Target Magazine
ສະຫະພາບເອີຣົບໃຫ້ການຊ່ວຍເຫຼືອ ວຽກງານເກັບກູ້ລະເບີດບໍ່ທັນແຕກຕົກຄ້າງ ຢູ່ແຂວງຫົວພັນ ໂຄງການດັ່ງກ່າວ ມີເປົ້າໝາຍຢູ່ໃນ 44 ບ້ານເປົ້າໝາຍ ແລະ ໃນພື້ນທີ່ 9.450.000 ຕາແມັດ ທີ່ໄດ້ຮັບຜົນກະທົບຈາກລະເບີດລູກຫວ່ານ.
ພ້ອມທັງຈະພັດທະນາ ແລະ ສະໜັບສະໜູນແນວທາງການຄຸ້ມຄອງວຽກງານ ການໂຄສະນາສຶກສາຄວາມສ່ຽງໄພຈາກລູກລະເບີບໍ່ທັນແຕກ ໃນລະດັບຂັ້ນບ້ານໃຫ້ເປັນຮູບປະທຳໃນໄລຍະຍາວ
ຊອກຫາຫຼາກຫຼາຍວິທີ ເພື່ອສະໜັບສະໜູນວຽກງານການຄຸ້ມຄອງ ຄວາມສ່ຽງຈາກລູກລະເບີດບໍ່ທັນແຕກໃນຊຸມຊົນ ເພື່ອເຮັດໃຫ້ປະຊາຊົນສາມາດປະຕິບັດກິດຈະກຳ ກໍຄື ການສ້າງສາພັດທະນາເສດຖະກິດ-ສັງຄົມໄດ້ຢ່າງປອດໄພ
ໂຄງການຈະໃຫ້ການເຝິກອົບຮົມ ຄູ-ອາຈານ ກ່ຽວກັບການສຶກສາຄວາມສ່ຽງໄພ ເພື່ອນຳໄປເຜີຍແຜ່ຜັນຂະຫຍາຍໃຫ້ກັບນັກຮຽນຂອງຕົນ
ໃນປັດຈຸບັນນີ້ ສະເລ່ຍທຸກໆສອງເດືອນຈະມີເຫດການລະເບີດແຕກ ແລະ ສ້າງຜົນເສຍຫາຍໃຫ້ແກ່ຊີວິດຊັບສິນຂອງປະຊາຊົນ.
ໃນນັ້ນ ໄດ້ເກີດຂຶ້ນກັບເດັກນ້ອຍນັກຮຽນເຂດພື້ນທີ່ສ່ຽງທີ່ບໍ່ທັນຮັບຮູ້ ແລະ ເຂົ້າໃຈເຖິງຜົນຮ້າຍຂອງລະເບີດບໍ່ທັນແຕກ ດັ່ງນັ້ນ ໂຄງການຈິ່ງເນັ້ນທີ່ຈະເຝິກອົບຮົມໃຫ້ແກ່ບັນດາຄູ-ອາຈານ ໃນເຂດພື້ນທີ່ສ່ຽງໄພເປັນຕົ້ນຕໍ.
ພິທີລົງນາມການຊ່ວຍເຫຼືອດັ່ງກ່າວ ຈັດຂຶ້ນໃນວັນທີ 20 ທັນວາ 2018 ຜ່ານມາ ທີ່ໂຮງແຮມເສດຖາປາລາສ ນະຄອນຫຼວງວຽງຈັນ ຮ່ວມລົງນາມຄັ້ງນີ້ ໂດຍທ່ານ ພູຂຽວ ຈັນທະສົມບູນ ຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກຕົກຄ້າງຢູ່ ສປປ ລາວ (ຄຊກລ) ແລະ ທ່ານ ເບີນົວ ຄູເຕີຣິແອ ຫົວໜ້າອົງການເພື່ອມະນຸດສະທຳ ແລະ ການມີສ່ວນຮ່ວມ ມີບັນດາຜູ້ຕາງໜ້າຈາກອຳນາດການປົກຄອງແຂວງຫົວພັນ ແລະ ແຂກຖືກເຊີນຈາກພາກສ່ວນກ່ຽວຂ້ອງເຂົ້າຮ່ວມ.
ໂຄງການຈັດຕັ້ງປະຕິບັດດັ່ງກ່າວ ໄດ້ຮັບທຶນຊ່ວຍເຫຼືອຈາກສະຫະພາບເອີຣົບ (EU) ດ້ວຍມູນຄ່າ 2,7 ລ້ານເອີໂຣ ຫຼື ປະມານ 30 ຕື້ກວ່າກີບ ມີໄລຍະການຈັດຕັ້ງປະຕິບັດງານແຕ່ນີ້ເຖິງປີ 2021.
ຂໍ້ມູນຈາກເວບໄຊ໌: ວຽງຈັນໃໝ່
