ພິທີລົງນາມບົດບັນທຶກວ່າດ້ວຍການຮ່ວມມືລະຫວ່າງ ອົງຄະນະພັກ ນະຄອນຫຼວງວຽງຈັນ (ນວ) ແລະ ອົງຄະນະພັກ ສະຫະພັນຣັດເຊຍ ປະຈຳນະຄອນຫຼວງມົດສະກູ ຈັດຂຶ້ນວັນທີ 21 ທັນວາ 2018 ຢູ່ຫ້ອງວ່າການ ນວ ໃນໂອກາດທີ່ຄະນະຜູ້ແທນອົງຄະນະພັກສະຫະພັນຣັດເຊຍ ປະຈຳນະຄອນຫຼວງມົດສະກູ ເດີນທາງມາຢ້ຽມຢາມລາວ ວັນທີ 17-22 ທັນວາ 2018, ລົງນາມລະຫວ່າງທ່ານ ບຸນທອງ ພົມມະຈັນ ຄະນະປະຈຳພັກ ຫົວໜ້າຄະນະຈັດຕັ້ງ ນວ ແລະ ທ່ານ ປາຣໂຟນົບ ເດນິສ ອັນເດເຢວິດ ຄະນະກຳມະການຂັ້ນສູນກາງຂອງພັກກອມມູນິດຣັດເຊຍ ຮອງເລຂາອົງຄະນະພັກກອມມູນິດສະຫະພັນຣັດເຊຍ ປະຈຳນະຄອນຫຼວງມົດສະກູ ຜູ້ແທນສະພາດູມາຂອງສະຫະພັນສາທາລະນະລັດຣັດເຊຍ ໂດຍມີທ່ານ ສິນລະວົງ ຄຸດໄພທູນ ເຈົ້າຄອງ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.
ອົງຄະນະພັກ ສອງນະຄອນຫຼວງ ຈະສືບຕໍ່ສາຍພົວພັນກັນ ບົນພື້ນຖານຫຼັກການມິດຕະພາບ ຄວາມສາມັກຄີ ຄວາມສະເໝີພາບ ການເຄົາລົບເຊິ່ງກັນ ແລະ ກັນ ເພື່ອເປົ້າໝາຍໃນການຮັດແໜ້ນ ເສີມຂະຫຍາຍມິດຕະພາບ ແລະ ການຮ່ວມມືທີ່ມີມູນເຊື້ອລະຫວ່າງສອງພັກປະຊາຊົນຂອງສອງຊາດ ລາວ-ຣັດເຊຍ ກໍຄື ລະຫວ່າງນະຄອນຫຼວງມົດສະກູ ແລະ ນວ ອຳນວຍຄວາມສະດວກໃຫ້ການພັດທະນາສາຍພົວພັນ ຈະດຳເນີນການແລກປ່ຽນເອກະສານ ຂໍ້ມູນຂ່າວສານ ຜະລິດຕະພັນການພິມຂອງພັກ ບົດພິມທາງໜັງສືພິມຂອງພັກ ແລະ ທາງ”ເວັບໄຊ໌”ຂອງສອງຝ່າຍ ຈະສົ່ງການອວຍພອນໃຫ້ກັນ ແລະ ກັນ ໃນໂອກາດເຫດການສຳຄັນໃນຊີວິດການເມືອງຂອງອົງການຈັດຕັ້ງພັກ ແລກປ່ຽນຄະນະຜູ້ແທນເຊິ່ງກັນ ແລະ ກັນໃນແຕ່ລະໄລຍະ.
ອຳນວຍຄວາມສະດວກໃຫ້ການຕິດຕໍ່ພົວພັນເຊິ່ງກັນ ແລະ ກັນ ລະຫວ່າງອົງການຈັດຕັ້ງຊາວໜຸ່ມ ແມ່ຍິງ ຂອງສອງນະຄອນຫຼວງ ຈະຈັດການພົບປະແລກປ່ຽນບົດຮຽນລະຫວ່າງສະພາດູມາ ນະຄອນຫຼວງມົດສະກູ ແລະ ສະພາປະຊາຊົນ ນວ ເພື່ອເປົ້າໝາຍໃນການຮັດແໜ້ນສາຍພົວພັນມິດຕະພາບລະຫວ່າງສອງນະຄອນຫຼວງ ແລະ ຂົງເຂດຕ່າງໆຮ່ວມກັນ
ລວມທັງການກະຕຸກຊຸກຍູ້ການຈັດຕັ້ງປະຕິບັດບົດບັນທຶກ ທີ່ໄດ້ເຊັນກັນລະຫວ່າງອົງຄະນະພັກຂອງສອງນະຄອນຫຼວງ ອົງຄະນະພັກກອມມູນິດສະຫະພັນຣັດເຊຍ ຈະໃຫ້ການອຸປະຖຳຕໍ່ນັກສຶກສາລາວ ທີ່ຮ່ຳຮຽນຢູ່ສະຖາບັນການສຶກສາທີ່ນະຄອນຫຼວງມົດສະກູ ເພື່ອໃຫ້ຮູ້ໃນດ້ານຕ່າງໆຂອງຄຸນຄ່າທາງດ້ານປະຫວັດສາດ ແລະ ວັດທະນະທຳຂອງນະຄອນຫຼວງມົດສະກູ ເຄື່ອນໄຫວຮ່ວມກັນກັບຊາວໜຸ່ມຣັດເຊຍທີ່ທັນສະໄໝ ບົນພື້ນຖານຈິດໃຈລັດທິສາກົນກຳມະຊີບ.
ແຫຼ່ງຂ່າວ: ນສພ ວຽງຈັນໃໝ່.