ກອງປະຊຸມພົບປະລະຫວ່າງຄະນະປະຈຳພັກ ນະຄອນຫຼວງວຽງຈັນ (ນວ) ແລະ ຄະນະພັກກະຊວງການເງິນ ໄດ້ຈັດຂຶ້ນ ເມື່ອສັບປະດາຜ່ານມາ ທີ່ຫ້ອງວ່າການປົກຄອງ ນວ.
ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໃຫ້ຄຳຊີ້ນຳຕໍ່ຂໍ້ສະເໜີຂອງ ນວ ວ່າ: ສຳລັບໜີ້ສິນໂຄງການລົງທຶນຂອງລັດໃນ 46 ໂຄງການນັ້ນ ໃຫ້ແບ່ງຄວາມຮັບຜິດຊອບຢ່າງຈະແຈ້ງ ຂຶ້ນກັບພາກສ່ວນໃດ ມອບໃຫ້ພາກສ່ວນນັ້ນຮັບຜິດຊອບ
ສຳລັບໜີ້ກະແສໄຟຟ້າ ທີ່ຄ້າງຈ່າຍໃນຜ່ານມານັ້ນ ແມ່ນມອບໃຫ້ ນວ ເປັນຜູ້ຮັບຜິດຊອບເອງ ແລະ ສ່ວນບັນຫາອື່ນໆແມ່ນຈະນຳພິຈາລະແກ້ໄຂຮ່ວມກັບພາກສ່ວນກ່ຽວຂ້ອງ.
ກອງປະຊຸມໄດ້ປຶກສາຫາລືຫຼາຍບັນຫາສຳຄັນຢູ່ ນວ ເປັນຕົ້ນ ບັນຫາໜີ້ສິນໂຄງການລົງທຶນຂອງລັດທີ່ ນວ ສະເໜີໃຫ້ແບ່ງຄວາມຮັບຜິດຊອບໜີ້ສິນ ລະຫວ່າງສູນກາງ ແລະ ທ້ອງຖິ່ນ ເຊິ່ງໂຄງການໃຫຍ່ມີລັກສະນະລວມ ຂອງປະເທດໃນ ນວ ມີ 46 ໂຄງການ ມູນຄ່າຕາມສະພາຮັບຮອງ 4.000 ຕື້ກວ່າກີບ ມູນຄ່າຕາມສັນຍາ 4.510 ຕື້ກວ່າກີບ ປະຕິບັດໄດ້ 70,60% ຍັງຄ້າງຊຳລະ 3.515 ຕື້ກວ່າກີບ ແລະ ຍັງຄ້າງຊຳລະຕາມວຽກສຳເລັດ 2.189 ຕື້ກວ່າກີບ
ສ່ວນໂຄງການ ທີ່ມີລັກສະນະຮັບໃຊ້ການພັດທະນາ ຂອງ ນວ ມີ 426 ໂຄງການ ມູນຄ່າຊຳລະຕາມສັນຍາ 3.808 ຕື້ກີບ ທີ່ ນວ ຮັບຜິດຊອບ ພ້ອມນັ້ນ ນວ ຍັງສະເໜີລັດຖະບານສືບຕໍ່ຊຳລະໜີ້ສິນ ໂຄງການລົງທຶນຂອງລັດຖະບານທີ່ສຳເລັດ 100% ແລະ ໃຫ້ກະຊວງການເງິນ ແລະ ລັດຖະບານເພີ່ມຕົວເລກການຊຳລະໜີ້ສິນຂອງ ນວ ແລະ ຂໍໃຫ້ ນວ ສືບຕໍ່ຂາຍ ຫຼື ຫັນຊັບສິນຈຳນວນໜຶ່ງຂອງ ນວ ຊຳລະໜີ້ ເພື່ອແກ້ໄຂສະພາບຄ່ອງທາງດ້ານການຊຳລະໜີ້ຂອງງົບປະມານລັດ.
ຂໍ້ມູນຈາກ: ເວບໄຊ໌ ວຽງຈັນໃໝ່.