້ນຳ ກອງທຶນລຶບລ້າງຄວາມທຸກຍາກ ແຕ່ປີ 2003-2006 ໄດ້ໃຫ້ສຳພາດຕໍ່ສື່ມວນຊົນລາວ ໃນໂອກາດວັນສ້າງຕັ້ງກອງທຶນລຶບລ້າງຄວາມທຸກຍາກ,
ຄົບຮອບ 15 ປີ ວ່າ: ພັກ ແລະ ລັດຖະບານ ໄດ້ຖືເອົາປະຊາຊົນເປັນກົກ-ເອົາຊົນນະບົດເປັນເປົ້າໝາຍ ໃນການພັດທະນາປະເທດ ແລະ ທຸກສິ່ງທຸກຢ່າງຕ້ອງເຮັດໃຫ້ປະຊາຊົນ ຄ່ອຍໆຫຼຸດພົ້ນອອກຈາກຄວາມທຸກຍາກ ແລະ ພະຍາຍາມເອົາປະເທດເຮົາຄ່ອຍໆ ກ້າວຂຶ້ນໃຫ້ເປັນປະເທດທີ່ຫຼຸດພົ້ນອອກຈາກສະຖານະພາບດ້ອຍພັດທະນາ.
ທ່ານ ນາຍົກໄດ້ເນັ້ນຕື່ມວ່າ: ກອງທຶນລຶບລ້າງຄວາມທຸກຍາກ ໄດ້ເຕີບໃຫຍ່ຂະຫຍາຍຕົວເປັນກ້າວໆມາ, ເຊິ່ງລັດຖະບານ ໄດ້ລົງທຶນຢ່າງມະຫານສານ ເຂົ້າໃນການພັດທະນາຊົນນະບົດ ເປັນຕົ້ນ ແມ່ນການສ້າງຖະໜົນຫົນທາງ, ສ້າງໃຫ້ປະຊາຊົນໄດ້ຊົມໃຊ້ໄຟຟ້າ, ສ້າງຊົນລະປະທານ ຖ້າບ່ອນໃດມີເງື່ອນໄຂ ແລະ ເຮັດໃຫ້ເຂົາເຈົ້າ ສາມາດຜະລິດສິນຄ້າ ນັບມື້ນັບຫຼາຍຂຶ້ນ ເພື່ອເຮັດໃຫ້ປະຊາຊົນແຕ່ລະຄອບຄົວ ມີລາຍຮັບ, ສາມາດລ້ຽງຕົນເອງໄດ້ ແລະ ຜະລິດເປັນສິນຄ້າເພື່ອສົ່ງອອກ ເພື່ອໃຫ້ມີກຳໄລໄດ້ເທື່ອລະກ້າວ ເຊິ່ງຈຳນວນຕົກເລກ ໄດ້ສະແດງໃຫ້ເຫັນວ່າ: ປັດຈຸບັນນີ້ ມາຮອດປີ 2018 GDP ລາຍຮັບຕໍ່ຫົວຄົນຂອງປະເທດເຮົາແມ່ນ 2.500 ກວ່າໂດລາສະຫະລັດ ຕໍ່ຄົນຕໍ່ປີ ເຫັນໄດ້ວ່າເພີ່ມຂຶ້ນຫຼາຍເມື່ອທຽບໃສ່ໃນເມື່ອກ່ອນ,
ນອກຈາກນີ້ ລາຍຮັບແຫ່ງຊາດ ແມ່ນບັນລຸ 2.209 ໂດລາສະຫະລັດ ຖ້າທຽບໃສ່ມາດຕະຖານ ຂອງການຈະເອົາປະເທດອອກຈາກສະຖານະພາບດ້ອຍພັດທະນາ ຖ້າຄິດໄລ່ ລາຍຮັບແຫ່ງຊາດ ພວກເຮົາລື່ນຄາດໝາຍໜ້ອຍໜຶ່ງ ແຕ່ເງື່ອນໄຂອື່ນໆ ພວກເຮົາຍັງຕ້ອງໄດ້ສູ້ຊົນ.
ເປົ້າໝາຍຕົ້ນຕໍຂອງພັກຂອງພັກ ແລະ ລັດຖະບານເຮົາ ແມ່ນເລັ່ງໃສ່ການລຶບລ້າງຄວາມທຸກຍາກ ໃຫ້ປະຊາຊົນແຕ່ລະຄອບຄົວ, ແຕ່ລະບ້ານ, ແຕ່ລະເມືອງ ເປັນຕົ້ນຕໍ, ພາຍຫຼັງມີກອງທຶນລຶບລ້າງຄວາມທຸກຍາກ ແຫ່ງຊາດຂຶ້ນມາ ພວກເຮົາສາມາດຊ່ວຍເຫຼືອປະຊາຊົນ ໄດ້ຫຼາຍດ້ານ ເປັນຕົ້ນອັດຕາການເຂົ້າໂຮງຮຽນຊັ້ນປະຖົມຂອງເດັກໃນເກນອາຍຸ 5 ປີ ຢູ່ໃນບັນດາບ້ານເປົ້າໝາຍ ຫຼື ເມືອງເປົ້າໝາຍ ທີ່ຈະລຶບລ້າງຄວາມທຸກຍາກ ບັນລຸເຖິງ 98% ຖືວ່າເປັນໂຕເລກທີ່ສູງ
ຜົນງານ 15 ປີ ພາຍຫຼັງກອງທຶນລຶບລ້າງຄວາມທຸກຍາກ ໄດ້ສ້າງຕັ້ງຂຶ້ນນັ້ນ ສາມາດລຶບລ້າງຄວາມທຸກຍາກໄດ້ຢ່າງເທື່ອລະກ້າວ ເຊິ່ງຄອບຄົວທີ່ຍັງທຸກຍາກແມ່ນຍັງເຫຼືອເມືອງທຸກຍາກ 15%, ບ້ານທຸກຍາກຍັງ 20%, ບ້ານທີ່ພັດທະນາແລ້ວທີ່ຢູ່ໃນເຂດຊົນນະບົດ ເມືອງເປົ້າໝາຍ ບັນລຸເຖິງ 48,38%.
ພ້ອມນີ້ີ້, ທ່ານນາຍົກລັດຖະມົນຕີ ຍັງໄດ້ສະເໜີວ່າ: ສິ່ງສຳຄັນທີ່ສຸດແມ່ນເອົາປະຊາຊົນເປັນກົກ, ເປົ້າໝາຍໃຫ້ຖືປະຊາຊົນເປັນໃຈກາງເອົາຄວາມຮຽກຮ້ອງຕ້ອງການຕົວຈິງ ຂອງປະຊາຊົນ ເປັນຈຸເລີ່ມຂອງການສະໜອງ ຄວາມຮຽກຮ້ອງຕ້ອງການຂອງເຂົາເຈົ້າ ແລະ ເອົາຈຸດພິເສດ, ຄວາມສາມາດບົ່ມຊ້ອນຂອງທ້ອງຖິ່ນເປັນທ່າແຮງຕົ້ນຕໍ ເຊິ່ງປະຊົນທ້ອງຖິ່ນມີຄວາມຊິ່ນເຄີຍໃນການຜະລິດ ແລະ ນຳໃຊ້ມູນເຊື້ອຂອງປະຊາຊົນທີ່ມີຢູ່ ເພື່ອສ້າງລາຍຮັບຂຶ້ນມາໄດ້ໄວຂຶ້ນ.
ລັດຖະບານມີຄວາມພະຍາຍາມຫຼາຍທີ່ສຸດ ໃນການສຸມທຶນຮອນໃນການພັດທະນາຊົນນະບົດ ເພື່ອຊຸກຍູ້ໃນການລຶບລ້າງຄວາມທຸກຍາກ ຂອງປະຊາຊົນ ແຕ່ວ່າລັດຖະບານມີຫຼາຍງົບປະມານ, ມີຫຼາຍຂະແໜງການ ທີ່ຈະສົ່ງເສີມ ຫຼື ຊ່ວຍໃຫ້ຊົນນະບົດ, ບ້ານ, ເມືອງທີ່ທຸກຍາກ ໄດ້ຮັບການພັດທະນາ
ເຊິ່ງປີນີ້ໄດ້ສົ່ງເສີມ ເປັນປີທ່ອງທ່ຽວລາວ ແລະ ປີໜ້າຈະເປັນປີທ່ອງທ່ຽວລາວ-ຈີນ ຖ້າມີການຈັດຕັ້ງປະຕິບັດຢ່າງເປັນລະບົບດີ ນັກທ່ອງທ່ຽວຈະລົງໄປຫາຊົນນະບົດ ແລະ ປະຊາຊົນຈະໄດ້ຂາຍສິນຄ້າຂອງເຂົາເຈົ້າເອງ ແລະ ຈະໄດ້ລາຍຮັບຈາກນັກທ່ອງທ່ຽວ ເຊິ່ງລັດຖະບານມີຫຼາຍທິດທາງທີ່ຈະສົ່ງເສີມໃນຊົນນະບົດ ເພື່ອໃຫ້ການລຶບລ້າງຄວາມທຸກຍາກ ປະຊາຊົນໃຫ້ນັບມື້ນັບດີຂຶ້ນ.
ຂໍ້ມູນຈາກ: ຂປລ.