Target Magazine
ໃນວັນທີ 17 ທັນວາ 2018, ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ ສະຫວັນນະເຂດ ທ່ານຄໍາໄຕ ສີພັນດອນ ອະດີດປະທານພັກ ອະດີດປະທານປະເທດ ແຫ່ງ ສປປ ລາວ ໄດ້ພົບປະໂອ້ລົມກັບພະນັກງານການນໍາຫຼັກແຫຼ່ງແຂວງ ສະຫວັນນະເຂດ ເຊິ່ງມີທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາພັກແຂວງ ເຈົ້າແຂວງ ສະຫວັນນະເຂດ ບັນດາທ່ານໃນຄະນະປະຈໍາພັກແຂວງ ກໍາມະການພັກແຂວງ ຫົວໜ້າພະແນກການຕ່າງໆອ້ອມຂ້າງແຂວງ ເຂົ້າຮ່ວມຮັບຟັງການໂອ້ລົມໃນຄັ້ງນີ້.
ພາຍຫຼັງທີ່ທ່ານ ສັນຕິພາບ ພົມວິຫານ ຂຶ້ນລາຍງານສະພາບການຈັດຕັ້ງປະຕິບັດການພັດທະນາເສດຖະກິດ-ສັງຄົມ ຂອງແຂວງໃນໄລຍະຜ່ານມາ,
ຈາກນັ້ນ ທ່ານ ຄໍາໄຕ ສີພັນດອນ ກໍໃຫ້ກຽດໂອ້ລົມ ເຊິ່ງມີເນື້ອໃນບາງຕອນສໍາຄັນວ່າ: ການຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກ 3 ຂັ້ນຂອງແຂວງເປັນຕົ້ນ: ມີບາງດ້ານຖ້າບໍ່ໄດ້ຮັບການແກ້ໄຂຢ່າງຈິງຈັງ ກໍອາດເປັນອຸປະສັກຕໍ່ຈຸດໝາຍປາຍທາງຂອງພັກເຮົາ ຄື: ລັກສະນະດີເລີດຂອງລະບອບໃໝ່ລະບອບສັງຄົມນິຍົມ ທີ່ພວກເຮົານໍາພານັບ ແຕ່ມື້ເລີ່ມຕົ້ນເຮັດການປະຕິວັດ.
ມາຮອດປັດຈຸບັນນີ້ ບໍ່ທັນສະແດງອອກຢ່າງເດັ່ນຊັດໂດຍສະເພາະພາຍຫຼັງປະເທດຊາດ ໄດ້ຮັບການປົດປ່ອຍປະຊາຊົນລ້ວນແຕ່ຄອງຄອຍ ແລະ ຝາກຄວາມຫວັງຢາກເຫັນສັງຄົມລາວ ມີຄວາມສະເໝີພາບ ແລະ ຍຸຕິທໍາ ບໍ່ໃຫ້ມີການຂູດຮີດ ເອົາລັດເອົາປຽບກັນ, ບໍ່ໃຫ້ມີການແບ່ງຊັ້ນ-ແບ່ງຂັ້ນໃນສັງຄົມ, ຢາກເຫັນນະໂຍບາຍດ້ານເສດຖະກິດ ແລະ ສັງຄົມທີ່ຊ່ວຍໃຫ້ຊີວິດການເປັນຢູ່ທາງດ້ານວັດຖຸ ແລະ ວັດທະນະທໍາຂອງປະຊາຊົນດີຂຶ້ນ,
ທ່ານກ່າວເນັ້ນອີກວ່າ: ພະນັກງານເຮົາຢູ່ແຕ່ລະຂັ້ນເຄີຍໃຫ້ຄໍາໝັ້ນສັນຍາວ່າ: ຈະເຮັດທຸກຢ່າງເພື່ອຜົນປະ ໂຫຍດຂອງປະຊາຊົນ ຈະໃຫ້ປະຊາຊົນມີຄວາມສຸກກ່ອນພະນັກງານຈຶ່ງສຸກນໍາຫຼັງ ແຕ່ໃນທຸກມື້ນີ້ ພະນັກງານເຮົາຈໍານວນບໍ່ໜ້ອຍມີການກະທໍາສໍ້ລາດບັງຫຼວງ, ຮັ່ງມີລໍ້າລວຍລື່ນປະຊາຊົນຫຼາຍສິບຫຼາຍຮ້ອຍເທື່ອ ຍ້ອນສວຍໃຊ້ອໍານາດໜ້າທີ່ຕໍາແໜ່ງທີ່ປະຊາຊົນມອບໃຫ້,
ມີພະນັກງານຈໍານວນບໍ່ໜ້ອຍເປັນອາຍາສິດ ຫ່າງເຫີນມະຫາຊົນ, ວາງຕົວເປັນເຈົ້ານາຍລະບອບໃໝ່, ໄປທາງໃດກໍໃຫ້ມີການ ຮັບຕ້ອນຮັບໃຫຍ່ໂຕ ແລະ ຫຼິ້ນກິນຟູມເຟືອຍ, ເຖິງວ່າພື້ນຖານເສດຖະກິດຂອງພວກເຮົາຈະມີຂະໜາດໃຫຍ່ຂຶ້ນ ແຕ່ກໍແລກດ້ວຍມູນຄ່າລາຄາແພງ,
ກ່ອນອື່ນແມ່ນການຂຸດຄົ້ນຊັບພະຍາກອນທໍາມະຊາດແບບຊະຊາຍເພື່ອແລກກັບລາຍຮັບໃຫ້ແກ່ງົບປະມານ, ແລກກັບການສ້າງຖະໜົນຫົນທາງ, ສໍານັກງານອົງການ, ແລກກັບການ ເພີ່ມປະລິມານການເພີ່ມສິນຄ້າສົ່ງອອກ ອັນເຮັດໃຫ້ຊັບພະຍາກອນທໍາມະຊາດຢູ່ລາວຫຼຸດລົງຢ່າງໄວວາ ແລະ ຍາກທີ່ຈະຟື້ນຟູຄືນໄດ້,
ດ້ານໜຶ່ງອີກການສ້າງພື້ນຖານໂຄງລ່າງເສດຖະກິດກໍມີມູນຄ່າແພງກວ່າຄວາມເປັນຈິງຫຼາຍເທົ່າຕົວ, ອັນນີ້ ເປັນການແລກດ້ວຍການສ້າງໜີ້ສິນທີ່ໜັກໜ່ວງໃຫ້ແກ່ປະເທດຊາດ, ການລະເມີດສິດເປັນເຈົ້າຂອງປະຊາຊົນ ຍັງເກີດຂຶ້ນຢ່າງເປັນປະຈໍາ,
ແຕ່ເຖິງຢ່າງໃດກໍຕາມພັກ ແລະ ລັດເຮົາຍາມໃດກໍສົ່ງເສີມໃຫ້ປະຊາຊົນລາວຂຸດຄົ້ນສະຕິປັນຍາ, ເຫື່ອແຮງ ແລະ ຊັບທຶນ ເຂົ້າໃນການພັດທະນາຕົນເອງ ແລະ ພັດທະນາປະເທດຊາດ.
ໃນຕອນທ້າຍ ທ່ານຍັງໄດ້ ເນັ້ນໜັກໃຫ້ພະນັກງານການນໍາຂັ້ນສູງຈົ່ງຫ້າວຫັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ແຕ່ລະຂັ້ນຂອງພັກ ໃຫ້ປະເທດຊາດມີການພັດທະນາ ປະຊາຊົນມີຄວາມຜາສຸກ.
ຂອຍໃຈຂໍ້ມູນຈາກ: ຂ່າວ ສະຫວັນພັດທະນາ.
