Target Magazine
ທ່ານ ເສີມຄຳ ຈັນທະວົງ ຫົວໜ້າໂຄງການພັດທະນາຊົນນະບົດ ໄດ້ໃຫ້ຮູ້ວ່າ: ລັດຖະບານ ເຢຍລະມັນ ໄດ້ຕົກລົງສືບຕໍ່ຊ່ວຍເຫຼືອລ້າ ເພື່ອກໍ່ສ້າງພື້ນຖານໂຄງລ່າງທາງຊົນນະບົດໄລຍະ 1 ທີ່ໄດ້ຈັດຕັ້ງປະຕິບັດຢູ່ 2 ເມືອງທຸກຍາກຂອງແຂວງ ສະຫວັນນະເຂດຄື: ເມືອງນອງ ແລະ ເມືອງເຊໂປນ, ມີລວງຍາວທັງໝົດ 47,7 ກວ່າກິໂລແມັດ, ການກໍ່ສ້າງໄດ້ແບ່ງອອກເປັນ 3 ສັນຍາ, ມີໄລຍະເວລາການກໍ່ສ້າງແມ່ນ 18 ເດືອນ.
ສັນຍາທີ 1 ແມ່ນ ບໍລິສັດ PMS ກໍ່ສ້າງຈຳກັດ, ແມ່ນກໍ່ສ້າງເສັ້ນທາງສາມແຍກທາງເລກ 9 ບ້ານດົງ ຫາ ບ້ານສະແລັນ, ທາງນ້ຳເບີ 2.6306, ມີລວງຍາວ 24,3 ກິໂລແມັດ, ໜ້າທາງກວ້າງ 5,5 ແມັດ, ໃນມູນຄ່າ 14,52 ຕື້ກວ່າກີບ.
ສັນຍາທີ 2 ແມ່ນ ບໍລິສັດ TSB ກໍ່ສ້າງຂົວທາງຈຳກັດ, ແຕ່ເສັ້ນທາງສາມແຍກບ້ານສະແລັນ ຫາ ບ້ານກາໂລ, ທາງນ້ຳເບີ 2.6306, ລວງຍາວ 18 ກິໂລແມັດ, ເມືອງເຊໂປນ, ໜ້າທາງກວ້າງ 4,5 ແມັດ, ໃນມູນຄ່າ 13,34 ຕື້ກວ່າກີບ.
ສັນຍາທີ 3 ແມ່ນ ບໍລິສັດຫຼວງໄຊ ກໍ່ສ້າງຂົວທາງ ແລະ ຮ່ວມກັບບໍລິສັດ PEC ຈຳກັດ ທາງນ້ຳເບີ 5.6458, ບ້ານດົງນາສານ ຫາ ບ້ານພູນໝາກມີ້, ລວງຍາວ 15,4 ກິໂລແມັດ, ເມືອງນອງ, ໜ້າທາງກວ້າງ 4,5 ແມັດ, ມູນຄ່າ 7,54 ຕື້ກວ່າກີບ.
ການກໍ່ສ້າງທາງຊົນນະບົດ ຢູ່ແຂວງ ສະຫວັນນະເຂດໃນຄັ້ງນີ້ ໂດຍໄດ້ຮັບທຶນງົບປະມານການຊ່ວຍເຫຼືອລ້າ ຈາກລັດຖະບານເຢຍລະມັນ 85%, ທຶນປະກອບສ່ວນຂອງລັດຖະບານລາວ 15% ໃນນັ້ນກະຊວງ ຍທຂ 10% ແລະ ແຂວງສະຫວັນນະເຂດ 5%.
ພິທີເຊັນສັນຍາໂຄງການພັດທະນາຊົນນະບົດ ຢູ່ເຂດເມືອງນອງ ແລະ ເມືອງເຊໂປນ ແຂວງສະຫວັນນະເຂດ ທີ່ໄດ້ຮັບທຶນຊ່ວຍເຫຼືອລ້າຈາກລັດຖະບານ ເຢຍລະມັນ ໂດຍຜ່ານທະນາຄານພັດທະນາຂອງປະເທດເຢຍລະມັນ (KFW) ຈັດຂຶ້ນເມື່ອບໍ່ດົນຜ່ານມາ ໂດຍການຮ່ວມລົງນາມ ລະຫວ່າງທ່ານ ປະສົງສິນ ຈະເລີນສຸກ ຫົວໜ້າພະແນກ ຍທຂ ແຂວງສະຫວັນນະເຂດ, ທ່ານ ເສີມຄຳ ຈັນທະວົງ ຫົວໜ້າໂຄງການພັດທະນາຊົນນະບົດ, ທ່ານ ລາຍເນີ ຄູນເລີ ຊ່ຽວຊານໂຄງການ ແລະ ຜູ້ອຳນວຍການ 3 ບໍລິສັດຜູ້ຮັບເໝົາກໍ່ສ້າງ.
ຂໍ້ມູນຈາກ: ຂປລ.
