ສູນທອນພົດຂອງສະຫາຍ ບຸນຍັງ ວໍລະຈິດ
ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ກ່າວໃນງານໂຮມຊຸມນຸມສະເຫຼີມສະຫຼອງວັນສ້າງຕັ້ງ ເມືອງວຽງໄຊຖານທີ່ໝັ້ນຂອງການປະຕິວັດລາວຄົບຮອບ 50 ປີ (ທີ່ເມືອງວຽງໄຊ, ວັນທີ 30 ພະຈິກ 2018)
—————————–
– ນ້ອມນະມັດສະການພຣະເຖຣານຸເຖຣະ!
– ສະຫາຍ ແລະ ເພື່ອນມິດທີ່ຮັກແພງທັງຫຼາຍ!
– ບັນດາແຂກທີ່ມີກຽດ ທັງພາຍໃນ ແລະ ຕ່າງປະເທດ!
– ພີ່ນ້ອງຮ່ວມຊາດ ແລະຊາວເມືອງວຽງໄຊ ທີ່ຮັກແພງທັງຫຼາຍ!
ມື້ນີ້, ຄະນະບໍລິຫານງານສູນກາງພັກ, ສະພາແຫ່ງຊາດ, ລັດຖະບານ, ສູນກາງແນວລາວສ້າງຊາດພ້ອມດ້ວຍ ຊາວເມືອງວຽງໄຊ ແລະ ປະຊາຊົນບັນດາເຜົ່າ ໃນທົ່ວປະເທດມີຄວາມເບີກບານມ່ວນຊື່ນ ແລະ ພາກພູມໃຈເປັນຢ່າງຍິ່ງທີ່ໄດ້ພ້ອມກັນຈັດຕັ້ງພິທີສະເຫຼີມສະຫຼອງວັນສ້າງຕັ້ງເມືອງວຽງໄຊຄົບຮອບ 50 ປີ, ວັນສະຖາປະນາ ສປປ ລາວ ຄົບຮອບ 43 ປີ ແລະ ວັນເກີດປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປວງຊົນລາວ ຄົບຮອບ 98 ປີ ຢູ່ທີ່ເມືອງວຽງໄຊຖານທີ່ໝັ້ນຂອງການປະຕິວັດລາວ ທີ່ສວຍສົດງົດງາມ ແລະ ມີມູນເຊື້ອສະຫງ່າລາສີແຫ່ງນີ້.
ໃນພິທີອັນຄຶກຂຶມ ແລະ ມີຄວາມໝາຍສຳຄັນທາງປະຫວັດສາດນີ້, ພວກເຮົາຮູ້ສຶກອາໄລຮັກຢ່າງສຸດຊຶ້ງ ແລະ ຈົດຈໍາລ້ຳລຶກຄຸນງາມຄວາມດີອັນໃຫ່ຍຫຼວງ ຂອງປະທານໄກສອນ ພົມວິຫານ ຜູ້ນໍາທີ່ປີຊາສາມາດ, ຜູ້ກໍ່ຕັ້ງ, ນໍາພາພັກເຮົາເຮັດສໍາເລັດພາລະກິດການປະຕິວັດປົດປ່ອຍຊາດ ແລະ ນໍາພາລິເລີ່ມການປ່ຽນແປງໃໝ່ຮອບດ້ານ ມີຫຼັກການຢູ່ປະເທດເຮົາ, ພ້ອມກັນນັ້ນກໍມີຄວາມອາໄລຮັກ ແລະ ຮູ້ບຸນຄຸນ, ຈົດຈໍາຄຸນງາມຄວາມດີອັນໃຫຍ່ຫຼວງຂອງບັນດາສະຫາຍຜູ້ນໍາພັກ-ລັດ, ພະນັກງານ, ສະມາຊິກພັກ, ນັກຮົບ ແລະ ປະຊາຊົນລາວເຜົ່າຕ່າງໆ, ຕະຫຼອດເຖິງນັກຮົບອາສາສະໝັກ, ຊ່ຽວຊານຫວຽດນາມ ແລະເພື່ອນມິດສາກົນ ທີ່ໄດ້ເສຍສະຫຼະຊີວິດ, ເລືອດເນື້ອເພື່ອຄວາມເປັນເອກະລາດແຫ່ງຊາດ ແລະ ຄວາມຜາສຸກຂອງປະຊາຊົນລາວບັນດເຜົ່າ, ເພື່ອສະແດງຄວາມຮູ້ບຸນຄຸນ, ຈົດຈໍາລໍ້າລຶກຄຸນງາມຄວາມດີຂອງບັນດາສະຫາຍເຫຼົ່ານັ້ນ, ຂ້າພະເຈົ້າສະເໜີ ບັນດາສະຫາຍລຸກຂຶ້ນກົ້ມຫົວໄວ້ອາໄລເຖິງດວງວິນຍານຂອງພວກເພິ່ນ 1 ນາທີ (ຂໍເຊີນ).
ຕາງໜ້າຄະນະບໍລິຫານງານສູນກາງພັກ, ສະພາແຫ່ງຊາດ, ລັດຖະບານ ແລະ ສ່ວນຕົວ, ຂ້າພະເຈົ້າ ຂໍສົ່ງຄວາມຢ້ຽມຢາມຖາມຂ່າວອັນອົບອຸ່ນ, ຄວາມສາມັກຄີຮັກແພງອັນສະໜິດສະໜົມ ແລະ ພອນໄຊອັນປະເສີດ ໄປຍັງບັນດານັກປະຕິວັດອາວຸໂສ, ວິລະຊົນແຫ່ງຊາດ, ນັກຮົບແຂ່ງຂັນ, ພະນັກງານ, ສະມາຊິກພັກ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ ຕະຫຼອດຮອດພີ່ນ້ອງຮ່ວມຊາດ ໃນທົ່ວປະເທດ ແລະ ພີ່ນ້ອງຊາວລາວທີ່ຢູ່ຕ່າງປະເທດ ມານະໂອກາດນີ້ດ້ວຍ.
ຂໍສະແດງຄວາມຂອບອົກຂອບໃຈຢ່າງຈິງໃຈ ມາຍັງບັນດາສະຫາຍເພື່ອນມິດຜູ້ຢູ່ໃກ້ ແລະ ຢູ່ໄກ ທີ່ໄດ້ນຳເອົາຄວາມສາມັກຄີ, ຮັກແພງ ອັນສະໜິດສະໜົມ ແລະ ອົບອຸ່ນ ມາສູ່ພັກ-ລັດ ກໍຄືປະຊາຊົນບັນດາເຜົ່າລາວ ໃນໂອກາດວັນທີ່ມີຄວາມໝາຍທາງປະຫວັດສາດນີ້, ອັນສະແດງໃຫ້ເຫັນເຖິງມິດຕະພາບ ແລະສາຍພົວພັນທີ່ໝັ້ນຄົງຂະໜົງແກ່ນບໍ່ວ່າໃນສະໄໝຕໍ່ສູ້ປົດປ່ອຍຊາດ ໃນເມື່ອກ່ອນກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດເຮົາໃນປັດຈຸບັນ.
ບັນດາສະຫາຍ ແລະ ເພື່ອນມິດທີ່ຮັກແພງທັງຫຼາຍ!
ຊາດລາວເຮົາ ເປັນຊາດໜຶ່ງ ທີ່ມີປະຫວັດສາດອັນສະຫງ່າງາມແຫ່ງການກໍ່ຕັ້ງ ແລະ ປົກປັກຮັກສາປະເທດເປັນເວລາພັນປີ, ເປັນຊາດໜຶ່ງທີ່ມີອະລິຍະທໍາ, ມີວັດທະນະທໍາ ອັນດີງາມ ທີ່ເປັນເອກະລັກສະເພາະຂອງຕົນເອງ.
ປະເທດຊາດຂອງພວກເຮົາ ນັບແຕ່ໄດ້ທ້ອນໂຮມເຂົ້າເປັນອານາຈັກລ້ານຊ້າງ (ປີ ຄ.ສ 1353) ພາຍໃຕ້ການນໍາພາຂອງເຈົ້າຟ້າງຸ່ມ ແລະ ບັນພະບູລຸດອື່ນໆ ຂອງພວກເຮົາ ໄດ້ພາປະຊາຊົນເຮົາກໍ່ຕັ້ງ, ສ້າງສາພັດທະນາຜ່ານຫຼາຍຍຸກ, ຫຼາຍສະໄໝ ຊຶ່ງມີທັງຍຸກທີ່ຮຸ່ງເຮືອງສີວິໄລ ແລະ ມີທັງໄລຍະສູນເສຍເອກະລາດ ຕົກເປັນເມືອງຂຶ້ນຂອງຕ່າງຊາດເປັນເວລາຮ້ອຍກວ່າປີ, ແຕ່ດ້ວຍມູນເຊື້ອຮັກເຊື້ອແພງຊາດອັນດູດດື່ມ, ຄວາມສາມັກຄີປອງດອງອັນໜັກແໜ້ນ, ປະຊາຊົນລາວບັນດາເຜົ່າ ໄດ້ຮ່ວມແຮງຮ່ວມໃຈກັນປົກປັກຮັກສາປະເທດຊາດອັນແສນຮັກຂອງຕົນ ແລະ ເດັດດ່ຽວລຸກຂຶ້ນຕໍ່ສູ້ບໍ່ຍອມຈໍານົນຕ້ານ ການຮຸກຮານ, ການຢຶດຄອງຂອງສັກດີນາຕ່າງດ້າວ.
ການລຸກຂຶ້ນຕໍ່ສູ້ຂອງປະຊາຊົນເດັ່ນກວ່າໝູ່ ແມ່ນຂະບວນການຕໍ່ສູ້ກູ້ຊາດ ທີ່ນຳໂດຍເຈົ້າອານຸວົງ, ພໍ່ກະດວດ, ອົງແກ້ວ, ອົງກົມມະດຳ ແລະ ເຈົ້າຟ້າປັດໃຈ; ການຕໍ່ສູ້ດັ່ງກ່າວເຖິງວ່າບໍ່ໄດ້ຮັບໄຊຊະນະຢ່າງສົມບູນ, ແຕ່ໄດ້ປະໄວ້ມູນເຊື້ອຮັກເຊື້ອແພງຊາດ, ມູນເຊື້ອອັນພິລາດອາດຫານ ບໍ່ຍອມຈຳນົນ ແລະ ຕໍ່ສູ້ຢ່າງໜຽວແໜ້ນ ເພື່ອກອບກູ້ເອກະລາດອິດສະຫຼະພາບ.
ບັນດາສະຫາຍ ແລະ ເພື່ອນມິດທີ່ຮັກແພງທັງຫຼາຍ !
ມະຫາປະຕິວັດສັງຄົມນິຍົມເດືອນຕຸລາຣັດເຊຍປີ 1917 ໄດ້ຮັບໄຊຊະນະ, ເປັນຂີດໝາຍສຳຄັນເຮັດໃຫ້ບັນດາປະຊາຊາດໃນທົ່ວໂລກ ທີ່ຕົກເປັນເມືອງຂຶ້ນ ແລະ ເຄິ່ງເມືອງຂຶ້ນນັ້ນ ລຸກຂຶ້ນຕໍ່ສູ້ເພື່ອຍາດເອົາເອກະລາດສິດເສລີພາບ ແລະ ອໍານາດອະທິປະໄຕມາໃຫ້ຕົນເອງ.
ຢູ່ອິນດູຈີນ, ສາມຊາດລາວ-ຫວຽດນາມ-ກຳປູເຈຍ ພາຍໃຕ້ການນໍາພາທີ່ປີຊາສາມາດ ແລະ ສະຫຼາດສ່ອງໃສຂອງພັກຄອມມູນິດ ອີນດູຈີນ ໂດຍແມ່ນ ປະທານໂຮ່ຈີມິນ ຜູ້ນໍາທີ່ຍິ່ງໃຫ່ຍ ແລະ ເຄົາລົບຮັກເປັນຜູ້ນໍາ, ປະຊາຊົນລາວບັນດາເຜົ່າ ໄດ້ພ້ອມກັນລຸກຂຶ້ນຕໍ່ສູ້ຕ້ານພວກຈັກກະພັດ, ພວກລ່າເມືອງຂຶ້ນແບບເກົ່າຢ່າງພິລະອາດຫານ, ລາວໄດ້ປະກາດເອກະລາດ ເມື່ອວັນທີ 12 ຕຸລາ ປີ 1945 ເພື່ອໃຫ້ຊາວໂລກໄດ້ຮັບຮູ້ຄວາມເປັນເອກະລາດຂອງລາວ.
ພໍແຕ່ໄດ້ຮັບເອກະລາດ ບໍ່ເທົ່າໃດເດືອນ ພວກລ່າເມືອງຂຶ້ນແບບເກົ່າ ກໍກັບຄືນມາຮຸກຮານລາວອີກ ຄັ້ງທີ 2. ໃນສະພາບການດັ່ງກ່າວ, ກອງປະຊຸມໃຫຍ່ແນວລາວຕໍ່ຕ້ານທົ່ວປະເທດ ໄດ້ໄຂຂຶ້ນ ໃນກາງເດືອນ ສິງຫາ ປີ 1950 ໄດ້ວາງໂຄງການ ການເມືອງ 12 ຂໍ້, ໄດ້ເລືອກຕັ້ງຄະນະກໍາມະການສູນກາງແນວລາວອິດສະຫຼະ ແລະ ແຕ່ງຕັ້ງລັດຖະບານລາວຕໍ່ຕ້ານ ເພື່ອສືບຕໍ່ພາປະຊາຊົນລາວຕໍ່ສູ້ຕ້ານກັບພວກລ່າເມືອງຂຶ້ນແບບເກົ່າ ທີ່ເຂົ້າມາຮຸກຮານລາວ ຈົນໄດ້ຮັບໄຊຊະນະ ຫຼັງຈາກນັ້ນ ພວກຈັກກະພັດລ່າເມືອງຂຶ້ນແບບໃໝ່ ກໍເຂົ້າມາແທນທ່ີ.
ບັນດາສະຫາຍ ແລະ ເພື່ອນມິດທີ່ຮັກແພງທັງຫຼາຍ!
ໂດຍຕອບສະໜອງກັບຄວາມຮຽກຮ້ອງຕ້ອງການຂອງພາລະກິດຕໍ່ສູ້ກູ້ຊາດ ແລະ ການເຕີບໃຫ່ຍຂະຫຍາຍຕົວຂອງກຳລັງການປະຕິວັດລາວ, ວັນທີ 22 ມີນາ ປີ 1955 ພັກປະຊາຊົນລາວ ຊຶ່ງແມ່ນພັກປະຊາຊົນປະຕິວັດລາວ ໃນປັດຈຸບັນ ໄດ້ຮັບການສ້າງຕັ້ງຂຶ້ນຢູ່ຖານທີ່ໝັ້ນ ແຂວງຫົວພັນ (ຕາແສງໂສຍ, ເມືອງໂສຍ) ນັ້ນແມ່ນເຫດການການເມືອງທີ່ມີຄວາມໝາຍສໍາຄັນທາງປະຫວັດສາດຂອງຊາດລາວເຮົາ, ເປັນຄັ້ງທໍາອິດທີ່ໄດ້ມີພັກການເມືອງປະຕິວັດສະເພາະຂອງຕົນ ເຮັດໃຫ້ການຕໍ່ສູ້ປະຕິວັດຂອງປະຊາຊົນເຮົາເຊື່ອມເຂົ້າເປັນສ່ວນໜຶ່ງຂອງການປະຕິວັດໃນອິນດູຈີນກໍຄືໃນໂລກ, ເປັນການສະໜອງຕອບຢ່າງທັນການຕໍ່ຄວາມຮຽກຮ້ອງຕ້ອງການ ຂອງການຕໍ່ສູ້ປະຕິວັດ ຂອງປະຊາຊົນທີ່ພວມກ້າວສູ່ບາດລ້ຽວໃໝ່ອັນຂ້ຽວຂາດທີ່ສຸດໃນເວລານັ້ນ, ເປັນການປຸກລະດົມກໍາລັງໃຈ, ເພີ່ມຄວາມເຊື່ອໝັ້ນຂອງປະຊາຊົນລາວບັນດາເຜົ່າ ຕໍ່ໄຊຊະນະຂອງພາລະກິດປະຕິວັດ, ເປັນການກະຕຸກຊຸກຍູ້ໃຫ້ພະນັກງານ, ນັກຮົບ ແລະ ປະຊາຊົນເສີມຂະຫຍາຍມານະຈິດປະຕິວັດ ແລະ ນໍ້າໃຈເສຍສະຫຼະອັນບໍ່ມີຂອບເຂດເພື່ອປະເທດຊາດ, ເປັນການເຕົ້າໂຮມບັນດາກໍາລັງທີ່ຮັກຊາດ, ຄຽດແຄ້ນຈັກກະພັດຜູ້ຮຸກຮານເຂົ້າເປັນກ້ອນກໍາລັງມະຫາສະມັກຄີທົ່ວປວງຊົນ, ເຮັດສໍາເລັດໜ້າທີ່ການຕໍ່ສູ້ກູ້ຊາດ.
ໃນຕົ້ນປີ 1956 ໂດຍພາຍໃຕ້ການນຳພາຂອງພັກ ກອງປະຊຸມໃຫຍ່ຜູ້ແທນປະຊາຊົນທົ່ວປະເທດໄດ້ໄຂຂຶ້ນຢູ່ໃນຖານທີ່ໝັ້ນແຂວງຫົວພັນ ໄດ້ປ່ຽນຊື່ແນວລາວອິດສະຫຼະ ມາເປັນແນວລາວຮັກຊາດ ແນໃສ່ເຕົ້າໂຮມທຸກກຳລັງ, ທຸກການຈັດຕັ້ງ ປະຊາຊົນບັນດາເຜົ່າໄດ້ສາມັກຄີກັນເປັນຈິດໜຶ່ງໃຈດຽວ ເຂົ້າໃນແນວໂຮມກູ້ຊາດອັນກວ້າງຂວາງ ເພື່ອຕໍ່ສູ້ຍືດເຍື້ອ ຍາວນານ ຜາບແພ້ພວກສັດຕູຮຸກຮານ ແລະ ລູກແຫຼ່ງຕີນມື, ກໍ່ສ້າງປະເທດລາວ ສັນຕິພາບ ເປັນກາງ ເອກະລາດ ປະຊາທິປະໄຕ ເອກະພາບ ແລະ ວັດທະນາຖາວອນ, ສືບຕໍ່ນຳພາການປະຕິວັດກ້າວຂຶ້ນ.
ດ້ວຍແນວທາງການເມືອງ ແລະ ການທະຫານອັນຖືກຕ້ອງ ແລະ ປະດິດສ້າງ, ດ້ວຍວິທີ ດໍາເນີນການປະຕິວັດອັນອຸດົມຮັ່ງມີ ແລະ ວິທະຍາສາດ, ພັກໄດ້ນຳພາທັບມ້າງກົນອຸບາຍກໍ່ສົງຄາມຂອງພວກລ່າເມືອງຂຶ້ນແບບໃໝ່ ອັນພາໄປເຖິງການເຊັນສັນຍາວຽງຈັນ ໃນປີ 1957 ນັ້ນແມ່ນຜົນສໍາເລັດອັນໃຫຍ່ຫຼວງຂອງພັກເຮົາ ແລະ ກໍແມ່ນປະລາໄຊຍຸດທະສາດຄັ້ງ I ຂອງພວກລ່າເມືອງ ຂຶ້ນແບບໃໝ່ໃນການແຊກແຊງ ແລະ ຮຸກຮານລາວ.
ກາງປີ 1959 ເມື່ອຝ່າຍກົງກັນຂ້າມດໍາເນີນການມ້າງເພລັດຖະບານປະສົມ ແລະ ຄວາມຖືກຕ້ອງປອງດອງຊາດ, ປິດລ້ອມກອງພັນທີສອງຢູ່ທົ່ງໄຫຫີນ, ຈັບກຸມຜູ້ນໍາການປະຕິວັດຈໍານວນໜຶ່ງເຂົ້າຄຸກ, ພັກເຮົາໄດ້ຕັດສິນໃຈຫັນທິດການຕໍ່ສູ້ຢ່າງທັນການ, ປຸກລະດົມທົ່ວປວງຊົນລຸກຮືຂຶ້ນ, ຊຸກຍູ້ການຕໍ່ສູ້ທາງດ້ານການທະຫານ ແລະ ການເມືອງຢ່າງແຂງແຮງໃນທົ່ວປະເທດ, ພາຍໃນໄລຍະເວລາອັນສັ້ນໆ ກໍາລັງປະກອບ ອາວຸດປະຕິວັດໄດ້ຂະຫຍາຍຕົວຢ່າງແຂງແຮງ, ສາມາດປົດປ່ອຍດິນແດນໄດ້ 2/3 ແລະ 1/2 ຂອງພົນລະເມືອງທົ່ວປະເທດ, ເຮັດໃຫ້ເຂດປົດປ່ອຍຊຶ່ງປະກອບດ້ວຍຫຼາຍບໍລິເວນຍຸດທະສາດທີ່ສໍາຄັນຕິດລຽນກັນແຕ່ເໜືອຮອດໃຕ້, ອັນໄດ້ເປັນການບັງຄັບໃຫ້ພວກລ່າເມືອງຂຶ້ນ ແບບໃໝ່ຕ້ອງຍອມນັ່ງໂຕະເຈລະຈາ ແລະ ເຊັນສັນຍາເຊີແນວກ່ຽວກັບລາວ, ສ້າງຕັ້ງລັດຖະບານປະສົມແຫ່ງຊາດຄັ້ງທີ II ວັນທີ 22 ເດືອນ 6 ປີ 1962 ຊຶ່ງແນວລາວຮັກຊາດ ໄດ້ມີຖານະສູງກວ່າເກົ່າ, ນັ້ນເປັນການປະລາໄຊຍຸດທະສາດຄັ້ງທີ II ຂອງຈັກກະພັດລ່າເມືອງຂຶ້ນແບບໃໝ່ຢູ່ລາວ.
ຕົ້ນປີ 1964 ພວກປະຕິການ ໄດ້ໂຄ່ນລົ້ມລັດຖະບານປະສົມສາມຝ່າຍ. ຈັກກະພັດລ່າເມືອງຂຶ້ນແບບໃໝ່ ໄດ້ເພີ່ມທະວີສົງຄາມຮຸກຮານປະເທດເຮົາ ຂຶ້ນສູ່ລະດັບສູງ ໂດຍໃຊ້ເຮືອບິນຖິ້ມລະເບີດທໍາລາຍເຂດປົດປ່ອຍ ສົມທົບກັບການເປີດບັ້ນຮົບຍຸດທະສາດຫຼາຍແຫ່ງເຊັ່ນ: “ສາມສອນ”; “ສອນໄຊ”; “ກູ້ກຽດ ”; “ລາມເຊີນ 719” ແລະ ອື່ນໆ ຊຶ່ງໄດ້ກາຍເປັນສົງຄາມພິເສດ ແລະ ສົງຄາມພິເສດເພີ່ມທະວີຂອງຈັກກະພັດ ເຂົ້າເຂດປົດປ່ອຍ.
ຕໍ່ໜ້າສະພາບການດັ່ງກ່າວ, ປະທານ ໄກສອນ ພົມວິຫານ ແລະ ສູນກາງພັກເຮົາເດັດດ່ຽວ ນໍາພາການຕໍ່ສູ້ທັບມ້າງທຸກການບຸກໂຈມຕີ ແລະ ບຽດຢຶດຂອງສັດຕູເຂົ້າເຂດປົດປ່ອຍ, ໄດ້ມີແນວຄິດຊິ້ນໍາກ່ຽວກັບການກໍ່ສ້າງເຂດປົດປ່ອຍໃຫ້ເປັນລັດໜຶ່ງ, ທີ່ເຂັ້ມແຂງ ແລະ ສ້າງຕັ້ງເມືອງວຽງໄຊເປັນແນວຫຼັງອັນແໜ້ນແກ່ນຂອງການປະຕິວັດ, ເນື້ອໃນຕົ້ນຕໍແມ່ນສຸມໃສ່:
+ ຍູ້ແຮງການຕໍ່ສູ້ທາງການເມືອງ ແລະ ການທະຫານ, ຂະຫຍາຍກໍາລັງປະຕິວັດ, ກໍ່ສ້າງຮາກຖານ ການເມືອງ ຢູ່ໃນເຂດປົດປ່ອຍ, ປັບປຸງກໍາລັງປະກອບອາວຸດ; ສົມທົບການຕໍ່ສູ້ດ້ວຍກໍາລັງອາວຸດ ກັບການຕໍ່ສູ້ທາງດ້ານການເມືອງ ແລະ ສົມທົບການຕໍ່ສູ້ປິດລັບ ກັບການຕໍ່ສູ້ເປີດເຜີຍຖືກກົດໝາຍ; ທັງຕີ, ທັງໜູນໜີບ, ທັງເຈລະຈາຢ່າງມີໄຫວພິບ; ສົມທົບຢ່າງແໜ້ນແຟ້ນ ກໍາລັງແຮງສັງລວມຂອງຊາດ ກັບການຮ່ວມສໍາພັນສູ້ຮົບລາວ-ຫວຽດນາມ-ກໍປູເຈຍ, ຍາດແຍ່ງຄວາມເປັນໃຈ, ສະໜັບສະໜູນ ແລະ ການຊ່ວຍເຫຼືອຈາກສາກົນ ຢ່າງກວ້າງຂວາງ.
+ ອອກແຮງກໍ່ສ້າງ ແລະ ປັບປຸງຖານທີ່ໝັ້ນ ແຂວງຫົວພັນ, ສຸມສ້າງເມືອງວຽງໄຊ ໃຫ້ເປັນສູນກາງທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ, ເປັນສູນກາງກໍາລັງປະກອບອາວຸດ, ຍຸດທະສາດ, ຍຸດໂທບາຍ ແລະ ຍຸດໂທປະກອນ; ສ້າງອຳນາດການປົກຄອງປະຕິວັດແບບໃໝ່ ໂດຍຖືເອົາອົງການແນວໂຮມແຫ່ງຊາດ ທີ່ມີສາຍໃຍການຈັດຕັ້ງແຕ່ຂັ້ນສູນກາງລົງຮອດທ້ອງຖິ່ນ ນັ້ນເປັນຄັນທຸງນຳໜ້າປົກປັກຮັກສາ ແລະ ເປີດກວ້າງເຂດປົດປ່ອຍເທື່ອລະກ້າວ.
+ ປະຕິບັດແນວທາງສົງຄາມປະຊາຊົນຂອງພັກ ໂດຍໄດ້ກໍານົດແຜນນະໂຍບາຍ ເພີ່ມທະວີກໍາລັງປະຕິວັດໃນທຸກດ້ານ, ເປີດກວ້າງແນວໂຮມເອກະພາບແຫ່ງຊາດ, ປຸກລະດົມ ແລະ ເຕົ້າໂຮມສາມັກຄີກັນຢ່າງກວ້າງຂວາງ ເຂົ້າໃນແນວໂຮມກູ້ຊາດ ໂດຍບໍ່ຈຳແນກຜູ້ທຸກ, ຜູ້ຮັ່ງ, ທັດສະນະການເມືອງ, ສາສະໜາ, ເຜົ່າຊົນ, ຊັ້ນຄົນຕ່າງໆ ທັງຢູ່ພາຍໃນ ແລະ ຕ່າງປະເທດ; ເພີ່ມທະວີຄວາມສາມັກຄີທົ່ວປວງຊົນ ເປັນຈິດໜຶ່ງໃຈດຽວກັນ ພ້ອມກັນເດັດດ່ຽວຕໍ່ສູ້ອັນລະອິດລະອ້ຽວ, ຍືດເຍື້ອຍາວນານ, ບໍ່ຢ້ານຕໍ່ສັດຕູຜູ້ຮຸກຮານ, ຜ່ານຜ່າທຸກຂໍ້ຫຍຸ້ງຍາກນາໆປະການ.
+ ສ້າງເສດຖະກິດ ເປັນພື້ນຖານແຫ່ງຄວາມຢູ່ດີກິນດີຂອງປະຊາຊົນ, ສູນກາງພັກ ໄດ້ວາງນະໂຍບາຍກ່ຽວກັບການປົວແປງຊີວິດການເປັນຢູ່ຂອງປະຊາຊົນ ເປັນຕົ້ນ ກຳມະກອນ ຕ້ອງຮັບປະກັນໃຫ້ມີວຽກເຮັດງານທຳ ແລະ ໄດ້ຮັບການເບິ່ງແຍງເປັນຢ່າງດີ; ຊາວໄຮ່ນາ ຕ້ອງມີດິນໄຮ່ດິນນາ ເພື່ອຂະຫຍາຍກະສິກຳ ແລະ ມີຢູ່ມີກິນ; ຊາວຜູ້ອອກແຮງງານດ້ວຍມັນສະໝອງ ຕ້ອງນຳໃຊ້ໃຫ້ສົມກຽດ ແລະ ຂະຫຍາຍຄວາມຮູ້ຄວາມສາມາດ; ສົ່ງເສີມພັດທະນາອຸດສາຫະກຳ-ການຄ້າ; ຕ້ອງມີນະໂຍບາຍອັນເໝາະສົມ ຕໍ່ຜູ້ຊົງຄຸນວຸດທິທີ່ຮັກຊາດ ແລະ ຊັ້ນຄົນຕ່າງໆ.
+ ປຸກລະດົມຂະບວນການຕໍ່ສູ້ການເມືອງ ແລະ ດໍາເນີນສົງຄາມກອງຫຼອນຢູ່ເຂດກວດກາຂອງສັດຕູ, ເຮັດໃຫ້ພວກເຂົາຕ້ອງປະເຊີນໜ້າກັບສອງສະໜາມຮົບຄື: ສະໜາມຮົບແນວໜ້າ ແລະ ສະໜາມຮົບແນວຫຼັງ; ສົມທົບຢ່າງແໜ້ນແຟ້ນ ການຕໍ່ສູ້ທາງດ້ານການທະຫານກັບການຕໍ່ສູ້ທາງດ້ານການເມືອງທັງສູ້ຮົບ, ທັງອອກແຮງກໍ່ສ້າງ ແລະ ເສີມຂະຫຍາຍທຸກປັດໄຈຂອງໄຊຊະນະ, ເສີມຂະຫຍາຍກໍາລັງແຮງຕໍ່ສູ້ຂອງຊາດເຮົາຢ່າງສຸດຂີດກັບການສົມທົບກໍາລັງແຮງໃນການຮ່ວມສໍາພັນສູ້ຮົບກັບຫວຽດນາມ ແລະ ກໍາປູເຈຍອ້າຍນ້ອງ, ຍາດແຍ່ງຄວາມສາມັກຄີ ແລະ ການຊ່ວຍເຫຼືອຂອງສາກົນ.
ພັກເຮົາສາມາດນໍາພາການຕໍ່ສູ້ຜາບແພ້ສົງຄາມພິເສດ ແລະ ສົງຄາມພິເສດເພີ່ມທະວີຂອງຈັກກະພັດ, ບັງຄັບໃຫ້ພວກເຂົາຕ້ອງຍອມເຊັນສັນຍາວຽງຈັນ ວ່າດ້ວຍການຟື້ນຟູສັນຕິພາບ ແລະ ປະຕິບັດຄວາມຖືກຕ້ອງປອງດອງຊາດຢູ່ລາວ ໃນວັນທີ 21 ກຸມພາ ປີ 1973 ຊຶ່ງພາໄປເຖິງການສ້າງຕັ້ງລັດຖະບານປະສົມຊົ່ວຄາວແຫ່ງຊາດຄັ້ງທີ່ III ແລະ ຄະນະມົນຕີປະສົມການ ເມືອງແຫ່ງຊາດ, ເຮັດໃຫ້ສອງນະຄອນວຽງຈັນ ແລະ ຫຼວງພະບາງ ເປັນກາງຕາມລະບຽບການພິເສດ, ສ້າງເງື່ອນໄຂພື້ນຖານໃຫ້ການປະຕິວັດຊາດ ປະຊາທິປະໄຕ ຢູ່ປະເທດເຮົາ ກ້າວຂຶ້ນຍາດເອົາໄຊຊະນະສົມບູນ, ພ້ອມກັນນັ້ນ ກໍເປັນຂີດໝາຍແຫ່ງການປະລາໄຊຍຸດທະສາດຄັ້ງທີ III ຂອງພວກລ່າເມືອງຂຶ້ນແບບໃໝ່ຢູ່ລາວ.
ເມື່ອສະພາວະການປະຕິວັດ ໂດຍກົງຢູ່ປະເທດເຮົາທີ່ໄດ້ກ້າວສູ່ຈຸດສຸກງອມ ໂດຍກໍາກາລະໂອກາດພັນປີມີເທື່ອໜຶ່ງ ພັກເຮົາໄດ້ຕົກລົງໂມ່ງບາດຄ້ອນອັນຕັດສິນໃສ່ສັດຕູ, ຍາດໄດ້ໄຊຊະນະອັນສົມບູນມາໃຫ້ການປະຕິວັດ ແລະ ປະເທດຊາດ ດ້ວຍສາມບາດຄ້ອນຍຸດທະສາດຄື: ການລຸກຮືຂຶ້ນຂອງມະຫາຊົນ, ການໜູນໜີບຢ່າງແຂງແຮງຈາກກໍາລັງປະກອບອາວຸດປະຕິວັດ ແລະ ການລຸກຮືຂຶ້ນແຍກຕົວ ຂອງກອງທະຫານຝ່າຍວຽງຈັນ, ພັກເຮົາໄດ້ນໍາພາກອງທັບ ແລະ ປະຊາຊົນໃນທົ່ວປະເທດທັບມ້າງກໍາລັງ ແລະ ກົງຈັກປະຕິການທັງໝົດ, ຍາດເອົາອໍານາດການປົກຄອງມາສູ່ກໍາມືປະຊາຊົນຢ່າງໄວວາແບບ “ບົວບໍ່ຊໍ້ານໍ້າບໍ່ຂຸ່ນແຕ່ຫາກຈັບປາໄດ້ທັງໝົດ”.
ວັນທີ 2 ທັນວາ ປີ 1975 ກອງປະຊຸມໃຫຍ່ຜູ້ແທນປະຊາຊົນທົ່ວປະເທດທີ່ໄຂຂຶ້ນຢູ່ນະຄອນຫຼວງວຽງຈັນ. ໄດ້ເປັນເອກະສັນກັນ ຜ່ານມະຕິປະຫວັດສາດຄື: ລົບລ້າງລະບອບລາຊາທິປະໄຕຢ່າງສິ້ນເຊີງ, ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຊຶ່ງແມ່ນລັດຂອງປະຊາຊົນໂດຍປະຊາຊົນ ແລະ ເພື່ອປະຊາຊົນຢ່າງສະຫງ່າຜ່າເຜີຍ.
ໄຊຊະນະປະຫວັດຍິ່ງໃຫຍ່ດັ່ງກ່າວ ເປັນຂີດໝາຍແຫ່ງການສໍາເລັດການປະຕິວັດ ປົດປ່ອຍຊາດຢ່າງສົມບູນ ແລະ ເປີດສາກໃຫ້ແກ່ໄລຍະໃໝ່ຂອງການປະຕິວັດ, ໄລຍະທີ່ປະຊາຊົນເຮົາເປັນເຈົ້າປະເທດຊາດ, ເປັນເຈົ້າຊາຕະກໍາຂອງຕົນຢ່າງແທ້ຈິງ ແລະ ກ້າວຂຶ້ນຕາມເສັ້ນທາງສັງຄົມນິຍົມ ຢ່າງສະຫງ່າລາສີ, ນັ້ນເປັນການປະລາໄຊທາງຍຸດທະສາດຄັ້ງທີ IV ແລະ ເປັນການປະລາໄຊຢ່າງສິ້ນເຊີງ ຂອງພວກລ່າເມືອງຂຶ້ນແບບໃໝ່ຢູ່ປະເທດເຮົາ.
ບັນດາສະຫາຍ ແລະ ເພື່ອນມິດທີ່ຮັກແພງທັງຫຼາຍ !
ການຈັດຕັ້ງງານສະເຫຼີມສະຫຼອງເມືອງວຽງໄຊຖານທີ່ໝັ້ນຂອງການປະຕິວັດລາວຄົບຮອບ 50 ປີ ຂອງພວກເຮົາພໍດີກັບບັນຍາກາດສະເຫຼີມສະຫຼອງ ສປປລາວ ມີອາຍຸຄົບຮອບ 43 ປີ, ການລະນຶກວັນເກີດປະທານໄກສອນ ພົມວິຫານ ຄົບຮອບ 98 ປີ.
ຕະຫຼອດໄລຍະປະຫວັດສາດດັ່ງກ່າວ, ພວກເຮົາ ສຸດທີ່ມີຄວາມເອກອ້າງທະນົງໃຈ ທີ່ເຫັນວ່າພາຍໃຕ້ການນຳພາຂອງພັກ, ຖັນແຖວພະນັກງານ, ທະຫານ, ຕຳ ຫຼວດ ແລະປະຊາຊົນລາວບັນດາເຜົ່າ ໄດ້ເສີມຂະຫຍາຍມູນເຊື້ອຮັກຊາດອັນດູດດື່ມ, ຕໍ່ສູ້ພິລາດອາດຫານບໍ່ຍອມຈຳນນົນ, ມູນເຊື້ອອອກແຮງງານດຸໝັ່ນຂະຫຍັນພຽນ, ຍາກປານໃດກໍບຸກ, ທຸກປານໃດ ກໍຜ່ານຜ່າ, ປະກອບສ່ວນຢ່າງຕັ້ງໜ້າ ເຂົ້າໃນພາລະກິດຕໍ່ສູ້ປົດປ່ອຍຊາດ ໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງພວກເຮົາໃນປັດຈຸບັນ, ປະເທດຊາດຂອງພວກເຮົາໄດ້ມີການປ່ຽນແປງໃໝ່ໃນຫຼາຍດ້ານ, ຮັບປະກັນຄວາມໝັ້ນຄົງຂອງຊາດ ແລະ ຄວາມ ສະຫງົບປອດໄພ ໃນທົ່ວສັງຄົມ; ເສດຖະກິດຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງປະຊາຊົນລາວບັນດາເຜົ່າ ໄດ້ຮັບການປັບປຸງດີຂຶ້ນ ທັງດ້ານວັດຖຸ ແລະ ຈິດໃຈ, ອິດທິພົນບົດບາດຂອງ ສປປ ລາວ ນັບມື້ນັບພົ້ນເດັ່ນຂຶ້ນ ໃນເວທີພາກພື້ນ ແລະ ສາກົນ.
ໃນພິທີສະເຫຼີມສະຫຼອງອັນຄຶກຂຶມນີ້, ຕາງໜ້າສູນກາງພັກ, ສະພາແຫ່ງຊາດ, ລັດຖະບານ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຍ້ອງຍໍສັນລະເສີນ ບັນດາສະຫາຍສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ຕະຫຼອດເຖິງພີ່ນ້ອງຊາວລາວຢູ່ຕ່າງປະເທດ ທີ່ໄດ້ປະກອບສ່ວນເຂົ້າໃນພາລະກິດລວມຂອງຊາດດັ່ງທີ່ກ່າວມານັ້ນຢ່າງສຸດອົກສຸດໃຈ. (ຊົມເຊີຍ)!
ຂໍສະແດງຄວາມຂອບອົກຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງ ມາຍັງບັນດາປະເທດອ້າຍນ້ອງເພື່ອນມິດ ແລະ ອົງການຈັດຕັ້ງສາກົນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອພາລະ ກິດການປະຕິວັດ ຂອງພວກເຮົາຕະຫຼອດມາ (ຂໍຊົມເຊີຍ).
ບັນດາສະຫາຍ ແລະ ເພື່ອນມິດທີ່ຮັກແພງທັງຫຼາຍ !
ເມື່ອທົບທວນຫວນຄືນປະຫວັດສາດແຫ່ງການກໍ່ຕັ້ງ ແລະ ປົກປັກຮັກສາປະເທດຊາດເປັນເວລາພັນປີຂອງຊາດລາວເຮົາເວົ້າລວມ, ເວົ້າສະເພາະເມືອງວຽງໄຊ-ຖານທີ່ໝັ້ນ ຂອງການປະຕິວັດລາວຄົບ ຮອບ 50 ປີ ຍິ່ງພິສູດໃຫ້ພວກເຮົາເຫັນແຈ້ງວ່າ ບໍ່ມີຍຸກໃດ, ສະໄໝໃດ ທີ່ປະເທດຊາດຂອງພວກເຮົາໄດ້ຮັບເອກະລາດ, ປະຊາຊົນ ມີສິດເສລີພາບ, ມີປະຊາທິປະໄຕ ແລະ ໄດ້ຮັບການພັດທະນາ ຈະເລີນຮຸ່ງເຮືອງເທົ່າກັບຍຸກສະໄໝທີ່ມີພັກ ປະຊາຊົນປະຕິວັດລາວ ເປັນຜູ້ຈັດຕັ້ງ ແລະ ນໍາພາລະກິດການປະຕິວັດປະເທດເຮົາ.
ໃນການນຳພາ ແລະ ພາລະກິດປະຕິວັດ ພັກໄດ້ກຳແໜ້ນທິດສະດີປະຕິວັດ, ເປັນຕົ້ນການວາງແນວທາງຍຸດທະສາດ, ຍຸດໂທບາຍຢ່າງຖືກຕ້ອງ, ປະດິດສ້າງສອດຄ່ອງກັບເງື່ອນໄຂ, ສະພາບການຕົວຈິງໃນແຕ່ລະໄລຍະ, ມີການສົມທົບບັນດາຮູບການຕໍ່ສູ້ຢ່າງມີໄຫວພິບ; ພັກໄດ້ເອົາໃຈໃສ່ຢ່າງຈົດຈໍ່ຕໍ່ການສຶກສາອົບຮົມ, ເສີມຂະຫຍາຍມູນເຊື້ອຮັກຊາດ, ດຸໝັ່ນຂະຫຍັນໝັ່ນພຽນ, ຄວາມສາມັກຄີຂອງປະຊາຊົນ, ເສີມຂະຫຍາຍທຸກກຳລັງແຮງບົ່ມຊ້ອນພາຍໃນ ແລະ ຮ່ວມສຳພັນສູ້ຮົບ ກັບປະຊາຊົນຫວຽດນາມ ອ້າຍນ້ອງ, ພ້ອມທັງຍາດແຍ່ງເອົາການສະໜັບສະໜູນ ຊ່ວຍເຫຼືອຈາກເພື່ອນມິດໃນໂລກ, ເຮັດໃຫ້ການປະຕິວັດຊາດປະຊາທິປະໄຕ ເມື່ອກ່ອນໄດ້ຮັບໄຊຊະນະໃຫ່ຍຕໍ່ເນື່ອງ, ກ້າວຂຶ້ນຍາດເອົາໄຊຊະນະຢ່າງສົມບູນ.
ໄຊຊະນະຂອງການປະຕິວັດ ເຮົາຕິດພັນແໜ້ນ ກັບເມືອງວຽງໄຊ ປິຕຸພູມທີ່ລືຊື່ແຫ່ງນີ້ ເຊຶ່ງເປັນຖານທີ່ໝັ້ນອັນແຂງແກ່ນ ຂອງການປະຕິວັດລາວ ສະແດງອອກຢ່າງລວມສູນຄື: ເປັນບ່ອນປະຈໍາການຂອງສູນກາງພັກເຮົາໃນການວາງແນວທາງປົດປ່ອຍຊາດ; ເປັນບ່ອນບັນຊາ-ຊີ້ນໍາ ການຕໍ່ສູ້ທັບມ້າງບັນດາຍຸດທະສາດສົງຄາມຮຸກຮານລາວ ຂອງຈັກກະພັດລ່າເມືອງຂຶ້ນແບບໃໝ່; ເປັນບ່ອນສ້າງໃຫ້ເປັນລັດໜຶ່ງ, ຖານທີ່ໜັ້ນຂອງການປະຕິວັດລາວ ຕົ້ນກຳເນີດລະບອບປະຊາທິປະໄຕ ປະຊາຊົນຢູ່ປະເທດເຮົາ; ດິນແດນສັນຍາລັກແຫ່ງອິດສະຫຼະພາບ, ດິນແດນແຫ່ງການເຕົ້າໂຮມຄວາມສາມັກຄີ ປອງດອງຊາດ;ດິນແດນວິລະຊົນ, ເປັນບ່ອນກໍ່ຕັ້ງເຫດການເມືອງທີ່ສຳຄັນຂອງກຳລັງປະຕິວັດ, ເປັນບ່ອນຊຸບຫຼໍ່ພະນັກງານການນຳຂັ້ນຕ່າງໆ ແລະ ພະນັກງານຂອງພັກ-ລັດ ບໍ່ຈັກວ່າເທົ່າໃດ, ເປັນບ່ອນຊີ້ນໍາ-ບັນຊາ ທົ່ວປະເທດປະຕິບັດ 3 ບາດຄ້ອນຍຸດທະສາດ ແລະ ເປັນບໍ່ເກີດຂອງສາທາລະນະລັດ ປະຊາທິປະໄຕ ປະຊາຊົນລາວ.
ປັດຈຸບັນ ເມືອງວຽງໄຊໄດ້ກາຍເປັນມໍລະດົກອັນລໍ້າຄ່າທາງປະຫວັດສາດ ແລະ ທໍາມະຊາດຂອງປະເທດເຮົາ, ນີ້ຄືຄວາມເອກອ້າງທະນົງໃຈ ແລະ ກຽດສັກສີອັນສູງສົ່ງ ຂອງປະຊາຊົນລາວບັນດາເຜົ່າ ໃນທົ່ວປະເທດ ກໍຄືຊາວເມືອງວຽງໄຊ, ແຂວງຫົວພັນວິລະຊົນ ທີ່ພວກເຮົາຈະຕ້ອງໄດ້ຈົດຈໍາ, ຈາລຶກໄວ້ ແລະ ສືບທອດໃຫ້ຄົນລຸ້ນຕໍ່ໄປ.
ບັນດາສະຫາຍ ແລະ ເພື່ອນມິດທີ່ຮັກແພງທັງຫຼາຍ!
ເພື່ອພັດທະນາປະເທດຊາດຂອງພວກເຮົາ ສູ່ຈຸດໝາຍທີ່ວາງໄວ້ ແລະ ຮອດປີ 2020 ໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ກ້າວໄປສູ່ປະເທດກຳລັງພັດທະນາ ຕາມຈຸດໝາຍປາຍທາງທີ່ພັກ ແລະ ລັດພວກເຮົາກຳນົດໄວ້, ຂ້າພະເຈົ້າ ຂໍຮຽກຮ້ອງມາຍັງພະນັກງານ, ສະມາຊິກພັກ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ນັກຮຽນຮູ້ປັນຍາຊົນ, ຜູ້ຊົງຄຸນວຸດທິ, ນັກທຸລະກິດທຸກທົ່ວໜ້າ ແລະ ປະຊາຊົນລາວບັນດາເຜົ່າ ໃນທົ່ວປະເທດ ກໍຄືພີ່ນ້ອງເຊື້ອຊາດລາວຢູ່ຕ່າງປະເທດ ເອົາໃຈໃສ່ເພີ່ມທະວີຄວາມສາມັກຄີປອງດອງ ເປັນຈິດໜຶ່ງໃຈດຽວກັນ, ພ້ອມກັນສືບທອດ ແລະ ເສີມຂະຫຍາຍມູນເຊື້ອຮັກຊາດອັນດູດດື່ມ, ເປັນເຈົ້າການເຂົ້າຮ່ວມຂະບວນການສ້າງສາ ແລະ ພັດທະນາປະເທດຊາດ ໃຫ້ຟົດຟື້ນ ແລະ ຕໍ່ເນື່ອງ; ພວກເຮົາຕ້ອງເດັດດ່ຽວຍຶດໝັ້ນ ຄຳຂວັນກອງປະຊຸມໃຫຍ່ ຄັ້ງທີ X ຂອງພັກວາງອອກ ຄື: “ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຍຶດໝັ້ນ ແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກ ແລະ ພັດທະນາປະເທດຕາມທິດຍືນຍົງ ສູ່ຈຸດໝາຍສັງຄົມນິຍົມຢ່າງໜັກແໜ້ນ”.
ຕັ້ງໜ້າພັດທະນາບັນດາແຂວງ ໃນທົ່ວປະເທດ ໃຫ້ເສດຖະກິດຂະຫຍາຍຕົວ, ແຂງແຮງ ແລະ ໜັກແໜ້ນ; ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ, ຮັບປະກັນສະຖຽນລະພາບ ແລະ ຄວາມໝັ້ນຄົງຂອງປະເທດຊາດ.
ເພີ່ມທະວີວຽກງານກໍ່ສ້າງພັກ-ພະນັກງານ ຕາມທິດສ້າງພັກເຂັ້ມແຂງ ແລະ ໜັກແໜ້ນ ໂດຍຕິດພັນກັບການປັບປຸງປົວແປງທົ່ວພັກ, ແກ້ໄຂຈຸດອ່ອນ, ຂໍ້ຄົງຄ້າງ, ທັງຮັບປະກັນໃຫ້ແກ່ການກະກຽມດຳເນີນກອງປະຊຸມໃຫຍ່ 3 ຂັ້ນທີ່ຈະມາເຖິງນີ້.
ຕັ້ງໜ້າຂຸດຄົ້ນ ແລະ ເສີມຂະຫຍາຍກຳລັງແຮງສັງລວມ ຂອງທົ່ວປວງຊົນທັງຊາດ, ເປັນເຈົ້າການປະຕິບັດວຽກງານການຕ່າງປະເທດ ແລະ ປະກອບສ່ວນຢ່າງສົມກຽດ ຂອງຕົ້ນເຂົ້າໃນການພາລະກິດລວມຂອງສາກົນ ເພື່ອສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາ.
ໃນເວລານາທີອັນມີຄວາມໝາຍສຳຄັນນີ້, ອີກເທື່ອໜຶ່ງ ຂ້າພະເຈົ້າ ຂໍອວຍພອນບັນດາສະຫາຍເພື່ອນມິດ ແລະ ແຂກທັງພາຍໃນ ແລະ ຕ່າງປະເທດ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ປະສົບຜົນສໍາເລັດໃນໜ້າທີ່ການງານຂອງຕົນທຸກປະການ.
ອວຍພອນມາຍັງມວນຊົນຊາວເມືອງວຽງໄຊວິລະຊົນ, ຊາວແຂວງຫົວພັນວິລະຊົນ ແລະ ປະຊາຊົນບັນດາເຜົ່າໃນທົ່ວປະເທດ ຈົ່ງມີສຸຂະພາບເຂັ້ມແຂງ ພ້ອມກັນສູ້ຊົນສ້າງສາພັດທະນາເມືອງວຽງໄຊ, ແຂວງຫົວພັນ ກໍຄືທົ່ວປະເທດ ໃຫ້ຈະເລີນຮຸ່ງເຮືອງ ຍິ່ງໆຂຶ້ນໄປ.
ສາທາລະນະລັດ ປະຊາທິປະໄຕ ປະຊາຊົນລາວ ໝັ້ນຍືນ!
ພັກປະຊາຊົນປະຕິວັດລາວ ຜູ້ທີ່ມີກຽດສະຫງ່າ ໝັ້ນຍືນ!
ຂໍຂອບໃຈຂໍ້ມູນຈາກ: ຂປລ.